Psalms 127 - Afrikaans 1983

As die Here die huis nie bou nie

¹ 'n Pelgrimslied. Van Salomo. As die Here die huis nie bou nie, swoeg dié wat daaraan bou, tevergeefs. As die Here die stad nie beskerm nie, waak dié wat dit beskerm, tevergeefs.

² Tevergeefs dat julle vroeg opstaan en laat gaan slaap om met moeite 'n bestaan te maak. Vir dié wat Hy liefhet, gee die Here dit in hulle slaap.

³ Seuns is geskenke van die Here, kinders word deur Hom gegee.

⁴ Soos pyle in die hand van 'n krygsman, so is seuns wat gebore is toe hulle vader nog jonk was.

⁵ Dit gaan goed met die man wat sy pylkoker so gevul het! Sulke mense het niks te vrees as hulle met die vyand in die stadspoort onderhandel nie.