Dzɛ̂ms 1 - To kə Kəzə̀ kə̀ Fughu ko

¹ À lò mugho Dzɛ̂ms, Ǹ tɔɔ̄ wo mwàʼsò kən ko, M̀ fwaʼà a tsəlà Zə̀ kò ghèe Mughu ù te, Yɛso Kə̀lestò. M̀ mwàʼsò kən kə tɔɔ wò â ghɛ̀ ghî a Kəzə̀ ghò tɔ̂ɔŋ ghì ghə Ezə̀lɛ̂ ghə̀là ghɛ̀ sɛ̂ɛ mughùu kaāŋ nduw aŋ kàlà tə mbī e dzə̀m. Yia M̀ fughuu wô ghɛ â tɔɔŋ zo.

Eboo àsùghò tɔ zo

² Waazə̂ ghaŋa gho, nǐi tsughu nlò enyəa à lò ghəa è duʼn zo abugho ghəa a mɔ̂msò kaāŋ ghɛ,

³ nu, ghɛ̀ mgbaŋ kwo nû, enyəa abugho ghəa a mɔ̂msò fə̂ŋ tɛʼɛ to, ghəa a te a fi ghəŋlo enyəa ghɛ̀ zoʼn tsughu aleka ezə.

⁴ Ghɛ̀ ka tsughu ko nlò zə zo êzə̀, tò ghɛ̀ noo kpe tsughu, fə̂ŋ tɛʼɛ tə nɛɛ̄ tsughu, ghɛ è laʼa yo fəgha kə̀ li ko.

⁵ Abugho ghùw wɛʼɛ ləghaa alekele ùtɔ [am fəgha kəla Zə̀ kə̀ ləghaa], ù m bvʉ̀ ndùw â Zə̀ kò, Zə̀ kə̀ sô fùghuu nù, tɔŋlo enyəa, Kə bughuu â ghu ko, fughuu ghì ghə̀n à dzə̀m â fʉgha wo mò Kə sə̂əm yò.

⁶ Mò ghùw nɔ̌ɔ kə̀fəgha, ù ka e foʼō nɔɔ dzə, ù ŋ kuuwn nɔ̀e ndùw am fə̂ŋ è wə̄n e dzə̀m, tɔŋlo enyəa ghùw wəla ù fòʼò nɔɔ̄ fəgha ko â Zə̀ kò lǒ ko tò kətùŋutùŋu kuɛ̀ɛ kə tùuŋ kaŋlo an dzùghùntsòʼ.

⁷ E kwo ko ghùw ù te lô lɛɛ̄n moʼnlò enyəa e lo alekele kə̀fəgha aŋ ghùu Mughu ù te;

⁸ tɔŋlo enyəa ù lǒ ghùw wəla ù ki ndzùghùun kə emòʼn kò, màʼn tsùghuu yo ghue wo aŋ ghəa a wə̄n à ghəəŋ gho.

Elɛ àsùghò kum zo

⁹ Abugho wàazə̀ wɛʼɛ ù lì am bvʉa zɛʼɛ̄ laā, ù kì aletsɔɔ̄ fə̀ŋ enyəa Zə̀ kə̀ ŋ wən kɔʼso naŋa.

¹⁰ Ghùw ù kǔu e tsɔɔ̄ sugho fə̀ŋ enyəa Zə̀ kə ŋ wə̄n etsən tsughu naŋā, nu ù lo tsə̀ghàa mìaan ko tò ghê kə ŋgwə̄n ko.

¹¹ Aŋghəa tsə̀ səā kɔʼɔ̄ wo, zə̀ n nûu ènyə baaŋ, zə̀ ŋ gwə̀nsò màʼà tsùghù ghê kə te ko, saŋ tə kəghè tə te tə n tsɔʼn bvʉ̀ è tsughu, kôʼ e kəghè e te zə n laa è tsughu, ghùw ù kùu lo kpuuw sùghò êzə̀ aŋ ghəa a wə̄n a mbī gho.

¹² Dzɔ̀ lǒ â ghùw wəla ù ka tsughu zə zo abugho ghəa a mɔ̂msò kaāŋ wə̄n, tɔŋlo enyəa abugho ù ghaʼ tsughu ghəa a te gho, ù lo zə e tsɛlɛ̀ aŋghəa Zə̀ kə fə̀ to naŋā â ghì ghəla ghe ləghaa wə̄n.

¹³ E kwo ko ghùw ù lì lô dzâa enyəa, à ghee tsoom Kə̀zə̀ abugho ghəa à biigh a tsoōm wə̄n, nu ghəa è biigh è loʼ e yo aletsoom Kə̀zə̀, Zə̀ kə̀ tsoom sùghò yǒ ghùw.

