LUKAS 1 - Alkitab Engrok Hik

Imemula

^1-2 Teofilus de bihormat, Mong jeoi mai de naineng hal-hal de bibeh ya Yesus sejak Kimula Ipelayanan. Enai naipasal hal-hal ajeh nu mai kilek. Ru mai de naicerngai hal ajeh naicot tentang hal-hal de bibeh ya Yesus.

³ Eng juga ya ngsiasat dikdij hal ajeh sejak ju imemula, jadi ngrasa bor ngsusot ru ngcot teator cerite-cerite ajeh ha enjen juga

⁴ supaye jenpanei ma de ya bipasal nu enjen ajeh mimang benar.

Penasal tentang Yisnos Yohanes Pembaptis

⁵ Ku mase Raja Herodes Agong kijadi penguasa lengrik Yudea, mong numom imam agame Yahudi imuh Zakharia. Kek ju kumpulan imam Abia. Elisabet ajeh kenah Zakharia. Ubai ajeh kenon-cenok imam Harun.

⁶ Sinui ubai kenah-gengsir benar ku mat Jenang, ru baijoi dikdij hukom ru perintah TUHAN.

⁷ Tapi ubai pek bekenon kerana Elisabet manang ru liubai pen ya engrak.

⁸ Ku nanek arik, tiba giliran kumpulan Zakharia naibeh tugas imam ku Deg Jenang.

⁹ Mase ajeh, enai naibeundi naijoi kebiasaan de bibeh ya imam-imam, ru Zakharia bipileh supaye kimuj nu kateh Deg Jenang untok kijop kijai.

¹⁰ Sementare kijai bijop ha sembahyang, dikdij mai naibedoa ku luar.

¹¹ Ku sarik ajeh, malikat TUHAN kiperneng idiri nu Zakharia. Malikat ajeh kijinjeg ku englag kentop tempat teknod kijai.

¹² Mase Zakharia kineng, kek kikekjet ru kisengoh.

¹³ Tapi malikat ajeh kiurok, “Zakharia! Agok sengoh kerana Jenang ya Kicerngai doa hek. Kenah hek Elisabet doh kiperyos kenon keral. Hek hod hasebot imuh Yohanes.

¹⁴ Hek habesuka ru hakerakmik bile ya kiyos doh, ru jeoi mai juga doh naibesuka ha iyisnos

¹⁵ kerana ku mat TUHAN, kek doh kijadi sengoi de ihad penteng. Kek pek buleh kingut teu wain atao teu bel de kilek. Sejak ju kateh ked ikeneng, kek doh bikuasa ya Kelog Santen.

¹⁶ Kek doh kipimpen jeoi mai Israel naijekjog nu TUHAN Jenang liknai.

¹⁷ Ya kelog ru kuasa begei ha Nabi Elia, kek doh kicip canuk sebelom TUHAN. Kek doh kibeh sengik apak-amek naiberbor ru kekenon liknai, ru kibeh sengoi de pek taat naijog nu nong de benar. Begei ajehloh kek doh kipesiap nanek bangse ha TUHAN.”

¹⁸ Zakharia kiurok nu malikat ajeh, “Begeiharok ngha-panei hal ajeh doh kitejadi? Eng ya engrak, ru kenah eng pen ya lanjot iumur.”

¹⁹ Malikat ajeh kiberlag, “Eng Gabriel de selalo ngjinjeg ku ngar Jenang. Kekloh de Kior eng ngperlei gah bor adeh nu hek!

²⁰ Ma de ngpasal adeh doh betol kitejadi ku imase de ya bipetetap. Tapi kerana pek hapecaya, hek doh habisu ru pek dapat habelwal lei ma de ya ngpasal ajeh kitejadi.”

²¹ Sementare ajeh, mai jengoi ku luar lekat naipoj ha Zakharia ru enai ihad naihiran kerana kek ihad liu ku kateh Deg Jenang.

²² Mase kihol, kek pek dapat kibelwal nu enai. Kek kiog neuta ya iteg kerana kibisu. Bile mai ku pajeh naineng kek jadi begei ajeh, naipanei Zakharia mong kikep nengneng mase ku kateh Deg Jenang.

²³ Telas ya kipeselesei dij tempoh igiliran tugas ajeh, Zakharia pen kijog nu imadeg.

