Filemùn 1 - To kə Kəzə̀ kə̀ Fughu ko

¹ À lò mugho Pôl, Ǹ tɔɔ wo mwàʼsò kən ko, mùghò wəla Ǹ lo ghùw ù ndùghùtsāʼ bòʼ fwàʼ kəla M̀ fwaʼa â Kə̀lestò Yɛso. M̀ mwàʼsò kən kə tɔɔ wò ghaʼ à wàazə̀ ù sɛ̀ wən Timotì, ghàʼ tɔɔ wò ghǔ a waʼawāʼ Filemùn, ghù wəla sɛ̀ fwaʼà dzəŋlō a dzə̀m,

² Ghǎʼ mwàʼsò kən kə dzeŋe tɔɔ wò sùghò ghɛ̀ à ghê Afìaa wàazə̀ ù sɛ̀ ù zən vʉ̀ ghèe ghê Achippùs wəla ù lò sugho sùghugòʼ am fwàʼ kən tò ghaʼ àsùghò â ghì a Kəzə̀ yia ghe bughò dzeŋe fia a lô ghù an ndughu a Filomùm.

Pôl kɛ̌ɛ Filomùn am fəŋ zəla ù gaʼ tsughu a zəŋò Zə̀ kò

³ Ŋ̀ gɔ̂ŋlò enyəa to Kə̀zə̀, Tsele ù sɛ̀, ghèe Mughubè ù sɛ̀ Yɛso Kə̀lestò, mò dê ghɛ̀ â dzɔ̀ e ghee zo, ghe fughuu sughò ghɛ̀ â bughuun zo.

⁴ Waʼawāʼ, M̀ fughuu kə̀zɔ̀ŋlò â Zə̀ ko nəgha tən tə dzə̀m abugho Ǹ zə̂əŋ tsughu ghû aŋ gɔ̀ɔŋ zaŋa.

⁵ Nu Ǹ zuuw nù ləgha zəla ghù ki a zəŋò ghì a Kəzə̀ ghò a dzə̀m, yìa Ǹ zuuw sugho aŋghəa ghù gaʼ fə̀ŋ a te a zəŋò Mughubè Yɛso.

⁶ Ŋ̀ gɔ̂ŋlò enyəa aŋghəa sɛ̀ bwîi ghuw ko kə mɔ̀ʼ am fə̂ŋ zəla sɛ̀ gaʼ tsughu a zəŋò Kə̀lestò, to ghəa a te a mô ghə̀ŋlo sɛ̀ e tɔʼɔ zuuwkɛlɛ tsughu ghəa à dzûŋ ghəla à dzə̀m sɛ̀ ki aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò.

⁷ Ŋ̀ wàazə̀, ləgha zəla ghù ki ghè zò ŋ ghəŋlo yìa Ŋ̀ ŋgeē duʼnlō, fə̀ŋ zaŋa zə̀ è zʉ̀ʉn dzɔ̂ɔ sugho bòʼ ghù n təm tsaʼ kə̀ saa ko am fə̀ŋ tə wɛ a Kəzə̀.

Pôl bùʼu ndùw kə̀ kəghu an tuw kə Omnɛsimùs

⁸ Aŋghəa Ǹ lô fəgha ko kə mɔ̀ʼ ghàʼ à Kə̀lestò, Ŋ̀ ki nu dò kə fə̀ŋ kə te ko aletsə̀ghàsò tsughu kəlâŋ enyəa ghù ghəəŋ nduw ghəa zəla e lo ghè zò,

⁹ ghəa Ǹ sô ləghaa ghû, zə lo e ghee Ŋ̀ kuūwn buʼu wô ghû â ghu ko, mùghò Pôl tò noo kə te ko, kəla kə lô sugho ezəŋ an ndùghùtsaʼ aŋ ghəa e Kə̀lestò Yɛso.

¹⁰ M̀ buʼu wò kə̀ghu â ghù an tuw kə wɛ waŋā wə̄n tɔɔŋ Omnɛsimùs, wəla M̀ bughò doʼò kɔʼ tsele aŋghəa Ǹ lo fɛ an ndùghùtsaʼ.

¹¹ Ù mò buʼ ki tsəgha yo fwàʼ kò â ghù, yia a kuūwn bughò êzə̄ŋ vʉ̀a ù lò aletumso ghàʼ à ghù.

¹² Ǹ tuu wò wən ebàm a vʉ̀a ghù, ghù è kwo enyəa M̀ fi tuu wò fə̀ŋ zaŋa.

