Efɛsùs 1 - To kə Kəzə̀ kə̀ Fughu ko

Etɔŋlo â ghì ghə Efɛsùs ghò

¹ À mwàʼsò kən kə tɔɔ wò mùghò Pôl, mùghò tum è Kə̀lestò Yɛso zəla Zə̀ kə̀ mò tsɔʼ kɔʼ. M̀ mwàʼsò kən kə tɔɔ wò â ghɛ̀ ghî a Kəzə̀ ghəla ghe gaʼ tsughu fə̂ŋ tɛʼɛ to â Zə̀ kò am mùghù zɛʼɛ àsùghò aŋghəa ghɛ̀ lo alo kəfəgha kə mɔ̀ʼ ghɛ̀ à ghê Kə̀lestò Yɛso an naʼ zə Efɛsùs.

² Ghàʼ gɔ̂ŋlò enyəa to Tsele ù sɛ̀ Kə̀zə̀ àsùghò Mughùbè ù sɛ̀ mò fughu ghɛ â bughuun zo, ghe dêe sughò ghɛ̀ â dzɔ̀ e ghee zo.

Bughuso zəla sɛ̀ kele bòʼ sɛ̀ lo kəfəgha kə mɔ̀ʼ sɛ̀ à ghê Kə̀lestò

³ Kɔʼso n lo à Zə̀ kò, Tsele ù Mughùbè ù sɛ̀ Yɛso Kə̀lestò, wəla ù fughu sɛ̀ a bughuso e shʉ̀ghà zò mo e nùghù wò alo kəwālā aŋghəa sɛ̀ à ghê Kə̀lestò lò fəgha ko kə mɔ̀ʼ.

⁴ Zə̀ kə mǒ sɛ̀ ki shiāa nû to kə e bughò gbə̂n mbī, enyəa sɛ̀ è lo ghî a wə̄n gho aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò, mò sɛ̀ ki yo nùʼ tò, lò sugho ghî à zɔlɔ gho an sə kə wə̄n. Zə̀ kə̀ ləghaa sɛ̀,

⁵ zən lò e ghee Zə̀ kə fə̀ ki foʼ naŋā enyəa sɛ̀ e ke lo wɛ a wə̄n gho am bàm è Yɛso Kə̀lestò, bòʼ enyəa à fə̀ lo fəgha kəla Zə̀ kə fə̀ tsə̂m tsughu alefwàʼ ghè kò am fə̂ŋ e wə̄n e dzùŋ.

⁶ Sɛ̀ ki alefughuu Zə̀ kò â kɔʼso mò an dzɔ̀ e wə̄n e ne zəla ù ndzə̀əm dê wo â sɛ̀ am fwàʼ kəla Wɛ ù wə̄n ù tsuʼu fə̀ fwaʼ ghè kò.

⁷ Tɔŋlo enyəa à fə̀ lo aŋ kàŋ tə Yɛso təla tə fə̀ tsughu tsughu alo kədàŋlo Zə̀ kə fə̀ zue sə wo sɛ̀ a te; mo e fi lo enyəa Zə̀ kə̀ mafə bôo tə sɛ̀ tə ghuuw màʼà bòʼ dzɔ̀ e wə̄n e ne zən,

⁸ dzɔ̂ zəla kə fə̀ tso mwâʼ dê wo â sɛ̀ an tɔ e wən e dzə̀m àsùghò aŋghəa kə kwo ghəa gho a te.

⁹ Zə̀ kə̀ ŋ ghəəŋ tsughu ghea ghəla kə fə̀ fôʼ naŋā, nì dè wò sɛ̀ â nàn kə eghəa kəla kə fə̀ tsə̂m kɔʼ am bàm e Kə̀lestò.

¹⁰ Ghəa ghən a dzə̀m kè səa an nə̀ghà zəla Zə̀ kə̀ fə̀ môʼ naŋā, alenìi təmadzə̄əŋ wô ufʉgha u dzə̀m alo kəfəgha kə mɔ̀ʼ, alo kəwālā àsùghò aŋ ghueetsə̄, mò Kə̀lestò lo kətuw aŋ ghəa a te gho a dzə̀m.

¹¹ Aghəa a dzə̀m bɔ̌ɔm bwìi ko aŋghəa Zə̀ kə̀ fôʼ naŋā a te, kə n shîaa kɔʼ ghaʼ enyəa a e lo fəgha ko kə mɔ̀ʼ ghàʼ à ghê Kə̀lestò, aŋghəa Ù fə̀ fôʼ naŋā enyəa zə lo êzə̀.

¹² To sɛ̀ ghəla a fə̀ lô ghî a kəsə gho alechiī tùʼ a zəŋò Kə̀lestò Yɛso è fughuu Zə̀ kò â kɔʼso mò bòʼ an səghanyəgha ŋ wə̄n.