¹⁴ À ghùw lǎam nɔɔm nùghù kɔ̀ʼɔ̂ ghəa à biigh ghəla ghùw ù te ləghaa, ghə n tsoom kaāŋ wə̄n.

¹⁵ Abugho ghùw tsə̀ghà təŋò tsughu am mòʼnlò e wə̄n è biigh zo, ghəa a te yia nyə tughu tsughu a zəŋò wə̄n, ù ŋ ghəəŋ tsughu ebo, a m bùghò bo e te zə a e tsə̀ghàsə bəŋ ko, vʉ zə n nì ghùw ù te.

¹⁶ E kwo ko fəgha kə lô tsêe ghɛ a waazə̂ a fə̂ŋ ghaŋa gho.

¹⁷ Ghəa à dzûŋ ghò a dzə̀m àsùghò ghəla a lô tsəghatsəgha, à fùghuu tsughuu wò Tsele ù te wəla Ù bɔm zuw zo. Aŋ wə̄n, fə̀ŋ è wən kuuwn tsə̀ghà yò, ghəa è li e yo sugho a zəŋò wə̄n e lo alenìi wô kə̀ləm.

¹⁸ À mò tsə̄m tsughu Kəzə̀ enyəa sɛ̀ doʼò tsughu wɛ a wə̄n, an shwaʼ u wə̄n ù səŋò wəla sɛ̌ fə̀ zuw, enyəa sɛ̀ doʼò tsughu kətuw am fʉgha u wə̄n u dzə̀m wəla ù mò gbə̂n wo.

¹⁹ Waazə̂ ghaŋa gho, Ǹ ləghaa enyəa ghɛ̀ kele tsughu ghəa ghən gho, tò chìa è mbaa zuuw niī ghəa zo, tò ù è ka e chwaa kəaa ghəa gho, ù e ka è laŋā pfʉso sugho nʉghà wò.

²⁰ Tɔŋlo enyəa nʉgha ù pfʉa u ghəəŋ nù ghùw ŋ ghəəŋ yo ghəa a tsəghatsəgha ghəla Zə̀ kə̀ ləghaa.

²¹ À fi lo enyəa ghɛ̀ ki alezə̀ghàa maʼà dzə̀adzə̀ tə bòobò tə aghəa tɛʼɛ̄ tə te to, ghɛ̀ ni ŋgɔɔm naŋa wo shwaʼ wəla Zə̀ kə̀ dzə̂n naŋā am fə̀ŋ tɛʼɛ, mo u ki kədaʼa alebəghaasə ghɛ.

²² Kà nlò doʼò tsùghù dzə̀ ghî ghəla ghe tsêe ghue e ghee zo alezūuw ko ghəa gho an utùŋlō, kuuwn dòʼo tsughu nlò ghî ghəla ghe fwaʼà fəgha kəla shwaʼ u Kəzə̀ u dzâa ghè kò.

²³ Nu ghùw wəla ù zəə̄n ko ghəa gho an tùʼ è zəən zo mo ù fwàʼà ndùw yò fəgha kəla ù mò zuw, ù lo ko tǒ ghùw wəla ù lɛɛn nyəā ndûw ghue u wə̄n wò alo kəlùwŋgɛ̀lɛ.

²⁴ À m bùghò ù lɛɛn tsughu ghue wò, ù nùghù tsughu a fughu, ù n daŋso kòom nìzə̀ tsughu kôʼ e wə̄n ebàm.

²⁵ Abugho ghùw kuuūwn tɔ̂ʼ naŋa tsughu tuw ko an làŋ kə̀ səŋò kò, lâŋ kəla kə bəghaasəa ghî ghò, Zə̀ kə̀ lo bughuso nǔ ghùw ù te, abugho ghùw ù te fwàʼà səā ndûw ghəa a te gho mò ù zə̌ən ko yo (ghəa ghəla lâŋ kə te deē) an tùʼ è zəən zo, nìi zə̀a ndùw.

²⁶ Abugho ghùw tsêe kaāŋ ghue u wə̄n wo enyəa e lo ghùw ù Kə̀zə̀ mo ù nàŋso yo nom kə wə̄n ko, ghəa a Kə̀zə̀ a wə̄n a te ghə ŋ kwuu yo ghəa zo.

²⁷ Ghəa e Kəzə̀ zəla Tsele ù te, Kə̀zə̀ nìi enyəa e ki yo dzʉ wo, zəa e lô tsəghatsəgha lò enyəa; alelɛnlo â waatsʉ gho àsùghò yiikpūw gho am fala e ghee, àsùghò enyəa e kwo ko ghəa a mbī a lô so e dzəso ghùw.