2 Timotì 1 - To kə Kəzə̀ kə̀ Fughu ko

Pôl fùghù ndùw ètɔŋlo â Timotì

¹ À lò mughu Pôl, tùm è Kə̀lestò, Ǹ tɔm wo mwàʼsò kən ko. À mò tsəm tsughu Kəzə̀, kə n tsɔʼ kɔʼ mugho enyəa Ǹ doʼò tùm è Kə̀lestò Yɛso. Kə n tùm sə̀ wò mùghò alezùghò naʼà wô to kəla kə fə̀ to naŋā â sɛ̀ enyəa sɛ kê kelê mùghù è doʼn təla zo aŋghəa sɛ̀ lô fəgha ko kə mɔ̀ʼ sɛ̀ â ghê Kə̀lestò Yɛso.

² M̀ mwàʼsò kən kə tɔɔ wò â ghǔ a Timotì, ghù wɛ waŋā ù tsùʼu. Ŋ̀ gɔ̂ŋlò enyəa to Kə̀zə̀, tɔɔŋ Tsele ù te ghèe Mughùbè ù sɛ̀, Kə̀lestò Yɛso mò dê ghù â dzɔ̀ e ghee zo àsùghò se è kwuso zo, ghe fughuu sughò ghù â bughun zo.

Pôl fughuu zɔ̀ɔŋ kə Kəzə̀, dzə̀là kpèʼe ndùw fə̀ŋ è Timotì

³ M̀ fughuu kə̀zɔ̀ŋlò â Zə̀ kə̀là M̀ fwaʼā a tsəlà wə̄n am fə̂ŋ è zɔ̀lɔ, tò aŋghəa ghê bə̀ghà fə̀ ghəə̄ŋ tsəgha. M̀ fughuu zɔɔŋ kə wə̄n nəgha tən tə̀ dzə̀m abugho M̀ moʼn tsughu ghû aŋ gɔ̀ɔŋ zaŋa.

⁴ Abugho Ǹ tɛ̀ moʼn tughu sə̀ mo èdì mə̀ghà mò, Mùghò m mbuŋlò alekòʼò wo ghù alo esə̄, tò fə̀ŋ zaŋa kôom zʉ̂ʉn tsughu.

⁵ Ǹ tâa mòʼn nù fə̀ŋ zəla ghù kùm gaʼ tsughu a zəŋò Kə̀lestò, tò aŋghəa zughù ù nǒo, tɔɔŋ Lōis ghèe zughùu, tɔɔŋ Yunìs fə̀ gaʼ sugho fə̀ŋ a te a zəŋò Kə̀lestò, yìa Ŋ̀ kwo enyəa ghù gàʼ sùghò fə̀ŋ êzə̀ a zəŋò Kə̀lèstò.

⁶ Zən lo e ghee Ǹ dzâa wô â ghù enyəa, ghù è numso zee namso kəla Zə̀ kə mò fughu â ghù an tsuʼ fəla mugho mò gaʼ wô ghu ghaŋa gho a zəŋò ghù, gɔ̀ɔŋ tsùghù an tuw kə̂a.

⁷ Tɔŋlo enyəa Zə̀ kə̀ ka mo fughu dzə̌ sɛ̀ â fə̀ŋ zəla è ghəŋlo enyəa sɛ̀ è tsəŋo ghəa gho. Kə mò laam fughu sɛ̀ â fə̀ŋ zəla è ghəŋlo enyəa sɛ̀ è ki daʼa ko, sɛ̀ è ləghaa ghue e sɛ̀ zò, àsùghò enyəa sɛ̀ lo alenaŋsô ghuw kə ebwìi kə sɛ̀.

⁸ E kwo ko ghù lò so e də̂nsò kə̀tuw aleteso dzâa nduw ghəa a Mughùbè ù sɛ gho â ghì ghò, e kwo ko ghù lò də̂nsò sugho tuw ko aledzaā nduw enyəa ghù kwò nû mugho wəla N̂ lô fɛ an ndùghùtsāʼ aŋ ghəa e Kə̀lestò Yɛso. Laam təmdzəəŋ wò mugho alefala bòʼ làbəlà è dzùŋ zən aŋghəa Zə̀ kə̀ dzəlà wô ghû â sə̀ŋ zò a te.

