भजन संहिता 20 - पवित्तर बाइबिल

संगीत निर्देसक बरे दाऊद क एक ठु पद।

¹ तोहरी पुकार क यहोवा जवाब देइ, अउर जब तू विपत्ति मँ ह्वा तउ याकूब क परमेस्सर तोहरे नाउँ क बढ़ावइ।

² परमेस्सर आपन पवित्तर ठउर स तोहार मदद करइ। उ तोहका सिय्योन स सहारा देइ।

³ परमेस्सर तोहरी सब भेंटन क याद राखइ, अउर तोहरे सबइ बलिदानन क अंगीकार करइ।

⁴ परमेस्सर तोहका ओन सबहिं वस्तुअन क देइ जेनका तू फुरइ फुरइ चाह्या। उ तोहार सबहिं योजनन पूरी करइ।

⁵ परमेस्सर जब तोहार मदद करइ हम पचे बहोतइ खुस होब। अउर हम पचे परमेस्सर क बड़कई क गीत गाउब। यहोवा उ सबइ चीज करी जेका तू पचे मँग्या।

⁶ मइँ अब जानत हउँ कि यहोवा मदद करत ह आपन उ राजा क जेका उ चुनेस। परमेस्सर तउ आपन सरगे मँ बिराजा अहइ अउर उ आपन चुने भए राजा क, जवाब दिहस उ राजा क रच्छा करइ बरे परमेस्सर आपन महासक्ती क प्रयोग मँ लिआवत ह।

⁷ कछू क भरोसा आपन रथन पइ अहइ, अउर कछू क आपन फउजियन पइ भरोसा बा मुला हम पचे तउ आपन यहोवा परमेस्सर क सुमिरन करत अही।

⁸ मुला उ सबइ लोग हारि गएन अउर जंगल मँ मार डावा गवा गएन अउर हम लोग जीते अउ खुसी मनावइ बरे इकट्ठा होब।

⁹ अइसा कइसा भवा? काहेकि यहोवा आपन चुने भए राजा क रच्छा किहा उ परमेस्सर क गोहराए रहा अउर परमेस्सर ओकर सुनेस।