Psalms 120 - Afrikaans 1983

Ek het vrede begeer

¹ 'n Pelgrimslied. In my nood het ek na die Here geroep en Hy het my gebed verhoor.

² Red my uit die mag van leuenaars, Here, uit die mag van bedrieërs.

³ Wat sal God aan jou doen, jou bedrieër? Hoe sal Hy teen jou optree?

⁴ Hy sal jou tref met die skerp pyle van 'n krygsman, met gloeiende kole.

⁵ Hoe ellendig was dit toe ek as vreemdeling in Mesek gewoon het en tussen die inwoners van Kedar gebly het!

⁶ Te lank moes ek woon by mense wat vrede haat.

⁷ Ek het vrede begeer, maar sodra ek iets gesê het, was hulle op oorlog uit!