थेस्सलनीकरस्ले दुसरा पत्र 1 - आहिराणी नवा करार

नमस्कार

¹ मी, पौल, तीमुथियुस आणि सिल्वान ना संगे भेटीसन, थेस्सलनीका शहर नि मंडळी ले हय पत्र लिखस जो आमना बाप परमेश्वर आणि प्रभु येशु ख्रिस्त ना शे.

² आमी प्रार्थना करतस कि बाप परमेश्वर आणि प्रभु येशु ख्रिस्त कळून तुमले कृपा आणि शांती भेटत राहो.

न्याय ना दिन

³ ओ विश्वासी भावूसहोण, तुमना बारामा आमले प्रत्येक टाईम ले परमेश्वर ना धन्यवाद कराले पाहिजे, आमना साठे अस करन चांगल बी शे, कारण कि ख्रिस्त मा तुमना विश्वास गैरा वाळत जाई ऱ्हायना, आणि तुमी सर्वास्ना प्रेम आपस मा गैराच वाळत जाई ऱ्हायना.

⁴ एनासाठे आमी स्वताच परमेश्वर नि मंडळीस्मा तुमना बारामा गर्व करतस. कारण कि जीतला त्रास आणि छळ तुमी सहन करतस, त्या सर्वा मा तुमना धीर आणि विश्वास प्रगट होस.

⁵ ह्या सर्वास्तून हय प्रमाणित होस कि परमेश्वर ना न्याय खरा शे आणि जेना मुळे तुमी परमेश्वर ना राज्य ना योग्य ठरोत, जेना साठे तुमी दुख बी उचलतस.

⁶ परमेश्वर ना नजर मा हय बरोबर शे कि तो त्या लोकस्ले येणा बदला मा क्लेश देवो ज्या तुमले क्लेश देतस.

⁷ आणि तो तुमले ज्या क्लेश झेलतस आमना दिन, तसाच आमले बी. तो असा तव करीन जव प्रभु येशु आपला सामर्थ्यी दूतस संगे, अग्नी ज्वालाविष्टीत स्वर्ग मधून प्रगट हुईन,

⁸ आणि ज्या परमेश्वर ले नई ओयखतस, आणि आमना प्रभु येशु नि सुवार्ता ले नई मानतस तेस्ले दंड दिन.

⁹ त्या प्रभु ना समोरून आणि तेनी महिमामय शक्ती पासून दूर हुईसन कायम ना दंड भोगतीन.

¹⁰ हय त्या दिन हुईन, जव तो आपला पवित्र लोकस पासून महिमा भेटो म्हणून आणि सर्वा विश्वासीस साठे आश्चर्य ना कारण बनाले ईन. तुमी बी तेनामा ऱ्हाश्यात, कारण कि तुमनी आमना संदेश वर विश्वास करेल शे.

¹¹ एनाच साठे आमी तुमना साठे कायम प्रार्थना करतस, आमना परमेश्वर तुमले त्या जीवन ले जगाना योग्य समजो जेना साठे तेनी तुमले बलायेल शे. आणि तो तुमना मा चांगुलपणा नि प्रत्येक ईच्छा आणि विश्वास ना प्रत्येक कामस्ले सामर्थ्य कण पुरा करो.

¹² एनासाठे कि आमना परमेश्वर आणि प्रभु येशु ख्रिस्त नि कृपा ना प्रमाणे आमना प्रभु येशु ख्रिस्त ना नाव ले तुमना मा गौरव भेटो आणि तुमले बी तेनामा आदर भेटो.