KISAH 1 - Alkitab Engrok Hik

¹ Teofilus de bihormat, Ku kateh kitab petame de ngcot, ya ngpasal dikdij hal de bibeh ru biajar ya Yesus, ju mase mula Ipelayanan

² leiloh ku arik Ilei biangket nu serga. Sebelom Yesus biangket nu serga, Kek Kiog Iperintah melalui kuasa Kelog Santen nu rasul-rasul de ya Kipileh.

³ Telas Kek bisiksa ru biperdat, Kek biberkos ju Idanan. Kek Kiperneng Idiri nu Irasul-rasul ajeh ru Kiog jeoi bukti untok Kaha-perneng Ilei ya Kisui nij. Selame 40 arik, jeoi kali Kek Kiperneng Idiri nu enai ru Kipasal tentang begeiharok Jenang Kimemerintah sebegei Raja.

⁴ Bile naicakcak besama, Yesus Kiog perintah adeh nu enai: “Agokloh dek ju kote Yerusalem tapi pojloh kurnie de ya bijanji ya Menek Eng. Eng ya Ngpasal nu engkek entem tentang kurnie ajeh.

⁵ Yohanes Pembaptis kibaptis mai ya teu tapi memerip arik nij engkek doh bibaptis ya Kelog Santen.”

Yesus Biangket nu Serga

⁶ Bile rasul-rasul naibekumpol besama ru Yesus, naibetanya nu Kek, “Tuhan, hunenka imase Jenha-perjeg semula kerajaan Israel?”

⁷ Yesus Kiberlag, “Engkek pek perlu engkepanei ha iarik atao imase de ya bipetetap ya Menek Eng kerana hal ajeh hak Kek.

⁸ Tapi doh engketerima kuasa bile Kelog Santen Kihol nu engkek. Lalu engkek doh engkejadi saksi Eng ku kote Yerusalem, ku dikdij lengrik Yudea ru Samaria, lei nu mol bumi.”

⁹ Telas Yesus Kiurok begei ajeh, Kek biangket nu serga sementare naineng ha Ilei. Lalu Kek bikelimbog ya sagop ru Kinyep ju nengneng enai.

¹⁰ Sementare enai lekat naineng ha Yesus biangket nu langit, aleh-aleh mong nar mom beleknog biyeg baijinjeg ku englag enai.

¹¹ Baiurok, “Mai Galilea, yama engkejinjeg ku padeh ru engkeceog nu langit? Yesus de biangket nu serga doh Kilos nij ru care de sama begei de engkeneng ajeh nek.”

Pengganti Yudas

¹² Lalu rasul-rasul ajeh nailos nu kote Yerusalem ju Lod Zaiton de kira-kira nanek kilometer inyaknak ju kote ajeh.

¹³ Bile ya nailei nu kote Yerusalem, naiet nu tempat de naiha-tumpang lalu naihuj nu bilek ku tingkat kemil. Ku pajeh mong Petrus, Yohanes, Yakobus, Andreas, Filipus, Tomas, Bartolomeus, Matius, Yakobus kenon Alfeus, Simon (de bigelar juga Patriot de pernah kijoi mai Israel kilek naiha-lawan penjajah Rom), ru Yudas kenon Yakobus.

¹⁴ Dikdij enai selalo naibesama sengik naibekumpol ru naibedoa besama mabek kekerdor, Maria amek Yesus, ru memenang Yesus.

¹⁵ Ku nanek arik, kira-kira 120 urag mai de pecaya nu Yesus naibekumpol. Petrus pen kijinjeg ru kiurok,

¹⁶ “Sesedara seiman! Ma de ya bicot tentang Yudas ku kateh Alkitab mimang patot kitejadi. Manah entem Kelog Santen Kipasal melalui empag Raja Daud tentang Yudas. Kek kipimpen kumpulan sengoi de cekcap Yesus.

¹⁷ Yudas ajeh numom ju lihik ru kimelayani besama ru hik entem.”

¹⁸ (Yudas kibeli nupenadag tik ya upah de kiterima ju ibahneh jehat. Ku pajeh kiyog lalu kidat. Iked tebaklah lei icong ej teburei.

¹⁹ Dikdij sengoi de gigei ku kote Yerusalem naicerngai gah ajeh, jadi ku kateh engrok Ibrani, enai naisebot tik ajeh ‘Akeldama’ de imaksod ‘Tik Behip.’)

²⁰ Petrus kiurok nij, “Hal ajeh belaku kerana ku kateh kitab Mazmur mong bicot, ‘Biarloh ideg jadi kusong, agokloh tempat ajeh bigei ya sengoi.’ Mong juga bicot, ‘Hodloh sengoi kilek naikot ikerjak.’

²¹ Kerana ajeh, hod mong numom kimuj nu jik sebegei saksi tentang Tuhan Yesus de ya Kikos ju Idanan. Sengoi ajeh hodloh numom ju sengoi de sentiase besama ru hik ku mase hijoi Tuhan Yesus nu dikdij tempat.

²² Kek hodloh numom ju sengoi de ya kijoi hik sejak Yohanes Pembaptis kibaptis sengoi lei nu arik Yesus biangket nu serga.”

²³ Mai de mong ku pajeh naicadang nar mom: Matias ru Yusuf. Yusuf juga bisebot Barsabas atao Yustus.

^24-25 Lalu naibedoa begei adeh: “Tuhan, Jenloh de bepanei ha sengik dikdij mai. Yudas ya kiwes ikerjak sebegei rasul ru ya kiet nu tempat de ya bipileh ha kek. Pernengloh ilei belok ju engkap nar mom adeh doh de Jenpileh ha genanti Yudas.”

²⁶ Lalu naicabot undi ru Matias tepileh kijadi rasul ha miknuj nu 11 urag rasul de kilek ajeh.