Psalms 88 - Afrikaans 1983

Laat my gebed nie tevergeefs wees nie

¹ 'n Lied. 'n Psalm van die Koragiete. Vir die koorleier: met fluitspel. 'n Gedig van Heman die Esragiet.

² Here my God wat my altyd help, ek roep elke dag om hulp, elke nag bid ek tot U.

³ Laat my gebed nie tevergeefs wees nie, hoor my geroep.

⁴ Die swaarkry het vir my te veel geword: ek vat al aan die doderyk,

⁵ ek staan al met die een voet in die graf, ek het geen krag meer nie.

⁶ Dit is asof ek al tussen die dooies is, tussen dié wat gesneuwel het en in hulle grafte lê, dié aan wie U nie meer dink nie en van wie U u hand teruggetrek het.

⁷ U het my onder in die put laat beland, in diepe duisternis.

⁸ U gramskap rus swaar op my, U laat al u golwe oor my breek. Sela

⁹ U laat my bekendes ver van my af staan en maak my vir hulle iets afskuweliks; ek sit vasgevang en kan nie uitkom nie.

¹⁰ My oë is al dof van ellende; die hele dag deur roep ek na U, Here, en steek ek my hande in gebed na U uit.

¹¹ Sal U met dooies 'n wonder laat gebeur? Kan gestorwenes opstaan en U loof? Sela

¹² Word daar in die graf vertel van u troue liefde? Word daar in die plek waar almal vergaan, van u trou vertel?

¹³ Sal u wondermag ondervind word in die duisternis van die dood, u redding in die land van vergetelheid?

¹⁴ Ek roep na U om hulp, Here, vroeg in die môre al bid ek tot U.

¹⁵ Waarom verstoot U my, Here, waarom trek U U van my af terug?

¹⁶ Ek ly swaar, ek kwyn al weg van my jeug af. Dit is 'n swaar las waarmee U my teister. Ek weet geen raad meer nie.

¹⁷ U toorn rus op my, U tref my met skrik en vernietig my.

¹⁸ Dit bedreig my heeldag soos vloedwater, dit sak op my toe van alle kante af.

¹⁹ U laat my vriende en my bure ver van my af staan, die duisternis van die dood is my geselskap.