IBRANI 1 - Alkitab Engrok Hik

Jenang Kibelwal melalui IKenon

¹ Ku jaman entem, ya jeoi kali Jenang Kibelwal nu jenang rak hik melalui Inabi-nabi Kiguna bemacam jenis care.

² Tapi ku aher jaman adeh, Jenang Kibelwal nu hik melalui IKenon. Jenang ya Kipetetap IKenon ajehloh de bewares dikdij ma de mong. Melalui IKenon ajehloh Jenang ya Kicipte alam semeste.

³ Melalui IKenon ajehloh hik buleh hineng kemuliean Jenang ru IKenon ajeh juga de betol-betol sama begei ha Ilei. IKenon ajeh Kipelihara alam semeste Kiguna Ibengwal de bekuasa. Telas Kek Kidat supaye dosa-dosa manusia biampon, Kek Kigei ku kedudukan de tehormat ku englag kentop Jenang de Ihad Agong ku serga.

Kedudukan Yesus Lebeh Tinggi daripade Malikat

⁴ Hal ajeh kiperneng IKenon ajeh lebeh bekuasa daripade malikat-malikat, ru begei ajehloh juga Imuh de biog ya Jenang pen lebeh tehormat daripade muh malikat-malikat.

⁵ Jenang pek pernah Kiurok nu belok-belok Imalikat begei adeh: “Hekloh Kenon Eng. Ku arik adeh Eng Ngjadi Menek Hek.” Jenang pek pernah juga Kiurok nu belok-belok pen Imalikat begei adeh: “Eng doh Ngjadi IMenek ru Kek doh Kijadi Kenon Eng.”

⁶ Tapi ku mase Jenang Kingeng IKenon sulog nu dunia adeh, Kek Kiurok, “Dikdij malikat mesti naisembah Kek.”

⁷ Mengenai Imalikat-malikat Jenang Kiurok, “Eng Ngbeh malikat-malikat Eng begei pinoi ru Ngbeh hambe-hambe Eng begei derner os.”

⁸ Tapi mengenai IKenon ajeh Jenang Kiurok, “Hekloh Jenang de doh memerintah lei ditehjeh, Hek doh Raja de adel de Hamemerintah sengoi-sengoi Hek.

⁹ Hahod ha hal de benar tapi Hagetek ha jenghat. Ajehloh isebab Eng Jenang Hek Ngpileh Hek ru Ngog nehormat de kipetiba keremmik de lebeh entoi daripade keremmik kekawat LiHek.”

¹⁰ Jenang juga Kiurok nu IKenon begei adeh: “Hekloh Tuhan de becipte bumi mase ku imula-mulajeh ru de bahbeh langit ya teg LiHek Sendiri.

¹¹ Dikdij ajeh doh kinyep ru doh kirepot begei ha baju. Tapi Hek Sendiri lekat mong lei ditehjeh.

¹² Langit ru bumi adeh doh Halipat begei ha baju de biha-pej ru doh Haganti ya baju pai. Tapi LiHek lekat pek beubah. Sinui Hek pek dij-dij lei ditehjeh.”

¹³ Jenang pek pernah Kibual nu belok-belok pen Imalikat begei adeh: “Geiloh ku kedudukan de tehormat ku englag kentop Eng lei Ngbeh musoh-musoh Hek naijadi nelapek jog Hek.”

¹⁴ Amen begei ajeh, malikat-malikat ajeh sebenarnye ma? Enai ajeh had kelog-kelog taleh de naimelayani Jenang. Enai bingeng ya Jenang untok naimelayani manusia de doh bipeselamat.