Fèlepìan 1 - To kə Kəzə̀ kə̀ Fughu ko

Tɔŋlo e Pôl

¹ À mwàʼsò kən kə tɔm wò mùghò ghàʼ à Timotì, ghàʼ lo ghî a kəfwàʼ a Kə̀lestò Yɛso. Ghàʼ mwàʼsò kən kə tɔɔ wò â ghɛ̀ ghî a Kəzə̀ yi ghɛ̀ lo fi an naʼ e Felèpîi, â ghɛ̀ ghəla ghɛ̀ lô fəgha ko kə mɔ̀ʼ ghɛ̀ à ghê Kə̀lestò Yɛso, àsùghò â tsoʼ tə dzeŋe kə ghì a Kəzə̀ to ghèe ghê ghì ghəla ghe fughuu ghɛ â yòsò zò..

² Ŋ gɔ̂ŋlò enyəa to Kə̀zə̀, tɔɔŋ Tsele ù sɛ̀, ghèe Mughu ù te, Kə̀lestò Yɛso mò fughu ghɛ bughuun zo, ghe dêe sughò ghɛ̀ â dzɔ̀ e ghee zo.

Pôl gɔ̀ŋlò â ghì a wə̄n gho

³ M̀ fughuu kə̀zɔ̀ŋlò â Zə̀ kaŋa ko nəgha tən tə̀ dzə̀m abugho M̀ moʼn tsughu ghɛ,

⁴ àsùghò nəgha tən tə̀ dzə̀m abugho Ŋ̀ gɔ̂ŋlo â ghɛ̀, M̀ bughoo mùgho ŋ gɔŋlò alo eduʼnlo,

⁵ bòʼ yosò zɛʼɛ zəla ghɛ̀ mò fughu â mùghò alenàʼà làbəlà è Yɛso zən, alenìi nughù wô an tsuʼ fə sûesʉ fəla ghɛ̀ fə̀ boō fughu a te tsughu, bùghò tɛ̀ wò êzəŋ.

⁶ Ǹ tɔ̂ʼ kwo nû enyəa Zə̀ kəla Kə fə̀ kaʼ tsughu fwàʼ kə̀ dzûŋ kən a zəŋò ghɛ̀ lo fwàʼà suɛ̀lɛ̀ sə̌a ndùw nù alendùw tâa ndûw an tsuʼ fəla Yɛso Kə̀lestò kè bughoo a te ebàm.

⁷ À lo nu dzɔ̀ â mùghò alekele ŋgòʼ è mòʼn zən a zəŋò ghɛ̀, nu Ŋ̀ ki ghɛ am fə̂ŋ è dzùŋ. Bòʼ enyəa sɛ̀ a dzə̀m dzeŋe dzùghuun dzə̌əŋ dzɔ̂ e Kəzə̀ məla Zə̀ kə̀ fughu â mùghò. Tò êzəŋ wəla Ǹ lo mo ghe kùm nàŋa mugho alo tətsaʼ aŋ kwə̀n ŋkāa tò an ti kə̀là mùgho mò ki daʼa ko kə̀ŋlò làbəlà è dzùŋ è Yɛso àsùghò aleteso dzaā wo enyəa zə̀ è ki zən ko.

⁸ Nu Zə̀ kə̀ kwo nû enyəa ləgha zəla Ŋ̀ ki a zəŋò ghɛ̀ lò zəla Yɛso Kə̀lestò ki sugho a zəŋò ghɛ̀.

⁹ Ŋ̀ gɔ̂ŋlò enyəa to ləgha zə eghùe zɛ̀ʼɛ e mô nǒom ndùuŋ ndùw àsùghò tɔ wɛʼɛ ù zuuwkɛlɛ wə aghəa ghəla a lô è səŋò àsùghò enyəa ghɛ̀ e lo alekwo ghəa è səŋò zo a zəŋò è biigh zo,

¹⁰ tò ghɛ̀ e ke lo alekwo ghəa zəla e dzɔ̂ tsəgha. Ghɛ̀ e ke lo ghî à zɔlɔ gho, mò ghe e yo alesaʼ ghɛ aŋ ghəa è li zo

¹¹ Yɛso Kə̀lestò kè ghə̌əŋ sùghò nù mughù zɛʼɛ zə e ke lo è dzûŋ zò, zəla e ki kɔʼso mò à kəma mò â Zə̀ kò.

¹² Waazə̂ ghaŋa gho, Ǹ ləghaa enyəa ghɛ̀ kele tsughu enyəa, fəgha kəla kə sə a zəŋò mùghò ŋ kùum ŋgè yòsò aleghəŋlo enyəa to làbəlà è dzùŋ mò noō ndûuŋ ndûw â sə ko.

¹³ Tɔŋlo enyəa, gbè tə tɔʼ tə dzə̀m an Lumà, àsùghò ghì ghò a dzə̀m fɛ kwo nû enyəa M̀ fɛ aŋ kwə̀n lǒ zuŋufia Ǹ lô kɔ̂ɔ fə Kə̀lestò fò,

¹⁴ Doʼò zaŋa aŋ kwə̀n zəa e dzə̂n tsughu sughò fə̂ŋ tə ghì ghə̀là ghe boō fughu â Mughu ù te enyəa ghe e ki fə̂ŋ to aleŋgee naʼn nduw shwaʼ u Kəzə̀ wò mo ghe ki yo tsəŋ zo.

¹⁵ À lò nû èsəŋò enyəa ghî à li a naʼn wò tùm è Kə̀lestò à mʉ̌ʉn ko alo tə fə̀ŋ, bwìi wò sùghò an tàaŋ tə efwe tə waazə̂, ghî à li yia kuūwn naʼn wo làbəlà è te am fə̂ŋ è tə̀ dzùŋ tò.