⁹ Zə̀ kə mò bəghasə̄ sɛ̀, tɔŋɔ wò sɛ̀ enyəa sɛ̀ è mughu mùghù è zɔlɔ zo. Zə̀ kə ka fə enyə ghəəŋ dzə̀ bòʼ ghəa e è dzuŋ è li zo sɛ̀ fwaʼ â wə̄n. À fə̀ enyə lo ko aŋghəa Zə kə̀ ki fôʼ naŋa aleghəŋlo bòʼ dzɔ̀ e wən zəla kə ki â sɛ̀ mo kə tsəghà tsùghù a zəŋò Kə̀lestò Yɛso.

¹⁰ Yia a kuūwn bugho êzə̄ŋ, Kə̀lestò Yɛso, Bəghambī ù sɛ̀ m bùghò tsʉ̀ dè ghəa ghən gho à dzə̀m. Ù ŋ ghəŋlo, vʉ zəa e kôom ki yô daʼa ko a zəŋò sɛ̀, vʉ̀a ù zoʼn sɛ̀ â làbəlà e dzùŋ, làbəlà è dzùŋ è te zə̀a è dè fughu wo sɛ̀ â fəgha kəla mughù è doʼn təla e lo ghè kò.

¹¹ Zə̀ chia kə shîaa kɔʼ mugho tǒ tum è Kə̀lestò àsùghò tǒ wàdè alezoʼn wo ghî ghò, nàʼn ndùw sùghò làbəlà è dzùŋ è te.

¹² Zən lò e ghee M̀ fanlo enyə a fɛ an ndùghùtsāʼ. Ghəa M̀ buʼù faan ko enyə, Ǹ tsoo də̀nsò yò tuw ko, Ǹ sô kwo ghùw wəla M̀ boō fughu â wə̄n; yia Ŋ̀ kûum kwo sughò enyəa ù lo kwuu kele nù fəgha kəla ù mò fughu â mùghò, alendùw tâa ndûw an tsuʼ fəla ù lo bughoo a te ebàm.

¹³ Tiso kɔʼ tuw kə̀a kò aŋ ghəa ghən a dzə̀m mùgho mò zoʼn ghû a te, ghù e zoʼn nduūŋ nduw ghî à li gho a te. Abugho ghù ghəŋlo êzə̀, tee tən tsughu ko am fə̀ŋ zəla sɛ̀ gaʼ tsughu a zəŋò Zə̀ kò aŋghəa sɛ̀ lo alo kəfəgha kə mɔ̀ʼ sɛ̀ à ghê Kə̀lestò Yɛso.

¹⁴ To Zuʼ tə̀ Zɔlɔ təla tə lo a zəŋò sɛ̀ mò fughu ghû â daʼa ko aletɔ̀ʼɔ̀ kwuū kelê sə̀ŋò zəla ghe mo fughu naŋa wo â ghù.

¹⁵ Ghù kwò nû enyəa aghî a dzə̀m am mbùʼ è Ɛsìaa m mùgho ti zə̀ghà tàʼa, ghuūghùe u Fìdzɛlùs ghèe Hɛ̀modzɛnès yia bûʼ ti zə̀ghà taʼà daŋso sughò mugho.

¹⁶ Onifɛlùs mò bugho tsəmso zee mugho aŋghəa mùgho mò lo an ndùghùtsāʼ, ù ŋ kè də̂nsò sughò kə̀tuw alebùghò kôʼ mùghò. Gɔ̂ɔŋ zaŋa e lo enyəa to Zə̀ kə̀ mô kele se è kwuso zo a zəŋò wə̄n àsùghò a zəŋò ghì ghò a dzə̀m alo wə̄n an ndughu.

¹⁷ A m bùghò ù daŋso bugho an Lumà, ù n ləghaa alekòʼ mùghò, ù ŋ kəŋ kaaŋ tə̀luʼū tə dzə̀m, bùghò kə̀ŋ kòʼ wò mùghò.

¹⁸ To Mughu ù te mô kwuso èse a zəŋò wə̄n an tsuʼ fəla Kə̀lestò kè bughoo a te ebàm. Ghù tɔ̀ʼ kwò nû aŋghəa ù mò yosò mugho a te an Efɛsùs.