¹³ M̀ mô lə̀ghàa enyəa to ù mò doʼò tsughu fɛ ghàʼ à wə̄n, ù è yosō mugho an tuw kə̂a aŋghəa Ǹ lô fɛ an ndùghùtsāʼ bòʼ Ǹ zughoo làbəlà è dzùŋ è te.

¹⁴ Yìa Ŋ̀ kuum dzɛ̂ enyəa Ǹ yo dzə̂ aleghəŋlo êzə̀ mò ghù kwò yo, e kwo e lô so e lo tò Ǹ tsəən tsùghù nû ghû aleghəŋlo êzə̀. Ǹ ləghaa enyəa ghù e ndzəma ghəən tsughu ghəa zo aŋghəa fə̀ŋ zə̀ghà dè tsughu. E fi lo enyea Ǹ yo aleghə̂əŋ ghəa è li zo mò ghù kà bǒo dzə̀.

¹⁵ Zən lo e ghee ù fə̀ nyɛʼɛ ti nughù tsughu a vʉ̀a ghù aŋ kə̀mà fə enə̀gha fə̀ li fo, enyəa ù kè kôom bughò doʼò təla wô ghɛ̀ a wə̄n,

¹⁶ mò ghù kà wə̄n kôom nì tò kəkɔ̂, mò ù ŋ kɔ̀ kə tsəghàsə, ghù ke ni naŋa wo wə̄n tǒ wàazə̀ ù sɛ̀, wəla sɛ̀ ləghaa. Ù lò kɔ kə ghûw â mùghò, vʉ̀a ù lò kɔ kə ghûw kò â ghù tsə̀ghàtàʼà aŋghəa ù lo â mùghò. Ù kə lò â ghù tǒ ghùw ù kəfwàʼ àsùghò wàazùghù aŋghəa ghɛ̀ a ghee lô fəgha ko kə mɔ̀ʼ ghɛ̀ à ghê Mughu ù te.

¹⁷ Abugho ghù nì mugho enyəa ghàʼ à ghù fwàʼà dzə̌əŋ nù, ghù kpeni wə̄n tò aŋghea ghù lò alekpeēnî mùghò a te.

¹⁸ Abugho ù ki ghû a ndàŋ kò ŋkāa ù ghəə̄ŋ boon ghù â ghəa è li zo, ghù tɔm naŋa tsughu an zən zaŋā.

¹⁹ À lò mugho Pôl Ǹ tɔɔ wô mwàʼsò kən ko aŋ ghu kaŋa. Ǹ lo tsəa tsə̀ghà wò nù ghû ebàm â fəgha kəla ù ki â ghù — kuuwn kele tsughu ko enyəa fəgha kəla ghù lǒ ghè ko alo bòʼ mùgho.

²⁰ Ŋ̀ wàazə̀, Ǹ dzɛ̂ enyəa ghù yoso kɔʼ mugho am bàm e Mughu ù te. Ghù tǒ ghùw wəla ù boō fughu sugho â Kə̀lestò, ghəəŋ tsùghù tò fə̀ŋ zaŋa e zʉʉ̄n dzɔɔ̄.

²¹ Ŋ̀ kûum kwò nû enyəa ghù zǔuw nù lâŋ ko, zə lo e gheə aŋghəa Ǹ tɔɔ̄ wo mwàʼsò kən ko â ghùw, kwo tən nû enyəa ghù lo ghəəŋ nù ghəa ghəla M̀ bvʉa wo â ghù, ghù buʼ ghəəŋ tsəghataʼā.

²² Ghəa è li zəa e lô kpeʼe sugho enyəa ghù fəghaan naŋa tsughu mugho â dzughu e ndughu e bwii zo, nu Ǹ chîi tùʼ enyəa Zə̀ kə lo zuuw nù gɔ̂ŋlò e ghɛ̀ a dzə̀m zo, kə lo ghəŋlo M̀ bughò tɛ̂ fì ebàm a vʉ̀a ghù.

²³ Epafəlàs wəla ghàʼ à wə̄n lô fɛ a dzə̀m an ndùghùtsāʼ aŋ ghəa e Kə̀lestò Yɛso fùghù wò ghù â tɔɔŋ zo.

²⁴ Ghê Mâk ghəla ghàʼ à ghee fwaʼà dzəə̄ŋ fɛ a dzə̀m ghèe ghê Àlistakùs àsùghò Dɛ̀mâs àsùghò Lûk fùghù wò sùghò ghù â tɔɔŋ zo.

²⁵ Ŋ̀ gɔ̂ŋlò enyəa, to Mughu ù te Yɛso Kə̀lestò mò dê ghɛ̀ a dzə̀m â dzɔ̀ e wə̄n zo.