Phaodaiq 1 - Akeu (Gaolkheel)

Iqmoeq ilmoeq khe daoq

¹ Miqyail-i mail Yeiqsul Khali bhai phao daiq bhiq-a nail, Yeiqsul aivq nail ganl juq haoqgavq niil keiv nail lavqkhoel bhai gevq-ai thaq nail ngaol. Mao ail maq mao lal mail, pevq lal nail ganl juq aivq nail yaqkav juq bhai bhi heeq bhi moel nail dai khi, Yeiqsul Yaol haq bhai al hai phao daiq bhiq-a nail ngaol. Ngal neq, Miqyail nail yaqkav Yaol haq ngaol. Yeiqsul aivq nail nqtavq gaqkhoel bhai khoel-ai leevq khi, ngaq bhai ganl niil juq bhi heeq bhi moel lavq-a nail ngaol.

² Miqyail nail daoq khi Yeiqsul Khali-i mail salkhil khanq-ai thaq nail ganl juq bhai, ngal ya moel-a nail khe-ai, salkhil khanq khi gevq-ai thaq nail ngaol.

³ Miqyail nail daoq niil ge daiq bhiq nail juq maqkhaiq, gevq-ai thaq nail daoq juq bhai ya gaiq khi nal daiq nail juq maqkhaiq, geeqlaoq eeq nail ngaol. Khul khi mail dai ngal-aq neq, khal gevq-ai thaq nail ganl iqsanl, pevq lal nail yanq kev lee aiq nail ngaol.

Khali yaq munl sivq munl bhai gevq bhiq-a nail ganl

⁴ Ngaq neq, Yaol haq ngaol. Aq sil-aq milkhaoq bhai jaol nail Khali yaq munl sivq munl bhai haoqgavq niil gevq bhoel-ai lavq-a nail ngaol. Milnee uqnee iqsanl, niil aq-il iqsanl, doevq khi yaqhao iqsanl, yavq kha lee nail geeqlaoq eel jaol khi nee sal ovq nail phaq maqkhaiq, aivq nail doiqbev bev ma nail sivtavq bhai jaol nail aqhaqlal sivq gaq nail geeqlaoq eel jaol khi nee sal ovq nail phaq, nul juq nail kovtavq bhai jiav dei-eiq.

⁵ Saljial ivq nail lavqkhoel nee salkhil khanq nail Yeiqsul Khali nail geeqlaoq eel jaol khi nee sal ovq nail phaq maqkhaiq, nul juq nail kovtavq bhai jiav dei-eiq. Yeiqsul Khali neq, sil-a nail tsaol-aq nail lavqkhoel bhai iqmoeq ilmoeq doevq kovq lal-a nail gaq pevq nail ngaol. Miltsaq juq khe heeqphaq bhai uv thaiq nail gaq iqsanl pevq nail ngaol. Aivq ngadao bhai gaiq-a nail ngel-i mail, aivq nail aqsivq-i mail, ngadao nail oeqbal phaiq lavq-a nail ngaol.

⁶ Ngadao aivq nail milkhaoq lavqkhoel bhai heeqphaq pevq lal dai maqkhaiq, aivq nail Aqbhu Miqyail nail Philma jiovq dai maqkhaiq, aivq nl lavq-a nail ngaol. Nq maq maq luv hal yeel aivq nail kovtavq bhai seiqleiq khaoqsail khi uv thaiq nail bhaqaoq jiav dei-eiq. Aq miq.

⁷ Hel daiq dei-eiq, aivq nqdil lavqkhoel nee yavq kha lee nail ngaol. Maiv neev yaoq neev yaoq-ao nee khi aivq bhai geeq khaoq-i mail coev-a nail juq, aivq bhai ya moel nail ngaol. Miltsaq kovtavq bhai jaol nail jeq-e jaq-a iqsanl mail, aivq bhaq da nee nioil khaoq ya khaoq nail ngaol. Niailhai pevq lal nail ngaol. Aq miq.

⁸ “Ngal neq, Aqlaqphal khi Aol meiq gal ngaol. Iqmoeq khi haoqnao nao saq gaq ngaol” dai, iqsanl nail kovtavq bhai uv thaiq nail bhaqaoq eeq nail Miqyail ge nail ngaol. Aivq neq, milnee uqnee, niil aq-il iqsanl doevq khi yaqhao iqsanl, yavq kha lee nail gaq ngaol.

