नहूम 1 - पवित्तर बाइबिल

¹ इ नीनवे क बारे मँ एक ठु दुःखद समाचार अहइ। इ किताब नहूम क दर्सन क किताब अहइ। नहूम एल्कोस स रहा।

यहोवा नीनवे स कोहान अहइ

² यहोवा ईस्यालु अउर प्रतिसोधी परमेस्सर अहइ। यहोवा बदला लेत ह। यहोवा बहोतइ कोहान अहइ। यहोवा आपन दुस्मनन क खिलाफ बदला लेत ह। उ आपन दुस्मनन पइ कोहात रहत ह।

³ यहोवा धीरा राखत ह। मुला उ बहोतइ सक्तीसाली अहइ। यहोवा अपराधी लोगन क सजा देत ह। उ ओनका आजाद चला जाइ नाहीं देइ। लखा, यहोवा दुट्ठ लोगन क सजा देइ आवत ह। उ आपन सक्ति देखॉवइ बरे चक्रवात अउर तूफानन क काम मँ लिआब। बादर ओकरे गोड़न क नीचे धूरि क समान अहइ।

⁴ जदि यहोवा सागर क घुड़कइ तउ सागर भी झुराइ जाइ। उ सारी नदियन क झुराइ सकत ह। बासान अउ कर्मेल क हरी-भरी भुइँया झुराइके मरि जात हीं। लबानोन क फूल मुरझाइके गिरि पड़त हीं।

⁵ यहोवा क अवाई होइ अउर पहाड़ डर स कँपिहीं अउर इ सबइ पहाड़ियन टेघराइके बहि जइहीं। यहोवा क अवाई होइ अउर इ धरती डर स काँपि उठी। इ जगत अउर जउन कछू एहमाँ अहइ जउन जिअत अहइ, डर स काँपी।

⁶ यहोवा क महाकोप क मुकाबला कउनो नाहीं कइ सकत, कउनो भी ओकर भयानक कोप नाहीं सहि सकत। ओकर किरोध आगी क नाई धधकी। जबहिं उ पधारी तबहिं चट्टानन चटकि जइहीं।

⁷ यहोवा संकट क काले मँ उत्तिम अहइ। उ सुरच्छित सरन अइसे ओन लोगन क अहइ जउन ओकरे भरोसे अहइँ। उ ओनकर देख-रेख करत ह।

⁸ मुला उ आपन दुस्मनन क पूरी तरह बर्बाद कइ देइ। उ ओनक बाढ़ क तरह बहाइ के लइ जाइ। अँधियारा क बीच उ आपन दुस्मनन क पाछा करी।

⁹ का तू पचे यहोवा क खिलाफ सड्यंत्र रचत अहा? उ तोहार पचन क अंत कइ देइ। फुन अउर कउनो दूसरी दाईं कबहुँ यहोवा का खिलाफत नाहीं करी।

¹⁰ तोहरे पचन्क दुस्मन अरझ गए काँटन स बर्बाद होइहीं। उ पचे झुरान घासे जइसे हाली ही जरि जइहीं।

¹¹ हे अस्सूर, एक मनई तोहसे ही आवा अहइ। जउन यहोवा क खिलाफ सड्यंत्र रचेस अउर पापे स भरी सलाह दिहस।

¹² यहोवा यहूदा स इ सबइ बातन कहे रहा: “अस्सूर क जनता पूरी सक्तीसाली अहइ। ओकरे लगे बहोत स फउजी अहइँ। मुला ओन सबन्क काटिके लोकाइ दीन्ह जाइ। सबन्क अन्त कीन्ह जाइ। हे मोर लोगो, मइँ तू पचन्क बहोत स कस्ट दिहेउँ मुला अब आगे तू पचन्क अउर कस्ट नाहीं देबउँ।

¹³ अब मइँ तोहरे पचन क काँधे स उ जुआ उतारि देब। तोहार सबन्क जंजीरन जेनमाँ मँ तू पचे बँधा अहा मइँ अब तोरि देब।”

¹⁴ हे अस्सूर क राजा, तोहरे बारे मँ यहोवा इ आदेस दिहस ह: “तोहार नाउँ लेवइया कउनो भी संतान न रही। तोहार खुदी भइ मूर्तियन अउ धातु क मूर्तियन क मइँ बर्बाद कइ देब जउन तोहरे देवतन क मन्दिरन मँ रखा भवा अहइँ। मइँ तोहरे बरे कब्र बनावत हउँ काहेकि तोहार अंत आवति अहइ।”

¹⁵ लखा यहूदा। लखा हुआँ, पहाड़े क ऊपर स कउनो आवत अहइ। कउनो हरकारा सुसंदेस लइकि आवत अहइ। लखा उ कहत अहइ कि हिआँ पइ सान्ति अहइ। यहूदा, तू आपन खास छुट्टी क दिन मनाइ ल्या। यहूदा, तू आपन मन्नतन मनाइ ल्या। अब फुन कबहुँ दुर्जन तोह पइ वार न करिहीं अउर उ पचे फुन तोहका हराइ न पइहीं। ओन सबहिं दुर्जनन क अन्त कइ दीन्ह ग अहइ।