Psalms 15 - Afrikaans 1983

Wie het die reg om in die tempel te kom?

¹ 'n Psalm van Dawid. Wie het die reg om in u woonplek te kom, Here? Wie mag op u heilige berg vertoef?

² Hy wat onberispelik wandel en doen wat reg is, wat met sy hele hart die waarheid praat,

³ nie kwaadpraat nie, sy medemens nie kwaad aandoen nie en niemand beledig nie;

⁴ hy wat dié verag wat deur God verwerp is, maar almal eer wat die Here dien; wat sy woord hou, selfs tot sy eie skade,

⁵ sy geld nie op rente uitleen nie en hom nie laat omkoop om die onskuldige te kort te doen nie. Wie hom hieraan hou, sal nooit wankel nie.