1 Timotì 1 - To kə Kəzə̀ kə̀ Fughu ko

Pôl fùghuu ndùw ètɔŋlo â Timotì

¹ À mwàʼsò kən kə tɔm mugho Pôl. Zə̀ kəla kə bəghaasəa sɛ̀ ghèe Kə̀lestò Yɛso wəla a chiī tùʼ è sɛ̀ a zəŋò wə̄n fə̀ fughu mughu â daʼa ko enyəa mùghò e lo tum è Kə̀lestò Yɛso.

² M̀ mwàʼsò kən tɔɔ wò â ghù Timotì, tɔŋlo enyəa ghù kùum lǒ wɛ waŋa Ǹ nî sə kɔʼ wo am fə̀ŋ zəla sɛ̀ dzeŋe gaʼ tsughu a zəŋò Zə̀ kò. Ŋ̀ gɔ̂ŋlò enyəa to Kə̀zə̀, Tsele ù te ghèe Mughùbè ù sɛ̀, Kə̀lestò Yɛso mò dê ghù â se ghee è kwuso zo àsùghò dzɔ̀ e ghee zo, ghe fughuu sughò ghù â bughuun zo.

E ghomlo ghɛ̀ à ghê ghì ghəla ghe ki tsʉ̂ è biigh zo

³ Ghəa mugho fə̀ nughùn nduw a ŋ Mɛ̀sàdonìa, mùghò n dzɛ̀ â ghù enyəa, ghù dòʼòdòʼò tsughu ko an Efɛsùs. Dzǎa ndùw â ghî ghəla ghe zoʼn kaāŋ ghî ghò am fwə̀n tə aghəa mò à yò ghəa ghəla mùghò fə̀ zoʼn ghɛ a te, enyəa ghe bughū naŋa ghəa a ghee a te gho.

⁴ Dzâa ndùw â ghee enyəa ghe bughūu naŋa alezuum taŋso kaaŋ wii to kùu ndùw ghê tsele a ghê tsele a ghee. Ghea a te a ghəəŋ nù ghî ghə̀ m pfʉa adzughu aŋ ghùe è ghee kə̀nughùnùghù. Ghəa a te a yôsò ghùw alefwaʼā fəgha kəla Zə̀ kə̀ ləghaa, mò ghùw lò ko alefwàʼ fəgha kəla Zə̀ kə̀ ləghaa abugho ù boō fughu tsughu â Kə̀lestò.

⁵ Ghəa è səŋò zəla M̀ fughuu wô ghû â làŋ kən ko lo enyəa to kə mô lò aleghəŋlo ghî a Kə̀lestò ghə̀ e ləghaa ghue ghee zo; ŋgòʼ è ləgha zəla e səā wo am fə̂ŋ è zɔ̀lɔ, à mòʼnlò è dzuŋ zò, Abugho ghe ləghaa ghue e ghee zo enyə, e fi dêe nù enyəa ghe ŋ kùm bǒo fughu â Kə̀lestò.

⁶ Ghî à li ghə n zə̀ghà màʼà səŋò zən zo, kuuwn sə̀ tsə̀ghà tsùghù alekəā kaaŋ shwaʼ ù laʼso wo.

⁷ Ghe dəmà aledòʼò wàdè tə kəlàŋ, an làŋ kə Musî; dèe êzə̀ mo ghe tɔʼɔ̀ zǔuwkɛlɛ yo fəgha kəla lâŋ kə te kə lo ghè kò, aŋghəa ghe buʼù tsɔ̂ɔ ko fə̂ŋ tò a te.

⁸ Aŋghəa e lô êzə̄ŋ, a kwo nû enyəa e dzɔ̂ɔ nù alezoʼnlo àghì alo kəlàŋ, abugho a kuūwn nyɔʼɔ̀ zoʼn dzə̂ ghəa ghəla lâŋ kə te deē ghè kò.

⁹ A kwo sugho nû enyəa ghe kâ lâŋ kə̀ naŋa dzə̀ â ghî à dzûŋ ghò; kə kuuwn lò â ghì ghəla ghe bvuʼū lâŋ kò àsùghò ghəla ghe ghəə̄ŋ fɛ̀ɛn tə aghəa tə̀ biigh to, â ghì ghəla ghe moʼò enyəa Zə̀ kə̀ yo, ghəla ghe ghəə̄ŋ dzə̀adzə̀ tə aghì təla tə ki yo fəgha fwàʼ kə̀ li ko, àsùghò â ghì ghəla wiī maʼn tsughuu tsele ŋkāa zə̂, ŋkāa ghe gbôo ghùw.

¹⁰ Laŋ kə lo sugho â ghì ghəla ghe səā nûŋlo, àsùghò ghê nùghùbùʼutùe. Chia kə lô sugho â ghì ghəla ghe tsɔŋɔ̄ boʼn ghî ghò, àsùghò ghəla ghe kaʼn gha gho; a ka dɔ̂ɔm taŋ ghəla ghe dzɛ̂ enyəa a yo alekāʼ egha, dèe èzə̀ mo gha à kaʼnlo a lo fʉghàzəa u ghee àsùghò ghəa à loʼ ghəla a lo mo a boom dzəəŋ yo ghèe tsʉ̀ è zɔlɔ zo.

