3 Dzɔ̌n 1 - To kə Kəzə̀ kə̀ Fughu ko

¹ Mùghò, Tsoʼ an ndughu e Kə̀zə̀, Ǹ tɔɔ wò mwàʼsò kən ko â ghù a Gayùs, ghù wəla Ŋ̀ kûum ŋgeē ləghaa.

² Fən waŋa ù dzùŋ, ŋgɔ̂ɔŋ zaŋa e lo enyəa to ghəa ghə̀a à mô bwîi dzɔ̂ɔ, àsùghò enyəa ghuūghuè wʉ̂a ù è tughū dzɔɔ̄ sugho, tò aŋghəa tughuu dzɔ̂ɔ sugho am fə̂ŋ.

³ Mugho fə̀ ŋgee duʼn nû aŋghəa waazə̂ a sɛ̀ à li a fə̀ bughô dzɛ̂ wô â ghàʼ enyəa ghù bɔ̌ɔm kùm mùghò ko an dzì è êsəŋò zəla Zə̀ kə̀ ləghaa, yia Ŋ̀ kûm kwo enyəa ghù mùghò êzə̀.

⁴ Duʼn kə̀ ne kə̀ li kə kɔʼɔ yo mugho an ghəa eli zo, tsəghà sə̂a ko yo alezuw enyəa wɛ ghaŋa a bwìi alo êsəŋò.

Dzɔ̌n fughu ukɛɛ â Gayòs

⁵ Fən waŋa ù dzùŋ, fwàʼ kə̀là ghù fwaʼa a zəŋò waazə̂ a sɛ̀ ghò, ghù fwàʼà am fə̂ŋ zə̀gha è mɔ̀ʼ, a ka dɔ̂m taŋ abugho ghù mò bûʼ kwo ko yo ghee.

⁶ Ghe n ləgha zə̀ghà è teso dzɛ̀ fɛ an dzeŋe kə ghì a Kəzə̀. E fughuu ghee â yòsò zò an dzì zəla Zə̀ kə̀ ləghaa, abugho ghe səā bwînlo.

⁷ Tɔŋlo enyəa ghe sə wò alefwàʼ fwàʼ kə Yɛso Kə̀lestò mo ghe boom yo alenì fəgha kə̀ li ko aŋ ghulô ghì ghəla ghe kwo yo Zə̀ kò.

⁸ A fi lo enyəa sɛ̀ ki aletɔɔ̄m ŋgòʼ è ghî ghən tò sɛ̀ lo e fwaʼā dzəəŋ sɛ̀ à ghee alezoʼn nduw ghî ghò aŋ ghəa à səŋò ghò.

Dǐotefès àsùghò Dɛ̀mitiùs

⁹ M̀ maā tɔm wò mwàʼsò kò â dzeŋe kə ghì a Kəzə̀ kɛʼɛ ko, à sò kǔuwn lò ko enyəa Dǐotefìs wəla ù ləghaa tsə̀ghà ko aledòʼò kə̀sə alo aghəa a dzə̀m u kafə tso naŋa tuūŋ ko am fəgha kəla Ǹ dzaā.

¹⁰ A fi lo enyəa abugho Ǹ lo bugho, Ǹ lo teso kɔʼɔ wô tuŋlo u aghì am bòobò tə aghəa təla ù lǒ mò ù ŋ kə̀a kàŋlo àsùghò gha ghəla ù lo mò ŋ kaʼn kaŋlo a zəŋò sɛ̀. Ù kǎa ghəəŋ ko yo ghəa ghən gho, ù tǔu sùghò alekpeē nî ghì ghəla ghe bwìin nyəā wo an dzeŋe kə ghì a Kəzə̀, tsoo bughu naaŋ sùghò waazə̂ à li ghəla ghe ləghaa alekpeeniī wo ghî ghəla ghe bwiīn wo, ù m bùʼ dzùm dàŋso sə ghee a beē.

¹¹ Fən waŋa ù dzûŋ, kà e koʼo niī ghəa è biigh zo, e kuuwn koʼo niī ko ghəa e dzûŋ zò. Ghùw wəla ù ghəəŋ ghəa à dzûŋ ghò, à lǒ wə̄n ghùw ù Kə̀zə̀. Ghùw wəla ù ghəəŋ ghəa à biigh gho kaam kwo yo Zə̀ kò.

¹² Aghî a dzə̀m kɛ̌ɛ Dɛ̀mitiùs, səŋò e sô tsoō dêe sugho ghue wo a zəŋò wə̄n, ghəa a te yia a dêe enyəa ù lo ghùw ù dzùŋ. Ghuūghùe zaʼa zəa e dzâa wô sugho enyəa ù lo ghùw ù dzùŋ. Ghù vʉ̀a ghù ndòʼ kwo sugho enyəa abugho ghàʼ dzɛ̂ wô ghəa zo, e fi lo êsəŋò.

Tɔɔŋ zəla e gûŋso tsughu

¹³ Ŋ̀ ki ndə̀mà tə aghəa aledzɛ̀ wô â ghù, yia Ŋ̀ kuūwn yo aletɔɔ̄ wô ghəa a te gho alo kəmwàʼsò.

¹⁴ M̀ moʼn nù alekùʼn bughò bwîin kôʼ ghù, tò ghàʼ à ghù lo kə̂aa dzəə̄ŋ ndûw aghəa.

¹⁵ Fən ghə̂a ghəla ghe lô fɛ ghàʼ à ghee fughuu wò ghù â tɔɔŋ zo, Tɔɔŋ zuw tsughu fən ghə̂a yia ghe lo fi èzə̀ ghɛ̀ à ghee, fə mɔ̀ʼ fə̀ mɔ̀ʼ. To bughunlo e mô doʼò ghɛ̀ à ghee.