Aqhaqlal lavqkhoel nee Yeiqsul bhai ya moel-a nail ganl

⁹ Ngal neq, nul juq nail aqivq jaqbheq Yaol haq ngaol. Khoeq nail phaq bhai maqkhaiq, Miqyail Milkhaoq bhai maqkhaiq, ol nail phaq bhai maqkhaiq, Yeiqsul nail lavqkhoel ngal nul juq nee mail daq thail thaiq nail ngaol. Ngal Miqyail nail daoq cavq cavq ail, Yeiqsul nail ganl salkhil khanq nail bhaq da nee, Bhaqmol dai khul nail eel jaollaol-n bhai bhi nieil aivq-a nail ngaol.

¹⁰ Heeqphaq Miqyail nail aqn n-gaol, ngal Aqhaqlal Miqyail lavqkhoel bhai jaol-u phao, nqbho nail aqthel meel dov-ai leevq nail khe-ai, ngaq nail haoqnaol phao kav dee dee nail aqthel bhai ngal ya gaiq-a nail ngaol.

¹¹ “Naoq-i mail ya moel-a nail juq, haoqgavq lavqkhoel bhai gevq bhoel khi, Eilpheilsu meenq, Saqmullaq nav meenq, Bheiqlaqgaq meenq, Thilyathilla meenq, Saqdil meenq, Phillaqdeiqphil meenq, Laoqdiqciv meenq, meenq juq bhai jaol nail Khali yaq munl sivq munl bhai oil bhoel gai aivq bhiq yaoq” dai, aqthel al ge lavq-a nail ngaol.

¹² Ngaq bhai daoq ge tsaoq lavq-a nail gaq bhai ya moel dai, ngal haoqnaol naol kovq kovq daiq-u phao, heel nail phalmanq sivq heeq bhai ya moel-a nail ngaol.

¹³ Phalmanq al juq nail gaoltsi bhai, Tsaol-aq nail Yaqyov khe-ai dul nail tsaol-aq teevq gaq bhai ngal ya moel-a nail ngaol. Tsaol-aq al gaq, cilmeiv phuqlul bhai kev dai phailkhaoq heelma doi khi, aivq nail neema bhai heel nail jiovqpavq pavq-ai thaq nail ngaol.

¹⁴ Aivq nail uqhuq khi aivq nail tsailkheel neq, phulleq deel yaol nail aqmevq khi niail khe-ai phul dee dee nail ngaol. Aivq nail maivneev neq, miqjaq miqlail khe-ai dul nail ngaol.

¹⁵ Aivq nail aqkhil neq, poiv haol-ai thaq nail giqheel khe-ai dul nail ngaol. Aivq daoq ge nail neq, aqthel mao ail meel nail laoljaol nail aqthel khe-ai dul nail ngaol.

¹⁶ Aivq nail lavqmal lavq bhai aqgil sivq heeq nieivq thaiq-ai thaq nail ngaol. Aivq nail moeqthaoq lavqkhoel nee, nvq phao nvq phao ail, tav dee dee nail thaoma teevq keiv dov lee-a nail ngaol. Aivq nail maivphaoq neq, nlma khe-ai nl jeel coev nail ngaol.

¹⁷ Ngal aivq bhai ya moel-u phao, sil thaq nail tsaol-aq khe-ai aivq nail aqkhil daoqthaoq bhai ga tsuq ail-a nail ngaol. Aq-u phao, aivq nail lavqmal lavq ngaq nail kovtavq bhai bavq dav khi ge lavq-a nail: “Thaq gee sil. Ngal neq, iqmoeq khi, haoqnao nao saq khe gaq ngaol.

¹⁸ Doevq thail thaiq nail gaq iqsanl ngel nail ngaol. Ngal sil khi ngaol-aoq, niil aq-il nqmaq maqluv halyeel doevq thail thaiq nail ngaol. Sil nail phaq nail taovq taovqphoil khi sil nail milkhaoq nail taovq taovqphoil ngaq nail aqlavq lavqkhoel bhai aol nail ngaol.

¹⁹ Al heel ngel-i mail, moel-a nail juq maqkhaiq, niil aq-il pevq thail thaiq nail juq maqkhaiq, yaqhao pevq lal nail juq maqkhaiq, gevq thaq-ai yaoq.

²⁰ Ngaq nail lavqmal lavq bhai naoq-i mail ya moel-a nail aqgil sivq heeq nail daoq ceevq khi, heel phalmanq sivq heeq nail daoq ceevq neq, niail hai ngaol; Aqgil sivq heeq neq, Khali yaq munl sivq munl nail nqtavq gaqkhoel ngaol. Phalmanq sivq heeq neq, Khali yaq munl sivq munl ngaol” dai, ge lavq-a nail ngaol.