MARKUS 5 - Alkitab Engrok Hik

Yesus Kiperbor Sengoi de Bisangrog ya Nyanik

¹ Telas ajeh Yesus ru Ipengikot-pengikot nailintas Tasek Galilea ru nailei nu daerah Gerasa.

² Pai taleh Yesus Kiceleh ju perahu, mong numom sengoi de kihol ju kawasan penep kiterbuk nu Yesus.

³ Sengoi ajeh bisangrog ya nyanik ru kigei ku kawasan penep. Pek mong numom pen de dapat naibeg kek hamapen ya rantei.

⁴ Ya jeoi kali ijog ru iteg birantei tapi kek dapat kigercat rantei ajeh ru kibergot besi ku ijog. Kek ihad kuat lei pek mong numom pen de dapat naiterhan kek.

⁵ Kelem yah kek kicip majeh-manen ku kawasan penep ru lod sambel kihai ru kipeluka iberog ya batu.

⁶ Bile kek kibakek Yesus ju kennyak, kek kijar kiderleh nu Yesus lalu kisujod ku Ingar.

^7-8 Yesus Kiurok nu kek, “Hei nyanik, hol ju sengoi adeh!” Ya suara de kuat sengoi ajeh kihai, “Hei Yesus Kenon Jenang de Paleng Tinggi Ikedudukan! Ma de Haha-beh nu eng doh? Ku kateh muh Jenang, eng ngsemanj agok Hasiksa eng!”

⁹ Yesus Kitanya nu kek, “Ma muh hek?” Sengoi ajeh kiberlag, “ ‘Legiun’ kerana jik adeh jijengoi.”

¹⁰ Nyanik-nyanik ajeh betol-betol naimerayu nu Yesus supaye pek Kior naihol ju kawasan ajeh.

¹¹ Pek nyak ju kenjeh mong nukenawat lek de tengah naicakcak ku beg lod.

¹² Nyanik-nyanik ajeh naimerayu nu Yesus, “Orloh jik jimuj nu kateh lek-lek ajeh.”

¹³ Yesus pen Kiog. Jadi, nyanik-nyanik ajeh pen naihol ju sengoi ajeh lalu naimuj nu kateh lek-lek ajeh. Dikdij lek ajeh naijar nu terap de jerek ru naitau nu kateh tasek lalu naicelog. Ijengoi lek de dat ajeh lebeh kurang due ribu ikor.

¹⁴ Mai de bejaga lek ajeh naineng dikdij hal de tejadi ajeh. Enai naijar naipasal hal ajeh nu sengoi-sengoi de ku pekan ru selai. Jadi, jeoi mai pen naihol naiha-neng ma de ya belaku.

¹⁵ Bile enai naiterbuk nu Yesus, naibakek sengoi de bisangrog ya nyanik ajeh nek tengah kigigei ru ya mong ileknog. Ipeniker pen ya bor. Dikdij mai de nengneng hal ajeh jadi naisengoh.

¹⁶ Mai de ya naineng pekare ajeh ju imula naipasal nu mai kilek ma de ya belaku nu sengoi de bisangrog ajeh ru nu lek-lek ajeh.

¹⁷ Telas naicerngai ma de ya tejadi ajeh, naisemanj Yesus Kidek ju daerah ajeh.

¹⁸ Mase Yesus Kihuj nu perahu, sengoi de bisangrog ya nyanik ajeh nek kimerayu kaha-joi Yesus.

¹⁹ Tapi Yesus pek Kiog ru Kiurok, “Jogloh nu peringak hek ru pasalloh nu enai ma de bibeh ya TUHAN nu hek ru begeiharok Kek Kiperneng Ineyayak nu hek.”

²⁰ Jadi, sengoi ajeh pen kiet nu seluroh kawasan Dekapolis ru kipasal dikdij ma de bibeh ya Yesus nu kek. Mai jengoi cengang empag enai naicerngai ma de kiurok.

