RUT 1 - Alkitab Engrok Hik

Elimelekh ru Iperingak Naijenjeg nu Lengrik Moab

^1-2 Ku manah entem, lengrik Israel pekseg lagi beraja tapi biperintah ya hakem-hakem. Mong nuperingak de muh igensir Elimelekh, ikenah imuh Naomi, ru nar mom ikenon keral de muh ubai Mahlon ru Kilyon. Enai ju pekan Betlehem de ku tik suku Yehuda. Dikdij enai ajeh ju pitak mai Efrata. Ku mase ajeh, tejadiloh cengwag ku lengrik Israel. Jadi, Elimelekh ru ikenon-kenah naijinjeg nu lengrik Moab sebegei mai luar.

³ Mase ku Moab Elimelekh kidat. De lekat mong ikenah ru ubai ikenon Mahlon ru Kilyon.

^4-5 Ubai ajeh baibekenah mai Moab. Kilyon kibekenah ru Orpa, Mahlon kibekenah ru Rut. Telas 10 tahut, Mahlon ru Kilyon baidat, de mong Naomi pek begengsir ru pek bekenon.

Rut Kaha-joi Naomi Jog nu Betlehem

^6-7 Naomi mong kicerngai ya mong becaknak ku Israel kerana berkat ju Yahweh. Jadi, Naomi kisikyap ru kicip kaha-jog nu Israel besama ru nar mom imengsau.

⁸ Mase ku padek nong, Naomi kibual nu imemengsau, “Jogloh nu deg amek-apak jerkek. Semoge Yahweh Kibeh bor nu jerkek begeiharok de ya jerkek beh bor nu ubai de ya dat ru nu eng juga.”

⁹ Naomi kikawal ru kiog ibengsat penyudah, “Ngsemanj Yahweh supaye Kiog gengsir de bor nu jerkek ru supaye jerkesui semiak.” Enai sama-sama naijap.

¹⁰ Tapi ubai imengsau Rut ru Orpa baiurok “Jar, jarnyek, jar jarha-joi nu pitak jen.”

¹¹ Naomi kiurok “Wesloh un, agok joi lej. Jogloh jerkek nu madeg. Yama de jerkeha-joi ha lej? Eng pek dapat ngha-permong kenon ngha-og jerkek gengsir nij.

¹² Jogloh jerkek un, kerana eng ya engrak pek ngbegengsir nij. Amen eng lekat mampu ngbegengsir ku kelem adeh juga ru ngmakok ru ngkep kekenon keral,

¹³ sanggopka jerkepoj lei ubai raknak? Amen jerkebeh begei ajeh, jerkek doh langsong pek jerkebegengsir ru mai kilek. Wesloh, agok beh begei ajeh. Eng ngsedeh kerana jerkek tepaksa jerkesusah ya seniksa Yahweh nu eng.”

¹⁴ Maken gukuat nij enai rimnik naijap. Telas ajeh Orpa kiperdij ibengwal, kek kikawal ijenak ru kek pen kiet. Tapi Rut kinyek pek kaha-et. Kek lekat kuat kipegag ijenak.

¹⁵ Naomi kibual nu Rut, “Un, cerngai madeh. Biras engkek ya kijog nu ibangse ru kijog nu ijejenang ilei de naisembah. Etloh engkek juga jog begei ha kek!”

¹⁶ Tapi Rut kiberlag, “Wes agok paksa eng. Eng ngha-joi jen. Tempat jen, tempat eng; kampug jen, kampug eng; bangse jen, bangse eng; Jenang jen, Jenang eng. Ku belok jengei, eng juga nggei,

¹⁷ ku belok jendat, eng pen ngdat, ru bicop pajeh. Eng ngha-joi jen ma pen de tejadi, pek kira ngsuika ngdat. Biarloh Yahweh de bekuasa Kihukom eng amen har harceraklah. De buleh becerlah har had danan taleh.”

¹⁸ Bile Naomi kicerngai ma de bipasal ya Rut ajeh, Naomi pen pek kibual ma-ma nij.

¹⁹ Ubai pen baipeteros ceknip ubai nu Betlehem. Bile ubai lei nu Betlehem, mai ku pekan ajeh naineng naihiran. Pitak mabek kekerdor langsong naibetanya ratak liknai, “Naomika ajeh?”

^20-21 Naomi kiurok ru sedeh, “Wesloh agok sebot eng Naomi nij, sebot eng ‘Mara-Hajap,’ kerana canukjeh gengsir ru kekenon eng lekat mong tapi hunen ya dij tiktok. Yahweh de Ihad Bekuasa Kibeh eng susah begei adeh.”

²² Begei ajehloh cerite Naomi kijog ju Moab besama ru imengsau Rut. Ubai lei kena ku imusem mula kiknej barli.