Taetùs 1 - To kə Kəzə̀ kə̀ Fughu ko

¹ À mwàʼsò kən kə tɔm mugho Pôl, kɔ̂ɔ fə Kəzə̀, àsùghò tum è Yɛso Kə̀lestò. Ghe mugho tùm wò alebùghò tughusô boo e ghì ghəla Zə̀ kə̀ mò shîa kɔʼ enyəa e noo, àsùghò â ghee alekelê tsʉ̀ è səŋò zəla e lo, aleyòsò ghee enyəa ghe e mughu an dziī zəla Zə̀ kə̀ ləghaa.

² Tsʉ̂ è səŋò zən lo ghəəŋ nù ghe lo e mughu, kwo tən enyəa ghe lo kelê mùghù e doʼn təla zəla Zə̀ kəla kə kaʼn yô gha gho fə̀ to naŋā â wǐiwì.

³ A m bùghò nəgha e Kəzə̀ è kpe tsughu, Kə ŋ ghəəŋ tsughu enyəa a kele làbəlà è wə̄n è dzùŋ zən zəla Ǹ naʼn wo. Kən lǒ fwàʼ kə̀là Zə̀ kəla kə bəghaasəa fughu wo â mùghò enyəa mùghò è fwaʼā.

⁴ M̀ mwàʼsò kən fɛ tɔɔ wò â ghù a Taetòs, ghù kùm lǒ wɛ waŋā ù sə̀ŋò bòʼ ghàʼ à dzeŋe boo fughu â Kə̀lestò Yɛso. Gɔ̂ɔŋ zaŋa e lo enyəa to Kə̀zə̀, Tsele ù te, àsùghò Yɛso Kə̀lestò wəla ù Bəghāasəā sɛ̀, mô fughu ghû â bughuun zo, à dzùŋù mò.

Fwàʼ kə Taetùs aŋ Kə̀lêt

⁵ Mùgho fə̀ ghû fɛ aŋ Kə̀lêt naŋa taʼā tsughu enyəa ghù nəghaso mɛʼɛ̄ kaaŋ wo ghəa ghəla a fə̀ doʼò səā, àsùghò enyəa ghù tsuʼ kaaŋ nduw tsoʼ to an ndughù è kə̀zə̀ an nàʼà ŋ Kə̀lêk mə̀n n dzə̀m, aŋ ghəa mùghò fə̀ dzɛ̂ â ghù.

⁶ Tsoʼ è ndùghù è Kə̀zə̀ ki alelō ghùw wəla ù ki mwam ù dzûŋ wò, mò ghùw yò alesɔ̀ʼ kə̀ghu a zəŋò wən enyəa ù mò ghə̌əŋ bonlo èghəa, mò ù kì ko wi u mɔ̀ʼ, mo wɛ a wə̄n ghə m boo fùghù sùghò â Yɛso, tughuu sùghò yò â tuw ko, mo ghe kâ sə̀ bò sùghò.

⁷ Nu e lo enyəa ghùw wəla ù lǒ tò kətuw an ndùghù è kə̀zə̀, fwàʼà â Zə̀ kò, kì alelō ghùw wəla ghùw yò alesɔ̀ʼ kəghu a zəŋò wə̄n enyəa ù mò ghə̌əŋ bonlo èghəa, mò ù kɔʼɔ nyaʼn sùghò yò an tuw u aghì, mò ù tɔ̌ɔ sùghò yò â nə̀ghà fò, ŋkāa mʉa kala sùghò yǒ lʉ̀ mò, ù è lo sugho ghùw wəla ù kəŋo sùghò yô tsû wò, ŋkāa səa sùghò yò â sə gho aŋ ghəa tə ukʉ̄a.

⁸ Ù lǎam ki aledòʼò tsùghù ghùw wəla ù bɔŋɔ̄ naāŋ ghî ghò alô wə̄n, tèlè lə̀ghaa kô ghəa è dzûŋ zò, tɔ̀ʼ kwò sugho alekùu kɔlɔ̂ tsughu ghue u wə̄n. À è lo mò ù lǒ ghùw ù tsəghatsəgha, zɔlɔ sùghò, tɔ̀ʼ kwò sugho ghəa ù tiso ghuw kə ebwìi kə wə̄n ko a te.

⁹ Ù kì aletɔ̀ʼɔ̀ kwuū tsʉ̀ è dzûŋ zəla ghe fə̀ zoʼn wə̄n a te, tò ù è lo aletoōn ndûuŋ ndûw ghì à li gho an tsʉ̀ è səŋò e te zo, ù e lo sugho alekomsô ghì ghəla ghe tuū maʼn tsʉ̂ è dzûŋ e te zo.

¹⁰ Ŋ̀ ghəa ghən kə̂aa bòʼ ndə̀mà tə aghì tə̀ lo nû ghe tuū mâʼn êsəŋò, ghî ghəla ghe kə̂aa kaāŋ zuum tə aghəa to, fɔɔ kaaŋ sùghò tɔ u aghì an làʼsò zəla ghe kəaa ghè zò, a ka dɔ̂m tàŋ ghî ghəla ghe teē tən tsughu ko am bùghoo kə Tə̀dzûu kən enyəa to ghe mô tèlè sùghoo tsughûu tiigh kə ghûw.

¹¹ Ghù kì aleghəə̄ŋ tsughu enyəa ghe bughū naŋâ shwaʼ ù laʼsō u ghee u te wo, nu ghe saʼà màʼn kàâŋ ndughu tə aghì enyəa ghe ka kele dzə̀ êsəŋò. Ghe fɔ tə aghəa tən fɛ ghəəŋ kaaŋ ko ghe sô səā â sə gho aŋ ghəa a ukʉ̄a.

¹² Ghùw ù Kə̀lêt ù lì, mò à fə̀ lo ghùwshʉ̀ghà am bvʉa e ghee mafə̄ bûʼ dzɛ̂ sùghò enyəa, “Kə̀letàn tə̀ tughu lò tsəgha ghî ghə agha, ŋgee zəa sùghò mo ghe lɛɛ nù, lò sugho nyôm tə ŋgwə̄n tə̀ biigh to.”

¹³ Shwaʼ u ghùw ù Kə̀lêt wən lo èsəŋò. E fi lo enyəa ghù è komso təla nduw ghee an sə kə ghee, aleghəŋlo enyəa boo e ghee aŋ ghəa a Kəzə̀ lo bughò teme, zə e tughuu sugho,

¹⁴ to ghe e ka zyəən kaaŋ tsəgha zə̀azə̀a mə̀ àgha məla Dzûu tə̀ bughòon səā kɔʼɔ̄, bwìi sùghò yò an lwàŋ u aghì ghəla ghe tuū maʼn êsəŋò.

¹⁵ Ghî ghə̀là ghe ki fə̂ŋ tə̀ zɔlɔ to, ghəa ghə̀n à dzə̀m zɔ̀lɔ nù â ghee. Yia a bughò ghəla ghe fwəlà luʼū to, boom fughuu ndùw sùghò yò, aghəa a dzə̀m â ghee lo à dzəa gho; tɔŋlo enyəa moʼnlò e ghee e bûʼ fwə̀n lò sugho nû, àsùghò fə̀ŋ tə ghee to.

¹⁶ Ghe dzâa wò alo edzughu enyəa ghe ŋge kwo Kəzə̀, ghe yia kuūwn tuū maʼn Zə̀ kò aŋ ghəa a ghee à ghəəŋ gho. Mwam e ghee e dzəa nù, ghe zuuw yo â Zə̀ kò, ghe tsô bùʼ yò sughò aleghə̂əŋ ghəa è dzûŋ è li zo.