YAKOBUS 1 - Alkitab Engrok Hik

¹ Surat adeh ju eng Yakobus. Eng adeh hambe Jenang ru hambe Tuhan Yesus Kristus. Ngtuju surat adeh nu 12 suku Israel de pecaya nu Yesus de naijadi mai luar ku lengrik-lengrik aseg. Salam ju eng nu engkek semua.

Ujian ru Cenuba

² Sesedara seiman eng, hodloh engkek betol-betol engkekerakmik bile iman engkek biuji ya bemacam jenis ujian

³ kerana engkepanei tentang hal adeh: Bile iman engkek biuji, hal ajeh kibeh engkek gulebeh sabar.

⁴ Hodloh teros engkebesabar lei betol-betol engkejadi matang ru pek mong de kurang.

⁵ Amen mong mai ku engkap engkek de kurang icerendeg, hodloh kisemanj nu Jenang kerana Jenang Kiog cerendeg nu bok taleh de sengmanj nu Ilei. Kek Kiog ru senang sengik nu mai de sengmanj. Kek pek akan Kibelal nu enai bile naisemanj nu Kek.

⁶ Tapi sengoi de sengmanj ajeh hodloh kipecaya ru pek kiragu-ragu kerana mai de ragu-ragu ajeh begei ha umbak laot de bipoi ya pinoi diteh-madeh.

⁷ Sengoi de begei ajeh pek buleh kibeharap kaha-kep ma-ma pen ju TUHAN.

⁸ Kekloh sengoi de isengik berlak-berlik ru teagak-agak kaha-beh ma-ma.

⁹ Sesedara seiman de misken hodloh naikerakmik kerana Jenang ya Kipetinggi ha enai.

¹⁰ Ru mai kaya hodloh naikerakmik bile Jenang Kiperendah enai kerana enai ajeh doh lenyap begei ha bunga lalag.

¹¹ Mase mat arik kihol, ibengket kibeh lalag ajeh sod lei ibunga kilayu ru inelawa pen nyep. Begei ajehloh icare mai kaya doh naidat. Enai doh naidat mase lekat sibok naibeniaga.

¹² Jenang Kiberkat mai de lekat sabar mase iman enai biuji. Amen naitahan ju ujian ajeh, enai doh naikep sinui de bijanji ya Jenang nu sengoi-sengoi de naihok ha Ilei.

¹³ Bile bicuba, agokloh sesekali engkeurok cenuba ajeh ju Jenang. Kerana, Jenang pek pernah bicuba ya jenghat atao Kicuba ha bok-bok pen.

¹⁴ Tapi jap-jap sengoi bicuba bile kek bijerat ya heknod jehat ilei sendiri.

¹⁵ Heknod jehat ajeh kiperyos dosa ru bile dosa ajeh kigu-raknak, dosa ajeh doh kiperyos danan.

¹⁶ Sesedara seiman de nghok, agokloh engkek bilenglod.

¹⁷ Jap-jap ennog de bor ru de sempurne ajeh kihol ju serga, ju Menek de Kibeh dikdij cahaya ku langit. Kek pek begei ha dikdij cahaya ajeh de selalo beubah ibentok. Kek pek beubah.

¹⁸ Kek Kibeh keputusan untok Kiog hik sinui pai melalui Iengrok de benar supaye hik de mula-mula sekali de kekkep sinui pai ajeh ku engkap dikdij ma de Kicipte.

Cerngai Canuk Telas Ajeh Beh

¹⁹ Sesedara seiman de nghok, hodloh engkeingat tentang hal adeh: Jap-jap mai hodloh besedia naiha-ceringai tapi agokloh deras naiha-belwal ru agokloh deras naiha-rakrok juga

²⁰ kerana mai de tengah naibelal pek dapat naibeh hal de benar de kipesenang sengik Jenang.

²¹ Kerana ajeh, pejloh dikdij kelaku de niknej ru jenghat de biasa engkebeh. Ya rendah sengik, terimaloh engrok Jenang de ya bicet ku kateh sengik engkek kerana engrok ajeh buleh kipeselamat ha engkek.

²² Amen had engkecerngai taleh ha engrok Jenang ajeh ru pek engkebeh, engkelenglod ha diri sendiri. Behloh ma de bior ya engrok ajeh.

²³ Numom de kicerngai ha engrok Jenang tapi pek kibeh, kek ajeh begei numom de kineng irenes ku cermin

²⁴ ru telas ajeh, kek kiet ju kenjeh ru deras kisip begeiharok irenes.

²⁵ Nenumom ajeh doh biberkat ya Jenang ku kateh dikdij hal de kibeh amen betol-betol kikaji Hukom Jenang de sempurne ru de kiterlas ha manusia ju dosa. Kek hodloh teros-meneros kikaji ha Hukom ajeh ru pek kisip telas kicerngai ru juga kibeh ma de kicerngai ju Hukom ajeh.

²⁶ Sengoi de kianggap idiri ajeh alim tapi pek kikawal ilentag, kek kilenglod ha diri ilei sendiri ru ibahneh alim ajeh kijadi sie-sie taleh.

²⁷ Nu Jenang Menek hik, adehloh bahneh alim de berseh ru sejati: Tulog ha mai rekneg ru balu de naitempeh senusah, ru juga kijaga idiri supaye pek kipekutor idiri ya jenghat dunia.