Yesus Kiperbor Kenon Yairus ru Kerdor de Mong Penyaket Jekjot

²¹ Telas ajeh Yesus ru Ipengikot-pengikot naihuj perahu ru nailos nij nu englag Tasek Galilea. Bile nailei ku pajeh, mai jengoi naibekumpol ku kelileg Yesus ku beg tasek ajeh.

²² Lalu holloh numom pemimpen deg sembahyang. Kek imuh Yairus. Mase kek kineng Yesus, kek kisujod ku ngar Ijog.

²³ Kek kimerayu, “Kenon kerdor eng kaha-dat. Holloh nu madeg eng ru dekloh teg Jen ku kek supaye kek kibor ru lekat kisui!”

²⁴ Yesus pen Kiet besama ru sengoi ajeh. Mai de naijoi Yesus ihad jeoi lei Kek bipeit.

²⁵ Ku pajeh mong numom kerdor de ya 12 tahut kitanggong jekjot behip de pek behenti-henti de bepunca ju kibebehip.

²⁶ Kek ihad kimenderite ru ya kiperdij dikdij iharta ha benayar dokte tapi pek kibor ru gubetambah terok.

²⁷ Kek ya kicerngai tentang Yesus. Jadi, kek pen kimuj nu engkap mai jengoi ru kiperek nu celod Yesus ru kipep jubah Kek

²⁸ kerana kiserngik, “Amen had ngpep Ijubah taleh, ya tentu eng doh ngbor!”

²⁹ Bile kipep jubah Yesus, ku sarik jijeh ijeknot behip pen nyot ru kek kirasa iberog ya bor.

³⁰ Ku mase ajeh juga, Yesus Kisedar mong kuasa de ya kihol ju Ilei. Yesus Kiceleg nu mai jengoi ru Kitanya, “Bok de pep jubah Eng?”

³¹ Ipengikot-pengikot naiurok, “Nengloh mai jengoi naibekerumun ku kelileg Jen. Yama Jen tanya bok de pep Jen?”

³² Tapi Yesus Kiperceriak nu Ikelileg Kaha-kek sengoi de pep Kek.

³³ Kerdor ajeh kipanei ma de ya belaku ku ilei. Kek kikerog kerana kisengoh lalu kisujod ku ngar Yesus ru kipasal dikdij ma de ya kibeh.

³⁴ Yesus Kiurok nu kerdor ajeh, “Bong, kerana hapecaya nu Eng, hek ya habor. Ciploh ru sengik de aman kerana hek pek akan hanyik nij.”

³⁵ Tengah Yesus Kibelwal, hol memerip sengoi ju deg Yairus. Naipasal nu Yairus, “Kenon kerdor jen ya kidek hik. Wesloh agok jenpesusah ha Guru nij.”

³⁶ Yesus pek Kiirau ma de naiurok ru Kek Kibual nu Yairus, “Agok sengoh. Pecayaloh taleh nu Eng!”

³⁷ Lalu Yesus pen teros Kicip tapi pek Kiog bok-bok pen joi Kek kecuali Petrus ru nar mom tenek-menang. Ubai ajeh Yakobus ru Yohanes.

³⁸ Bile nailei ku deg Yairus, Yesus Kineng ikeadaan kelam-kabot ru renyah ya jengnam de ihad kuat.

³⁹ Lalu Yesus Kimuj ru Kiurok nu enai, “Yama de renyah ru yama engkejinjap? Sanget adeh pek kidat. Kek kibukbet taleh!”

⁴⁰ Tapi nailog ha Yesus. Telas Kek Kior naiet ju kenjeh, Kek Kien amek ru apak sanget ajeh ru nik mom Ipengikot muj nu kateh bilek sanget ajeh biperdak.

⁴¹ Yesus Kicap teg sanget ajeh lalu Kiurok, “Talitha kum!” de imaksod, “Bong, kosloh!”

⁴² Sanget ajeh pen kikos ku sarik jijeh lalu kicip (iumur 12 tahut). Dikdij enai ihad cengang empag enai.

⁴³ Tapi Yesus tegas Kiget naipasal pekare ajeh nu bok-bok pen. Telas ajeh Kek Kiurok, “Ogloh caknak nu sanget adeh.”