TITUS 1 - Alkitab Engrok Hik

Salam

¹ Eng Paulus hambe Jenang ru rasul Yesus Kristus ngcot surat adeh nu hek Titus. Eng bingeng untok ngpekuat iman sengoi-sengoi de bipileh ya Jenang ru juga untok ngajar enai supaye naipanei tentang neajar de benar de kibeh naisui alim.

² Kerana ngbeh hal-hal ajeh, enai mong neharap naiha-kep sinui de lei ditehjeh. Jenang de pek Kibelenglod ya Kijanji sinui ajeh sebelom dunia adeh bibeh.

³ Ku imase de Kipetetap, Kek Kipasal Ijenanji ajeh melalui perenglei Gah Bor. Jenang Peselamat hik ya Kiog tanggongjawab nu eng untok ngperlei Gah Bor ajeh.

⁴ Titus, hek begei kenon lieng sendiri kerana har sama harpecaya nu Kristus. Semoge Jenang Menek hik ru Kristus Yesus Peselamat hik Baiog berkat ru neaman nu hek.

Tugas Titus ku Pulau Kreta

⁵ Eng ngdek hek ku Pulau Kreta supaye hek buleh habeh dikdij pekare de lekat hod bibeh ru supaye halantek pemimpen-pemimpen jemaah ku jap-jap kote. Ingatloh ha syarat-syarat adeh de ya ngpasal canukjeh:

⁶ Pemimpen-pemimpen jemaah hodloh mai de pek dapat bitudoh naibeh senalah. Enai hodloh mong numom kenah taleh. Kekenon enai hodloh naipecaya nu Kristus, kelaku enai bor, ru taat nu keneng-menek enai.

⁷ Pemimpen-pemimpen jemaah hod naiuros kerjak Jenang. Kerana ajeh, enai hodloh naijadi mai de pek dapat bitudoh kerana naibeh senalah. Enai pek buleh sumbong, nekbengal, nekbelnel, nekbekelahi, ru tamak ha duet.

⁸ Enai hodloh naigemar besamut mai nu madeg enai ru naigemar ma de bor. Enai hodloh dapat naiterhan heknod diri, jujor, suci, ru bedisiplin.

⁹ Enai ya biajar tentang neajar de dapat bipecaya, jadi enai hodloh setie nu neajar ajeh supaye dapat naigalak mai kilek ya neajar de benar, ru juga supaye dapat naiperneng senalah sengoi-sengoi de naitentang ha neajar ajeh.

¹⁰ Ngurok begei ajeh kerana mong jeoi sengoi de naitentang neajar de benar naiguna bengwal kusong ru nelengnon. Hal ajeh bibeh teutame sekali ya mai Yahudi de naijadi Kristian. Enai naiurok hik hod hijoi dikdij Hukom Taurat supaye bipeselamat.

¹¹ Getloh naiajar neajar de pek patot biajar kerana naiperusak iman rimdij peringak-peringak. Naibeh begei ajeh kerana naiha-kek duet ju mai naiguna care de pek jujor.

¹² Numom nabi ju Pulau Kreta pen pernah kiurok, “Mai Pulau Kreta selalo neklennon. Enai begei binatag jehat de tamak ru segat.”

¹³ Ma de biurok ajeh mimang betol. Jadi, tegorloh tegas jemaah-jemaah ku pajeh supaye enai betol-betol naipecaya nu neajar de benar

¹⁴ ru supaye pek naibeirau nij tentang cerite-cerite ratah mai Yahudi atao ernor mai de pek naiterima neajar de benar ajeh.

¹⁵ Ku mai de isengik berseh, dikdij hal pen berseh. Tapi ku mai de ipeniker cemar ru pek naibeiman, pek mong ma-ma pen de berseh kerana peniker ru sengik enai ya tecemar.

¹⁶ Enai ajeh naiaku naikenal Jenang tapi bahneh enai ajeh kipebukti nainyek ha Kek. Enai naibeh ma de bigetek ya Jenang. Enai pek naitaat nu Jenang ru pek lalu naiha-beh ma taleh de bor.