WAHYU 1 - Alkitab Engrok Hik

¹ Bob adeh mong ceknot tentang hal-hal de tejadi pek liu nij doh. Hal-hal ajeh bipasal ya Jenang nu Kristus, ru Kristus Kipasal hal-hal ajeh nu hambe-hambe Jenang. Kristus Kingeng Imalikat supaye kipasal dikdij hal ajeh nu eng Yohanes hambe Kristus.

² Eng ngpasal tentang engrok Jenang ru neajar ju Yesus Kristus. Dikdij ajeh ya ngneng ya mat lieng sendiri.

³ Jenang Kiberkat mai de bebaca bob adeh nu mai kilek ru Kiberkat juga mai de ceringai tentang nubuat ku kateh bob adeh ru naitaat nu ceknot bob adeh. Kerana, dikdij hal de bipasal ku kateh bob adeh doh segera kitejadi.

Salam Yohanes nu Jemaah-jemaah ku Tujoh Kote

⁴ Salam ju eng Yohanes nu tujoh gerija ku tujoh kote ku lengrik Asia. Semoge Jenang, tujoh kelog Jenang, ru Yesus Kristus Naiog berkat ru neaman nu engkek. Jenang ajeh mong hunen, mong ku imemula entem, ru mong pigoi doh juga. Tujoh kelog Jenang ajeh mong ku ngar tahte Jenang.

⁵ Yesus Kristus ajeh setie Kibesaksi tentang Jenang. Ilei ajehloh de mula-mula sekali bipersui ju danan ru de bekuasa ku jap-jap raja ku dunia adeh. Yesus ihad Kihok ha hik lei sanggop Kidat ha hik. Ibehip ku jehuk kalag Kiterlas hik ju dosa-dosa lihik.

⁶ Kekloh de Kibeh dikdij lihik hijadi sengoi-sengoi de biperintah ya Jenang sebegei Raja ru hijadi imam de himelayani Jenang IMenek ajeh. Semoge Yesus Kristus bipemulie ru bekuasa lei ditehjeh! Amin.

⁷ “Nengloh, Kek doh Kihol bikelileg ya sagop! Dikdij mai doh naineng ha Kek temasok sengoi-sengoi de naiperdat ha Ilei entem. Dikdij bangse ku bumi doh naijap kerana naisengoh ha Kek.” Hooh, hal ajeh doh kitejadi! Amin!

⁸ TUHAN Jenang Kiurok, “Engloh Ilei de canuk ru de keknit, de mong hunen, de mong ku imemula entem, ru de mong pigoi doh juga. Engloh Ilei de Ihad Bekuasa.”

Yesus Kiperneng Idiri nu Yohanes

⁹ Eng Yohanes adeh sedara seiman engkek. Eng juga begei ha engkek de tesiksa kerana hik biperintah ya Yesus sebegei Raja. Hik lekat tahan hitempeh seniksa kerana hibenanek ru Kek. Eng hunen biperet nu Pulau Patmos kerana ngperlei engrok Jenang ru ngbesaksi tentang Yesus.

¹⁰ Ku nanek arik de selalo hibeibadah, Kelog Jenang Kipimpen eng. Eng ngcerngai suara kuat ku kenog eng begei sengyog trompet biparok.

¹¹ Suara ajeh kiurok begei adeh: “Cotloh ku kateh nanek bob dikdij hal de haneng ru ngengloh bob ajeh nu tujoh gerija ku tujoh kote adeh: Kote Efesus, kote Smirna, kote Pergamus, kote Tiatira, kote Sardis, kote Filadelfia, ru kote Laodikia.”

¹² Eng ngceleg nu kenog eng ngha-neng suara bok de belwal nu eng ajeh. Lalu ngbakek tujoh jog pelite bibeh ju mas.

¹³ Betol-betol ku semakdek senusot tujoh jog pelite ajeh ngbakek mong bentok berog inengneng begei ha Kenon Manusia. Ngneng Kek Kilog jubah de cereg lei nu Ijog ru Kilog selimpang mas ku Ienteh.

¹⁴ Isog biyeg begei ha kapas atao begei ha salji, ru Imat der begei ha os.

¹⁵ Ijog cerengling begei tembage de bitod, ru Isuara entoi begei engrok teu talag.

¹⁶ Kek Kicap tujoh kebek perloi ku Iteg kentop, ru ju Iempag hol pedang de rimnar itepi tajap. Irenes becahaya begei mat arik ku iyahnah.

¹⁷ Mase ngneng ha Ilei, ngjerekkop ku ngar Ijog begei ha mai dat. Kek Kidek Iteg kentop ku eng ru Kiurok, “Agok sengoh. Engloh Ilei de canuk ru de keknit.

¹⁸ Engloh Ilei de sui! Hamapen Eng ya pernah Ngdat, tapi nengloh, Eng ya Ngsui nij lei ditehjeh. Eng mong kuasa Ngpetentu bile imase jap-jap sengoi naidat, ru Eng juga mong kuasa Ngpetentu bok de mikmuj nu kateh Dunia Mai Dat.

¹⁹ Kerana ajeh, cotloh dikdij hal de ya haneng, baik hal de tejadi hunen ru hal de tejadi pigoi doh.

²⁰ Adehloh maksod sebenar tujoh kebek perloi de haneng ku teg kentop Eng ru tujoh jog pelite de bibeh ju mas: Tujoh kebek perloi ajeh imaksod tujoh pemimpen-pemimpen gerija de mong ku tujoh kote. Ru tujoh jog pelite ajeh imaksod tujoh gerija de mong ku tujoh kote ajeh.”