स्रेस्ठगीत 1 - पवित्तर बाइबिल

¹ सुलैमान क स्रेस्ठ गीत।

सस्प्रेमिका क आपन प्रेमी क खातिर

² ओकरे ओंठन क चुम्बनन स मोका ढाँपि लेइ द्या। तोहार पिरेम दाखरस स भी मीठा अहइ।

³ तोहार इत्र क सुगन्ध मोहक अहइ, मुला तोहार नाउँ मोरे बरे मूल्यवान इत्र स भी जियादा मोहक अहइ! इहइ कारण अहइ कि कुँवरियन तोहसे पिरेम करत हीं!

⁴ हे मोर राजा, तू मोका आपन संग लइ ल्या। हाली चला! राजा मोका आपन कमरा मँ लइ आवा ह। हम तोहमाँ आनन्दित अउ मगन अही। हम मानत अही कि तोहार पिरेम दाखरस स उत्तिम अहइ। अच्छा कारण क बरे कुँवरियन तोहसे पिरेम करत हीं।

मनसेधू क बरे यरूसलेम क मेहररूअन मेहरारु क बचन मेहररुअन बरे

⁵ हे यरूसलेम क बिटियो, मइँ करिया हउँ, मुला मइँ सुन्नर हउँ। मइँ केदार क तम्बुअन जइसा अउ सलमोन क तम्बूअन क पर्दा जइसे करिया हउँ।

⁶ किन्तु मोका करिया मँ सामिल जिन करा। इ सूरज अहइ जउन मोका करिया कइ दिहस ह। मोर भइयन एकर कारण अहइँ। उ मोका आपन अंगूरे क बगीचन क रखवारी करइ बरे मज़बूर किहेन ह। एह बरे मइँ आपन क धियान नाहीं रखि सकेउँ।

मेहरारू क बचन मनसेधू क बरे

⁷ मइँ तोहका आपन पूरी आतिमा स पिरेम करत हउँ। मोर सच्चा पिरेमी, मोका बतावा कि तू आपन भेड़िन क कहाँ चरावत अहा? दुपहरिया मँ ओनका आराम करइ बरे कहाँ बइठावत अहा? मोका अइसी एक ठु लड़िकी क लगे काहे होइ चाही जउन घूँघट डारिके तोहरे मीतन क झुण्डन क रखवारी करत ह।

मनसेधू क बचन मेहरारू बरे

⁸ हे मेहररुअन सबन त सुन्नरी, अगर तू नाहीं जानत ह मइँ कहाँ होब, तउ भेड़ियन क पथ पाछा करा। तोहार बोकरियन क बच्चन क गड़रियन क तम्बुअन क लगे चरा।

⁹ हे मोर प्रिय मइँ तोहार तुलना उ घोड़ी स करत हउँ जउन घो़ड़िन फिरौन क रथ क हींचइवाल घोड़न क आकर्सित करत ह।

¹⁰ मइँ तोहार कल्पना चाँदी अउर रतन स सज़ा भवा घोड़ा स कइ सकत हउँ। तोहार गाल खूबसूरत आभूसण अउर कर्नफूल स भवा अहइ। तोहार गर्दन पइ माला बहोत सुन्नर लगत अहइँ।

¹¹ जउन सोना अउर चाँदी क पत्तर लागत ह खास तोहरे बरे बना अहइँ।

मेहरारू क बचन

¹² जब राजा गद्दी पइ लेटत अहइ, मोरे इत्र क सुगन्ध ओह तलक पहोंचत ह।

¹³ मोर प्रियतम रस गन्ध क कुप्पे जइसा अहइ। उ मोरे सीते क बीच सारी रात सोइ।

¹⁴ मोर प्रिय मोरे बरे मेंहदी क फूलन क गुच्छन जइसा अहइ जउन एनगदी क अंगूरे क बगीचे मँ फलत ह।

मनसेधू क बचन

¹⁵ मोर प्रिये, तू रमणीय अहा। ओह, तू केतनी सुन्नर अहा। तोहार आँखिन कबूतरन क जइसी सुन्नर अहइँ।

मेहरारू क बचन

¹⁶ हे मोर प्रियतम, तू केतना सुन्नर अहा। हाँ, तू केतना मनमोहक अहा। हमार बिछाउन केतना ताज़ा अउर आनन्दित महक प्रदान करत हीं।

¹⁷ हमार घरे क छत देवदारू क पउधन स बना अहइँ। अउर देवारन सनोवर पउधन स बना अहइँ।