पेत्र ना पहिला पत्र 1 - आहिराणी नवा करार

नमस्कार

¹ मी पेत्र, येशु ख्रिस्त ना प्रेषित, हय पत्र त्या परदेशीस्ना नाव वर लिखस, ज्या पंत, गलतिया प्रांत, कप्पदूकीया, आशिया प्रांत आणि बेथानी प्रांत मा अथा तथा हुईसन ऱ्हातस.

² परमेश्वर बाप नि आपली ईच्छा ना नुसार तुमले आणि पवित्र आत्मा ना कामस्ना कार्यस्ना द्वारे तुमले पवित्र बनावा साठे गैरा पहिले निवाळी लीयेल होत. हय तेनी एनासाठे कर कि तुमी येशु ख्रिस्त नि आदन्या ले मानोत आणि तेना रक्त ना द्वारे शुद्ध करामा येवोत. मी प्रार्थना करस कि परमेश्वर नि कृपा आणि शांती तुमले विपुलता कण भेटत राहो.

एक जीत्ती आशा

³ आमना प्रभु येशु ख्रिस्त ना बाप आणि परमेश्वर ना धन्यवाद होवो, कारण कि तेनी आपली महान दया कण येशु ख्रिस्त ले मरेल मधून परत जित्ता करीसन, आमले विश्वास कण नवा जीवन नि आशा दियेल शे.

⁴ आणि एनासाठे आमी त्या महान मिरास ले प्राप्त करानी वाट देखतस जी परमेश्वर आपला लोकस साठे ठीयेल शे. तो तुमना साठे तेस्ले स्वर्ग मा ठेवस, जठे नईत ती सळु सकस, नईत खराब होवू सकस आणि नईत समाप्त होवू सकस.

⁵ कारण कि तुमी येशु वर विश्वास करतस, एनासाठे परमेश्वर तुमले आपली मोठी सामर्थ्य ना द्वारे सुरक्षित ठेवस, आणि तो तुमले ख्रिस्त ना दुसरा सावा येवाना दिन लगून वाचाळी सन ठेवीन.

⁶ तुमले ह्या सर्वा गोष्टी मुळे खुश होवाले पाहिजे, जरी काही टाईम ना साठे तुमी नाना-प्रकार ना परीक्षास्ना मुळे दुख मा शेतस,

⁷ ह्या अडचणीस्ना उद्देश्य हय शे कि तुमना परमेश्वर वर विश्वास परीक्षा ना द्वारे खरा निघो. येशु ख्रिस्त मा तुमना विश्वास सोना तून गैरा मूल्यवान शे. जसा कि नाश होणारा सोना आग मा तपाळी सन परखा मा व युध्द करामा येस, तसाच जर तुमना विश्वास नाना-प्रकार ना परीक्षास्ना द्वारे परखा मा ईसन पक्का निघो, त हय तुमना साठे ख्रिस्त येशु ना दुसरा सावा येवाना दिनस्मा प्रशंसा, महिमा आणि आदर ना कारण ठरीन.

⁸ तुमनी येशु ले कदीच नई देख, पण तरी बी तुमी तेनावर प्रेम ठेवतस. तुमी तेले आते नई देखतस, पण तुमी तेनावर विश्वास ठेवतस. एनासाठे, तुमी असा खुश आणि मग्न होतस, जो वर्णन तून बाहेर आणि महिमा कण भरेल शे.

⁹ तुमी खुश शेतस, कारण कि तुमनी आत्मा कायम ना साठे पाप ना दंड पासून वाचाळामा येस. ख्रिस्त येशु मा हवू तुमना प्रतीफय शे.

भविष्यवक्तास्नी साक्ष

¹⁰ ह्या तारण ना बारामा भविष्यवक्तास्नी गैर काही समजान देख. तेस्नी तुमी परमेश्वर कळून भेटणारी कृपास्ना बारामा भविष्यद्वाणी करेल होती.

¹¹ ख्रिस्त नि आत्मा त्या भविष्यवक्तास्मा वास करत होता आणि पहिले पासूनच तो ख्रिस्त ना दुख भोगाना व एना नंतर येणारी महिमा ना बारामा तेस्ले सांगत होता. भविष्यवक्ता हय समजाना देखत होतात कि आत्मा कोणता टाईम ले आणि कोणत्या परिस्थितीस्ना कळे संकेत करी ऱ्हायना शे.