²⁴ Pek liu ju kenjeh, Elisabet ikenah ajeh kimakok ru lima gencek iluniu pek kihol nu luar deg.

²⁵ Kek kiurok, “TUHAN ya Kibeh hal adeh nu eng. Hunen Kek ya Kibeh bor nu eng. Neaep eng ku ngar mai jengoi ya Kipehapos.”

Gah tentang Yisnos Yesus

²⁶ Bile ya enam gencek Elisabet kimakok, Jenang Kior malikat Gabriel et nu pekan Nazaret ku lengrik Galilea.

²⁷ Malikat ajeh bior et nu numom menaleh de imuh Maria de ya kibetunang ru numom keral de imuh Yusuf ju kenon-cenok Raja Daud.

²⁸ Bile malikat ya kilei nu Maria, kek kiurok, “Salam nu hek, sengoi de ihad biberkat! TUHAN mong Kibesama hek!”

²⁹ Maria kirungseng bile kicerngai bengwal malikat ajeh ru kikerek ku isengik entah ma imaksod salam ajeh nek.

³⁰ Malikat ajeh kiurok nu kek, “Agok sengoh, Maria! Jenang Kibekenan nu hek.

³¹ Hek doh hamakok ru haperyos numom kenon keral ru hasebot Imuh Yesus.

³² Kek doh Kijadi numom Sengoi de agong ru Kek doh bigelar Kenon Jenang de Paleng Tinggi Ikedudukan. TUHAN Jenang doh Kipejadi Kek Raja begei Raja Daud Ijenang rak.

³³ Kek doh Kimemerintah bangse Israel lei ditehjeh. Kek doh Kimemerintah sebegei Raja lei ditehjeh.”

³⁴ Maria kiurok nu Malikat ajeh, “Eng pekseg ngbegengsir, jadi begeiharok hal ajeh buleh kitejadi?”

³⁵ Malikat ajeh kiberlag, “Kelog Santen doh Kibekerjak ku hek, ru kuasa Jenang de Paleng Tinggi Ikedudukan doh kikelimbog hek. Kerana ajehloh, Kenon de yos ajeh doh suci ru bigelar Kenon Jenang.

³⁶ Paneiloh! Sedara hek Elisabet de engrak ajeh pen ya kimakok. Kek manang tapi hunen kimakok ya enam gencek.

³⁷ Kerana, ku Jenang pek mong hal de mustahel.”

³⁸ Maria kiberlag, “Eng hambe TUHAN. Biarloh ma taleh de jenurok ajeh tejadi nu eng.” Telas ajeh malikat ajeh pen kiet ju Maria.

Maria Kisueg ha Elisabet

³⁹ Pek liu ju kenjeh, Maria gij-gij kiet nu nanek pekan ku kawasan berlod-lod de ku lengrik Yudea.

⁴⁰ Kek kiet nu deg Zakharia ru kiog salam nu Elisabet.

⁴¹ Mase Elisabet kicerngai salam ju Maria ajeh, ikenon de ku kateh iked pen kiloj, ru Elisabet bikuasa ya Kelog Santen.

⁴² Ru suara de kuat kibesurag, “Hekloh de paleng biberkat ku engkap dikdij kerdor! Kenon de haperyos doh pen biberkat juga!

⁴³ Eng ihad bihormat kerana keneng Tuhan eng kisueg ha eng de pek layak ngkep nehormat begei adeh!

⁴⁴ Telas taleh ngcerngai salam ju hek, kenon ku kateh ked eng kiloj kibesuka.

⁴⁵ Hek biberkat kerana hapecaya engrok TUHAN nu hek doh kitejadi!”

Penateh Maria

⁴⁶ Lalu Maria kiurok, “Sengik eng kipemulie ha TUHAN

⁴⁷ ru kelog eng kibesuka ha Jenang Peselamat eng,

⁴⁸ kerana Kek Kiingat ha eng, hambe Kek de hina! Ju hunen lei ditehjeh, dikdij mai doh naiurok eng sengoi de biberkat

⁴⁹ kerana Jenang de Bekuasa ya Kibeh hal de entoi ha eng. Suciloh muh Kek.

⁵⁰ Kiyayak mai de sengoh ru hormat ha Kek, ju nanek keturunan nu keturunan de kilek.

⁵¹ Kek Kiperneng Ikuasa ju Iteg. Kek Kibeh mai de sumbong naiceraklah ru Kipekacau nerancang enai.

