MATIUS 1 - Alkitab Engrok Hik

Senarei Muh Jenang Rak Yesus Kristus

¹ Yesus Kristus ajeh kenon-cenok ju Raja Daud ru Abraham. Adehloh senarei muh jenang rak Yesus:

² Abraham ajeh apak Ishak. Ishak ajeh apak Yakub. Yakub ajeh apak nu Yehuda ru 11 iberadek de kilek.

³ Yehuda ajeh apak Peres ru Zerah, ru amek ubai imuh Tamar. Peres ajeh apak Hezron. Hezron ajeh apak Ram.

⁴ Ram ajeh apak Aminadab. Aminadab ajeh apak Nahason. Nahason ajeh apak Salmon.

⁵ Salmon ajeh apak Boas, ru Rahab ajeh amek Boas. Boas ajeh apak Obed, ru Rut ajeh amek Obed. Obed ajeh apak Isai.

⁶ Isai ajeh apak Raja Daud. Raja Daud ajeh apak Raja Salomo, ru amek Raja Salomo ajeh kenah manah Uria.

⁷ Raja Salomo ajeh apak Rehabeam. Rehabeam ajeh apak Abia. Abia ajeh apak Asa.

⁸ Asa ajeh apak Yosafat. Yosafat ajeh apak Yoram. Yoram ajeh apak Uzia.

⁹ Uzia ajeh apak Yotam. Yotam ajeh apak Ahas. Ahas ajeh apak Hizkia.

¹⁰ Hizkia ajeh apak Manasye. Manasye ajeh apak Amon. Amon ajeh apak Yosia.

¹¹ Yosia ajeh apak nu Yoyakin ru iberadek keral de kilek. Ku lirah mase ajehloh jeoi mai Yahudi biperet hol nu Babel.

¹² Adehloh muh jenang rak Yesus sejak ju enai biperet hol nu Babel lei nu mase yisnos Yesus: Yoyakin ajeh apak Sealtiel. Sealtiel ajeh apak Zerubabel.

¹³ Zerubabel ajeh apak Abihud. Abihud ajeh apak Elyakim. Elyakim ajeh apak Azur.

¹⁴ Azur ajeh apak Zadok. Zadok ajeh apak Akhim. Akhim ajeh apak Eliud.

¹⁵ Eliud ajeh apak Eleazar. Eleazar ajeh apak Matan. Matan ajeh apak Yakub.

¹⁶ Yakub ajeh apak Yusuf. Yusuf ajeh gengsir Maria. Ru Maria ajehloh de kiperyos Yesus de bicereg ‘Peselamat de bijanji ya Jenang.’

¹⁷ Begei ajehloh mong 14 jenang rak ju jaman Abraham lei jaman Raja Daud, ru mong 14 jenang rak ju jaman Raja Daud lei mase mai Yahudi biperet hol nu Babel. Ru mong 14 jenang rak ju mase ajeh lei Peselamat de bijanji ya Jenang ajeh Kiyos.

Yisnos Yesus Kristus

¹⁸ Begei adehloh kisah yisnos Yesus Kristus. Maria amek Yesus kibetunang ru numom keral imuh Yusuf. Tapi sebelom ubai jekjeg, Maria ya kimakok canuk melalui kuasa Kelog Santen.

¹⁹ Yusuf tunang Maria ajeh numom mai de taat nu Hukom Taurat tapi kek pek kaha-peselsel ha Maria ku ngar mai jengoi. Kerana ajeh, Yusuf kiserakngik kaha-wes itunang ajeh serakngek.

²⁰ Mase Yusuf lekat kiserakngik tentang hal ajeh, kek kiberakpok. Ku kateh iempok ajeh, malikat TUHAN kiperneng ilei nu Yusuf. Malikat ajeh kiurok, “Yusuf, kenon-cenok Raja Daud! Agokloh sengoh ha bekenah ru Maria, kerana kek kimakok melalui kuasa Kelog Santen.

²¹ Kek doh kiperyos numom kenon keral ru hodloh haog nu kenon ajeh Imuh Yesus kerana Kek doh Kipeselamat Isengoi-sengoi ju dosa enai.”

²² Dikdij hal ajeh tejadi supaye ma de TUHAN Kiurok melalui Inabi kitejadi. TUHAN Kiurok,

²³ “Numom menaleh doh kimakok ru kiperyos numom kenon keral. Kenon ajeh doh bigelar Imanuel.” (Imanuel ajeh imaksod, Jenang Kibesama ru hik.)

²⁴ Bile Yusuf kikos ju ibuknet, kek kibeh ma de bior ya malikat TUHAN ajeh ru kibekenah ru Maria.

²⁵ Tapi Yusuf pek mong ma-ma hubungan seks ru Maria lei Maria kiperyos iKenon Keral. Yusuf kiog muh Kenon ajeh Yesus.