¹³ Kə̀lestò n dê wò sùghò ghɛ̀ â səŋò zò, mò à lo làbəlà ê dzuŋ zəla è zoʼn ghɛ an dzì zəla ghɛ lô alezə kətuw a te. Ghɛ m boo fughu ndùw â Kə̀lestò, Zə̀ kə̀ fughu wò ghɛ̀ â zuʼ tə zɔlɔ təla Zə̀ kə fə̀ to naŋa, aledè tsughu enyəa ghɛ̀ e zəŋ lo ghî a wə̄n.

¹⁴ Zuʼ tə̀ Zɔlɔ tən tə lo tsə̌a aledèe tsughu enyəa sɛ̀ lo kele mɛʼn nu fʉgha wəla Zə̀ kə fə̀ to naŋā â ghì a wə̄n gho a dzə̀m alebùghò tâa wô an tsuʼ fəla kə kê bəghaasəa ghî a wə̄n gho a te. Zə̀ kə fə enyə ghəəŋ tsughu enyəa sɛ̀ è fughuu kɔʼso mò â wə̄n bòʼ ghaʼ e wə̄n.

Pôl gɔ̀ŋlò an tuw u ghì ghəla ù tɔɔ̄ nduw mwàʼsò ko â ghee

¹⁵ À lǒ bòʼ ghəa ghən à dzə̀m Zə̀ kə lo mo kə m fwàʼ àsùghò alekaʼā nughù wô aŋghəa mùgho mò zuw tsughu fə̀ŋ zəla ghɛ̀ gaʼ tsughu a zəŋò Mughu ù te Yɛso àsùghò ləghaa zəla ghɛ̀ ki â ghì a Kəzə̀ gho a dzə̀m,

¹⁶ Ǹ lo mò Ŋ̀ kaām bughu naŋa kòʼ tsəgha alefughu kəzɔŋlò â Zə̀ kò an tuw wɛʼɛ. Yìa Ŋ̀ gɔ̂ɔŋ sugho an tuw wɛʼɛ nəgha tən tə dzə̀m abugho Ŋ̀ gɔ̂ŋlo,

¹⁷ enyəa Zə̀ kə Mughùbè ù sɛ̀ Yɛso Kə̀lestò tɔɔŋ Tsele ù sɛ̀ ù ghàʼa mô fughu ghɛ â Zuʼ tə̀ Zɔlɔ təla tə ghəŋlo enyəa ghɛ̀ e ki tɔ wo, tə ni dêe fughu wô fəgha kəla Zə̀ kə̀ lo ghè ko tò ghɛ̀ tɔʼ kele tsughu wə̄n.

¹⁸ Yìa Ŋ̀ gɔ̂ɔŋ sugho enyəa to Zə̀ kə mô tsʉ tuw wɛʼɛ, ghɛ̀ zuuwkɛlɛ tùʼ zəla ghɛ̀ chiī ghè zò aŋ ghəa zəla Zə̀ kə mò tɔ̀ŋɔ ghɛ̀ a tè, àsùghò enyəa ghɛ̀ e kwo sugho namso kə wə̄n kə̀ ne kəla ù fə̀ to naŋā â ghì a wə̄n à dzûŋ ghò,

¹⁹ Ǹ ləghaa enyəa ghɛ̀ kele tsughu sugho enyəa daʼa kə wə̄n kə̀ ne kəla kə ghaʼ tsəgha dwaʼa wo u dzə̀m alo kəwālā kə fwaʼā a zəŋò sɛ̀ ghəla à boō fughu a wə̄n. Kən lò daʼa kə wə̄n kə̀ ne ko,

²⁰ kəla ù fə̀ dê tsughu aŋghəa ù fə̀ zôm nughù kɔʼ Kə̀lestò alo evʉ̄, nì dòʼsò nàŋa tsughu wə̄n an kwe u wə̄n ù təma wo alo kəwālā.

²¹ A fughu alo kəwālā, Kə̀lestò tsə̀ghàtàʼà sə dwə̀ŋ wə̄n ù dzə̀m, dwaʼa u wə̄n vʉa u tsə̀ghàtàʼà sə dwaʼa wo ù dzə̀m, kwù è wə̄n zəa è tsə̀ghà taʼà sə kwu tə udwə̀ŋ wən u dzə̀m, zən e Kə̀lestò zəa e ghaʼ tsəghàtaʼā zən ghən a dzə̀m am mbī zə̄n àsùghò an mbī zəla è ki alebùghò.

²² Zə̀ chia kə nî naŋā tsughu fʉgha wo u dzə̀m a tsəlà wə̄n, chia kə naŋā tsughu sughò wə̄n tò kətuw alo ufʉgha u dzə̀m an dzɔ̀ e ghì a Kəzə̀

²³ Ghî a dzeŋe kə ghì a Kəzə̀ a lo tò gwə̄n e ughùe e Kə̀lestò, à bɔ̌ɔm lue kpeen tsughu ko wə̄n a te, wən wəla ù lue kpeen kaāŋ wo alo ufʉgha u dzə̀m.