¹⁶ Ghî a fə̀ŋ tə̀ dzûŋ ghən a fwaʼà wò alo eləgha, bòʼ ghe kwo nû enyəa Mughu ù te nì wò alekə̀əŋ làbəlà è dzùŋ è te.

¹⁷ Ghî à loʼ a yi naʼn làbəlà è dzùŋ è Kə̀lestò am mòʼnlò e ghee è biigh zo, ghe sô moʼò enyəa ghe lo aleghəŋlo mùghò è ŋgee zuuw fɔɔn zo aŋghəa Ǹ lo aŋ kwə̀n.

¹⁸ Zə ndoʼò mòʼn dzə̀ yò ghəa è li zo, ŋkāa ghe naʼn tùm è Kə̀lestò mo ghe ki moʼnlò è biigh zo ŋkāa moʼnlò è dzûŋ zò, ghəa è səŋò è lo ko a te enyəa ghe n tùm è Kə̀lestò naʼà. Zə̀ lò e ghee Ǹ duʼnlō, mò Ǹ lo tsò nǎam ki ko aleduʼnlo,

¹⁹ E lo nû èsəŋò enyəa Ǹ lo naam ki nû aleduʼnlo, Ǹ sô kwo enyəa gɔ̂ɔŋ zɛʼɛ àsùghò daʼa kə Yɛso Kə̀lestò kò lo bəghaasəa nù mugho.

Mughu e Pôl a zəŋò Kə̀lestò

²⁰ Ləgha zaŋa, àsùghò mòʼn zaŋa zo, lo enyəa, e kwo ko Ŋ̀ kê bvʉ̂a kôʼ am fwàʼ kaŋa, à è tsoo səasəa êzə̄ŋ a, àsùghò an nə̀gha tən tə̀ dzə̀m à, to Ǹ lo e ki fə̀ŋ, ghue waŋa u dzə̀m wə̀ è fughuu sugho kɔʼso mò â Kə̀lestò, ŋkāa Ǹ lo â səa à tughu gho ŋkāa M̀ kpuw ko nû.

²¹ Tɔŋlo enyəa, â mùghò alemùghù, à lǒ bòʼ Kə̀lestò, vʉ zəa e bûʼ lô namso ko.

²² Abugho à bùʼ lò ko alemùghù aŋ gwə̀n e ughùe, à nǎam lò ko fwàʼ kəla kə tsəā â mùghò, alefwaʼā â Kə̀lestò. Yìa à sò lô ko enyəa, Ŋ̀ kwo dzə yo kəla kə tsəghà sə kə̀ li ko.

²³ M̀ fɛ êzəŋ ti an tsə̀tèʼè fə ghəa a te gho a bə̀ghà. Ŋ̀ ŋgee ləghaa nù alenùghù ndûw doʼò ndûw ghàʼ à Kə̀lestò, bòʼ e dzɔ̂ tsə̀ghà àghəa à dzə̀m — alendùw doʼò a vʉ̀a Yɛso.

²⁴ E dzɔ̂ɔ nù enyəa to M̀ mô kuūwn doʼò â tuw ko am bàm zɛʼɛ̄.

²⁵ Ŋ̀ kûum kwò nû enyəa Ǹ lo dòʼn dòʼn nù, aleghəŋlo enyəa ghɛ̀ noo nduw am boo zəla ghɛ̀ ki àsùghò an duʼn kəla ghɛ̀ ki aŋ ghùe zɛʼɛ̄.

²⁶ To abugho Ŋ̀ kê lo sɛ̀, bughò zaŋa ebàm a fìa vʉ̀a ghɛ̀ è ke lo soo kə eghəa kəla ghɛ̀ fughu kɔʼso mò a te â Kə̀lestò Yɛso.

²⁷ Ghəa è səŋò zə èzəŋ e lo ko enyəa, ŋgòʼ è dzì zəla ghɛ̀ mughu a te ki alelo fəgha kəla làbəlà è dzùŋ è Kə̀lestò dzâa ghè kò, enyəa abugho M̀ bùghò kôʼ ko ghɛ ŋkāa M̀ bûʼ buw ko alebùghò kòʼ ghɛ̀, mùghò è ke lo alezuūw wo enyəa ghɛ̀ kûum tì nû alo kəfəgha kə mɔ̀ʼ, àsùghò enyəa am fə̂ŋ e mɔ̀ʼ, ghɛ̀ è dəma alekwuū kelè boo zəla ghɛ̀ zoʼn kɔʼ an làbəlà è dzùŋ è te.

²⁸ E kwo ko ghîikətuw ghɛʼɛ̄ a lô so e beme tsughu ghɛ̀, ghɛ̀ nughu tsəŋ doʼo nduw. Zən kè lǒ tsə̌a aledèe tsughu â ghîikətuw ghɛʼɛ gho enyəa ghe lo bvʉ̀a kòom nù, Zə̀ kə̀ lo ghəŋlo ghɛ̀ zə tuw ko.

²⁹ Tɔŋlo enyəa, Zə̀ kə̀ kâ ka dè ko ghɛ â dzɔ̀ e wə̄n zo enyəa ghɛ̀ boo ko â Kə̀lestò, à lò sughò enyəa ghɛ̀ ki alefaan sugho bòʼ wə̄n.

³⁰ Ghɛ mô èzə̄ŋ nyə sùghò an tsù wəla ghɛ̀ fə̀ bugho ghà n zuuw wò aŋghəa Ǹ dəmà a te alekə̀əŋ làbəlà è Kə̀zə̀, àsùghò aŋghəa ghɛ̀ koʼô wo Ǹ naām dəmà ko êzə̄ŋ a te.