¹¹ Tsʉ̂ zən sə kɔʼ an làbəlà è dzùŋ zəla Ǹ zoʼn wô ghî gho a te — làbəlà è dzùŋ zəla Zə̀ kə̀ ghaʼa kəla ghî à kɔʼso fə̀ fughu wo â mùghò.

¹² M̀ fughu kə̀zɔŋlò â Mughùbè ù sɛ̀ wəlà ù mò fughu mugho â nùŋ wò aŋ ghəa ghən, bòʼ ù maā kôʼ tsughu enyəa Ǹ lo nû tsəghatsəgha, ù n nì kɔʼ mugho alefwàʼ fwàʼ kə wə̄n.

¹³ Zə̀ kə̀ maā se zo a zəŋò mùghò kwuso aŋghəa e bûʼ lô ko enyəa M̀ mafə̄ wə̄n bûʼ sùuwn tsə̀ghà dzə̀, dzaŋso kaaŋ tsə̀ghà sùgho tsə̀təndə̄ghā tə wə̄n, bùʼ nòmso sùghò à liʼ gho, tɔŋlo enyəa kə mafə kele enyəa mùghò fə̀ ghəa ghən ghəŋlo an tuw kə e làʼsò.

¹⁴ Mughu ù te n dè wò fə̀ŋ e wə̄n è dzùŋ â mùghò aleghəə̄ŋ tsughu enyəa Ŋ̀ gaʼ fə̀ŋ a zəŋò wə̄n àsùghò an ləgha zəla sɛ̀ ki ghè zò aŋghəa sɛ̀ à ghê Kə̀lestò Yɛso lò alo kəfəgha kə mɔ̀ʼ.

¹⁵ Shwaʼ wən wo enyəa, “Kə̀lestò Yɛso fə̀ fɛ am mbī bugho alebəghaasə ghî à biigh gho.” Shwa u t e u lo êsəŋò ghùw vʉ̀a ù lo aleboō fughu a te. Yìa M̀ fɛ̂ɛn tsəgha ghe a dzə̀m.

¹⁶ Zə̀ kə̀ ŋ kuuwn kwuso tsughu ese a zəŋò mùghò wəla mùgho fə̀ bûʼ bo tsəghà ko ghî à biigh gho a dzə̀m, aŋghəa Yɛso Kə̀lestò fə̀ kǔum maʼà tsughu ghue wo alebəghaasə mugho am bòo taŋa tǒ tsə̌a â ghî ghəla ghe naām ki aleboō fughu â wə̄n to ghe lo kelê mùghù èdoʼntəla zo.

¹⁷ Gɔ̂ɔŋ zaʼa e lo enyəa, to ghî à mô tə̀mâ ŋkəma, fughu sùghò ŋkɔʼso â Də̀ŋ kəla kə doʼo tən, də̀ŋ kəla kə kê kpuūw koʼò yo, kəla ghùw taʼkè kaām koʼò koʼo tsəghà, mò a mìa ko wə̄n Zə̀ kò to mbī kê bughò mìaa. Zə e lo ko êzə̀.

Tsʉ̀ e Pôl â Timotì

¹⁸ Timotì, ŋ wɛ, zuw lâŋ kə̀là M̀ fughu wô fɛ â ghù, tɔŋlo enyəa kə boom dzəəŋ nù ghèe fəgha kəla ghiīshʉ̀ghà a Kəzə̀ a fə̀ kə̂a naŋa kùu wò ghù. Nǐi kɔʼ tsʉ̂ e te zo tò ghɔŋ zə̀ghà an dzɔ̀ɔdzɔ̀ kə tsam chìa ghù ki aletə̄m.

¹⁹ Tɔ̀ʼɔ teme tsughu ko aŋghəa ghù boo fughu a te â Yɛso, ghù kele tsughu sughò fə̀ŋ è zɔ̀lɔ. Ghî à li a lo nû ghe kôom buʼù kɔʼɔ̄ shiāa yo aleghə̂əŋ ghəa zəla e lô tsəghatsəgha, ghəa a te yia a ghəŋlo, ghe yia kôom yo aleboō fughu â Zə̀ kò.

²⁰ Hɛmɛnùs ghèe Àlɛ̀zandà lô ŋgòʼ è ghì a te gho. Mùghò ŋ ghee a te gho a bə̀ghà nî fùghù sə̀ ndùw â Satàn enyəa ù ghə̂əŋ ghəa zəla ù lo aleghəŋlo â ghee. Zən lo ghəəŋ nù, ghe zoʼn tsughu enyəa ghe ki dzə yo alesuūwn Zə̀ kò.