⁵² Kek Kicerleh raja-raja ju tahte enai ru Kipetinggi mai de hina.

⁵³ Kek Kiperwas mai de cuag ya hal-hal de bor, tapi Kiperet mai kaya ru teg de kusong.

⁵⁴ Kek Kitulog Ihambe-hambe mai Israel kerana Kiingat ha Ijenanji nu enai.

⁵⁵ Kek ya Kibejanji Kaha-perneng Ineyayak nu Abraham ru nu ikenon-cenok lei ditehjeh!”

⁵⁶ Maria kigei ru Elisabet iluniu lebeh kurang nik gencek ru telas ajeh kijog nu imadeg.

Yisnos Yohanes Pembaptis

⁵⁷ Bile ya lei imase Elisabet kiperikyos, kek kiperyos numom kenon keral.

⁵⁸ Mase ijiran-jiran ru isesedara-mara naicerngai gah tentang TUHAN ihad Kiyayak ha Elisabet, enai turot naikerakmik ru kek.

⁵⁹ Mase umur sanget ajeh ya cukop lapan arik, enai naihol naiha-sunat ha sanget ajeh. Enai naiha-og imuh Zakharia begei muh iapak

⁶⁰ tapi iamek kiurok, “Wes! Imuh hod bisebot Yohanes.”

⁶¹ Naiberlag nu kek, “Tapi pek mong numom pen ju sesedara-mara hek imuh Yohanes.”

⁶² Lalu naibeh neuta naitanya nu apak sanget ajeh ha muh ikenon.

⁶³ Zakharia kisemanj papat ceknot lalu kicot, “Imuh Yohanes.” Hal ajeh kibeh dikdij mai naihiran.

⁶⁴ Ku sarik jijeh juga Zakharia dapat kibelwal semula ru kek pen mula kipateh ha Jenang.

⁶⁵ Dikdij ijiran naijadi sengoh ru gah tentang hal ajeh lei nu dikdij kawasan berlod-lod ku lengrik Yudea.

⁶⁶ Dikdij mai de cerngai gah ajeh naiserngik, “Entah ma sanget ajeh kijadi pigoi doh?” Naiserakngik begei ajeh kerana kuasa TUHAN mong kibeserta ru sanget ajeh.

Nubuat Zakharia

⁶⁷ Zakharia, apak sanget ajeh bikuasa ya Kelog Santen ru kibenubuat,

⁶⁸ “Beiloh hipateh TUHAN Jenang bangse Israel kerana Kek ya Kihol Kaha-tulog ru Kaha-terlas Isengoi-sengoi.

⁶⁹ Kiog hik Peselamat de bekuasa, numom ju kenon-cenok Raja Daud Ihambe ajeh

⁷⁰ kena begei de ya Kiurok melalui Inabi-nabi entem.

⁷¹ Kek doh Kipeselamat hik ju musoh-musoh hik, ru ju teg mai de naigetek ha hik.

⁷² Kek Kiyayak ha jenang rak hik ru Kiingat ha Ijenanji de suci ajeh.

⁷³ Kek Kibesumpah nu Abraham jenang rak hik begei adeh:

⁷⁴ Kek doh Kipeselamat hik ju musoh-musoh hik ru Kibeh hik hisembah ru pek hisengoh ha Kek,

⁷⁵ supaye hijadi suci ru benar ku mat Kek selame hisui.”

⁷⁶ Zakharia teros kibenubuat, “Hek kenon eng doh bigelar nabi de bingeng ya Jenang de Paleng Tinggi Ikedudukan kerana hek bingeng canuk supaye hasedia nong ha TUHAN

⁷⁷ ru hapasal nu Isengoi-sengoi tentang hal adeh: TUHAN doh Kipeselamat enai melalui Kiampon dosa enai.

⁷⁸ Kerana Jenang Kiyayak ha hik, mat arik doh kiterbet ru kihol nu hik ju langit

⁷⁹ kaha-sog dikdij mai de naisui ku kateh gengwer ru danan, ru kaha-pimpen hik nu nong de kituju nu neaman.”

⁸⁰ Kenon Zakharia ajeh guraknak ru isinui rohani pen gukuat. Kek kigei ku padag guron leiloh imase kiperneng idiri nu bangse Israel.