¹² पण परमेश्वर नि त्या भविष्यवक्तास्ले सांग कि हवू संदेश फक्त स्वताच साठे नई पण तुमना साठे शे. तो संदेश ख्रिस्त येशु ना विषय मा सुवार्ता शे जिले तुमी आते आयकतस. परमेश्वर नि पवित्र आत्मा ले स्वर्ग मधून धाळ कि सुवार्ता आयकाळा मा लोकस्नी मदत करो, हय सगळ काही इतला अदभूत शे कि ह्या गोष्टीस्ले स्वर्गदूत बी ध्यान कण देखानी ईच्छा ठेवतस.

पवित्र जीवन जगा नि आवाहन

¹³ एनासाठे, आपला मन ले तयार करा, जसा लोक काम करासाठे आपली कंबर ले कशीसन तयार करतस. तुमी संयमी बनेल राहा आणि ती कृपा नि पुरी आशा करा, जी येशु ख्रिस्त ना प्रगट होवावर तुमले भेटीन.

¹⁴ परमेश्वर नि आज्ञा ना पालन करा कारण कि तुमी तेना पोर शेतस, त्या वाईट कामस्ले करणारा नका बना जेस्ले तुमी तव कराना देखत होतात, जव तुमी परमेश्वर ना सत्य ले नई वयखत होतात.

¹⁵ पण जसा तुमना बलावणार परमेश्वर पवित्र शे, तसाच तुमी बी आपला पुरा वागणूक मा पवित्र बना.

¹⁶ कारण कि शास्त्र मा लिखेल शे, “पवित्र बना, कारण कि मी पवित्र शे.”

¹⁷ जव तुमी प्रार्थना करतस, परमेश्वर ले ओ बाप, सांगीसन हाक मारतस. पण आठवण ठेवा कि तो बिगर भेतभाव ना प्रत्येक माणुस ना न्याय तेना कामस्ना नुसार करस. एनासाठे जव तुमी परदेशीस्ना सारखा ह्या पृथ्वी वर ऱ्हातस, त तुमी तेना मोठा आदर करत जीवन जगा.

^18-19 तुमले माहिती शे कि तुमी पहिले निरर्थक जीवन जगत होतात, जे तुमनी आपला पूर्वज पासून शिकेल होतात. पण तुमले असा निरर्थक जीवन पासून सुटका भेटी जायेल शे. तुमी सोन आणि चांदी सारखा नाश होणारा वस्तूस्ना व्दारे नई लेवामा उनात, पण ख्रिस्त ना बहुमुल्य रक्त ना द्वारे विकत लेवामा एयेल शेतस, जो निर्दोष आणि निष्कलंक कोकरू होता.

²⁰ परमेश्वर नि जग नि निर्मिती ना पहिले, येशु ख्रिस्त ले मुक्तिदाता ठराव. आणि ह्या आखरी युगमा तुमनी मदत साठे प्रगट हुईना.

²¹ ख्रिस्त नि जे काही कर, तेना व्दारे तुमी परमेश्वर वर विश्वास करतस. कारण कि तेनी ख्रिस्त ले मरेल मधून परत जित्ता कर आणि तेले महिमा दिधी एनासाठे तुमी परमेश्वर वर विश्वास आणि आपली आशा ठेवतस.

²² कारण कि तुमी सत्य ना पालन कराना द्वारे शुद्ध करामा एयेल शेतस, त आते तुमले आपला विश्वासी भावूस्ना संगे निष्कपट प्रेम कराले पाहिजे. त तन-मन लाईसन एक दुसरा वर पुरा मन कण प्रेम ठेवा.

²³ कारण कि तुमले परमेश्वर पासून नवा जीवन भेटेल शे. तुमले हय जीवन कोणत्या नाश होणारा वस्तू कण नई पण कायम लगून राहाणारा तत्व पासून भेटेल शे, आणि तो तत्व परमेश्वर ना जीवन आणि कायम लगून ऱ्हायनारा वचन शे.

²⁴ कारण कि शास्त्र मा लिखेल शे, “प्रत्येक प्राणी गवत ना सारखा शे, आणि तेनी सर्वी शोभा गवत ना फुल ना सारखा शे. गवत सुखी जास आणि फुल गई जातस.

²⁵ पण प्रभु ना वचन युगानयुग स्थिर ऱ्हास.” आणि हईच ख्रिस्त ना विषय मा सुवार्ता ना वचन शे जो तुमले आयकाळा मा एयेल होता.