YUDAS 1 - Alkitab Engrok Hik

¹ Surat adeh ju eng Yudas. Eng adeh hambe Yesus Kristus ru menang Yakobus. Surat adeh ngtuju nu engkek de bicereg engkejadi sengoi-sengoi Jenang, de bihok ya Jenang, ru de bilindog ya Yesus Kristus.

² Semoge Jenang Kiog neyayak, neaman, ru haknok de lei melimpah-limpah nu engkek.

Dosa ru Nehukom nu Sengoi-sengoi de Nailanggar Ernor Jenang

³ Kekawat de nghok, iasaljeh eng mimang betol-betol ngha-cot surat nu engkek tentang hal penyelamatan ju Jenang. Penyelamatan ajeh ya sama-sama hiterima ju Ilei. Tapi sengik eng bidorong supaye ngcot surat de kilek adeh untok ngpegalak engkek supaye lekat engkekerekwat engkepetahan ha neajar benar de pek dapat beubah ru de biog nu sengoi-sengoi Jenang.

⁴ Kerana, engkek pek engkesedar ya mong memerip urag de naimuj serakngek nu engkap engkek. Enai ajeh sengoi-sengoi de nailanggar ernor Jenang ru de naiputar-belet ha bernor sengik Jenang kerana naiha-pebuleh kelaku niknej liknai sendiri. Enai pek naiaku Yesus Kristus ajehloh Tuan de nek nanek ru Tuhan hik. Ju entem lagi nehukom ha sengoi-sengoi ajeh ya mong bicot.

⁵ Hamapen ya engkepanei, tapi eng ngha-peingat nij engkek tentang dikdij hal adeh: Entem TUHAN Kipeselamat mai Israel ju lengrik Mesir tapi telas ajeh Kek juga Kiperdat sengoi-sengoi de pek naipecaya nu Ilei.

⁶ Juga, Jenang ya Kibeg malikat-malikat de pek honj ru batas kuasa de biog nu enai lei naidek deg enai ku serga. Jenang Kibeg enai ku tempat de ihad guer ya rantei de pek dapat bibuka lei ditehjeh. Enai bibeg leiloh nu arik entoi bile enai bipeadel ru bihukom ya Jenang doh.

⁷ Sengoi-sengoi de gigei ku kote Sodom, kote Gomora, ru kote-kote de mong ku sekelileg nar kote ajeh pen naibeh hal-hal begei de bibeh ya malikat-malikat ajeh. Sengoi-sengoi ajeh naiog berog enai nu kelaku zinah ru heknod seks de niknej. Kerana ajehloh, Jenang Kihukom enai ya os de pek let lei ditehjeh supaye naijadi cuntoh nu dikdij mai.

⁸ Begei ajehloh juga sengoi-sengoi de naimuj serakngek nu engkap engkek naipekutor berog enai ya sinui de bedosa. Enai naiurok Jenang Kior melalui empok-empok supaye naisui begei ajeh. Enai nainyek mai kilek mong kuasa nu enai ru enai juga naihina ha malikat-malikat.

⁹ Ketue malikat de imuh Mikhael pen pek kibeh begei ajeh. Mase kek kibejawab ru Ibles kerana ubai bemanyek ha berog danan Nabi Musa, kek pek kiberani kaha-hina ha Ibles tapi had kiurok, “Semoge TUHAN Kirok hek!”

¹⁰ Tapi sengoi-sengoi ajeh naihina ha dikdij pekare de pek naireti. Enai ajeh sama begei ha binatag kerana pekare-pekare de naireti ajeh had kijoi ha naluri jehat enai taleh. Naluri enai ajehloh de kipebinasa ha enai doh.

¹¹ Enai ajeh ihad malang! Enai ya naijoi dosa Kain. Enai juga ya naijoi dosa Bileam de tamak ha duet. Enai ya bipebinasa kerana naimemberontak begei ha Korah.

¹² Enai naiperusak majles caknak de engkebeh ha sesedara seiman engkek. Naicak pek besengik ru had naipenteng ha diri liknai sendiri taleh. Enai ajeh begei ha sagop de bipoi ya pinoi tapi pek kicerleh manik. Enai ajeh juga begei ha keneng pelek de pek kibepelek ku musem pelek. Enai ajeh juga begei ha keneng de ya betol-betol dat kerana biroj rimdij lei nu ireis.

¹³ Enai juga begei umbak laot ganas de kiperhol bug-bug kutor. Imaksodjeh naiperhol kelaku liknai de beselnel. Enai ajeh begei ha perloi de pek tentu ikedudukan lei pek buleh biguna ha tentukan arah. Enai pek layak naiha-pimpen mai kilek. Jenang ya Kisedia tempat de paleng guer ha enai. Enai doh bidek ku pajeh lei ditehjeh.

¹⁴ Henokh ajeh generasi de ketujoh ju Adam. Kek pernah kibenubuat tentang enai ajeh begei adeh: “Nengloh, TUHAN doh Kihol besama ru beribu-ribu Imalikat de suci

¹⁵ Kaha-peadel dikdij mai ru Kaha-hukom ha sengoi-sengoi de nailanggar Iernor ya kelaku-kelaku enai de pek taat ru bengwal nehina enai nu Ilei.”

¹⁶ Enai ajeh sengoi-sengoi de nekberarok ru nekpesalah mai. Naijoi heknod jehat liknai sendiri, naibelagak ha diri sendiri, ru naipateh ha mai kilek kerana naiha-berkep ma de naihod.

Amaran ru Bengsat

¹⁷ Tapi kekawat de nghok, ingatloh ma de ya biurok ya rasul-rasul Tuhan hik Yesus Kristus.

¹⁸ Enai ya naipeingat ha engkek, “Ku aher jaman doh hol sengoi-sengoi de nainyeh ha Jenang ru engkek. Enai ajeh sengoi-sengoi de naijoi ha napsu liknai de bedosa.”

¹⁹ Enai ajehloh de naibeh engkek engkeceraklah sesama liengkek. Enai juga naibeh ma-ma pekare naijoi ha naluri jehat taleh ru pek mong Kelog Jenang ku sinui enai.

²⁰ Tapi engkek kekawat de nghok, hodloh iman engkek de ihad suci teros kicuai. Ru bedoaloh ya penimpen Kelog Santen.

²¹ Suiloh ku kerop haknok Jenang sementare engkepoj ha neyayak ju Tuhan hik Yesus Kristus de doh Kaha-en engkek nu sinui de lei ditehjeh.

²² Pernengloh neyayak nu mai de ragu-ragu.

²³ Peselamatloh mai de rikroj begei engketarek mai hol ju os. Pernengloh neyayak nu mai kilek tapi behati-hatiloh supaye pek engkejoi jenghat enai.

Doa Penateh

²⁴ Beiloh hipateh Jenang. Kek bekuasa Kilindog engkek supaye pek engkebedosa ru Kek bekuasa Kien engkek nu ngar Ilei Sendiri de ihad mulie. Bile engkejinjeg ku ngar Ilei, engkek doh pek mong senalah ru doh ihad engkekerakmik.

²⁵ Beiloh hipateh Jenang de nek nanek de Kipeselamat hik melalui Yesus Kristus Tuhan hik. Beiloh hipateh Kek kerana Ilei ajeh mulie, agong, kuat, ru bekuasa sejak ju mula jaman, hunen, ru lei ditehjeh. Amin.