FILIPI 1 - Alkitab Engrok Hik

¹ Surat adeh ju eng Paulus ru Timotius. Jar adeh hambe-hambe Kristus Yesus. Surat adeh ngtuju nu sengoi-sengoi Jenang ku kote Filipi de engkebenanek ru Kristus Yesus. Ngtuju juga surat adeh nu pemimpen-pemimpen jemaah ru penulog-penulog jemaah.

² Semoge Jenang Menek hik ru Tuhan Yesus Kristus Baiog berkat ru neaman nu engkek.

Doa Paulus ha Jemaah-jemaah ku Kote Filipi

³ Eng ngbesyukor nu Jenang tiap kali ngteingat tentang engkek.

⁴ Ru jap kali ngbedoa ha engkek, eng selalo ngbedoa ru keremmik.

⁵ Eng ngkerakmik kerana engketulog eng leiloh hunen sejak ju arik petame engkecerngai Gah Bor.

⁶ Eng ngyaken tentang hal adeh: Jenang de bemula kerjak bor ku diri engkek doh teros Kibekerjak lei dij ku Arik Kristus Yesus Kilos nij nu dunia adeh.

⁷ Ya mimang patot ngkerakmik tentang engkek kerana eng ihad nghok ha engkek. Mase eng ku kateh jel, eng ngbele ru ngpejelas Gah Bor ajeh betol. Jenangloh de Kipebuleh hik sama-sama hikerakjak ku kateh kerjak perenglei Gah Bor ajeh.

⁸ Jenang Kipanei eng ihad ngha-buruk nij ha engkek kerana eng nghok ha engkek sama begei Kristus Yesus Kihok ha engkek.

⁹ Eng ngbedoa supaye gulebeh engkehakhok ru supaye gulebeh engkepanei ru engkepaham begeiharok engkehakhok ratak liengkek.

¹⁰ Amen begei ajeh, engkek doh dapat engkepileh ma de bor, ru pek engkebedosa ru engkebesalah leiloh ku Arik Kristus Yesus Kilos nij nu dunia adeh.

¹¹ Sinui engkek doh tebeg ya bahneh de benar kerana Yesus Kristus talehloh de dapat Kibeh engkejadi begei ajeh. Amen sinui engkek begei ajeh, Jenang doh bipemulie ru bipateh.

Sinui ha Kristus

¹² Sesedara seiman, eng nghod engkepanei tentang hal adeh: Dikdij ma de ya tejadi ku eng kibeh gulebeh jeoi mai de pekseg pecaya naicerngai ru naipecaya nu Gah Bor.

¹³ Dikdij pengawal istane ru sengoi-sengoi kilek naipanei eng bijel kerana ngkerakjak ha Kristus.

¹⁴ Kerana eng bijel, jeoi sesedara seiman naijadi yaken nu Tuhan ru gumaken berani naiperlei Gah Bor, langsong pek naisengoh.

¹⁵ Mimang mong ju enai ajeh de naiperlei Gah Bor kerana naiiri sengik ha eng ru naiha-besaeng ru eng. Tapi mong juga mai kilek de naiperlei Gah Bor ya niat de bor

¹⁶ ru enai ajeh naiperlei Gah Bor kerana naihok ha eng ru naipanei tentang hal adeh: Jenang Kibeh eng bijel supaye ngbele Gah Bor.

¹⁷ Mai kilek naiperlei Gah Bor ya niat de niknej untok kepentengan liknai sendiri. Bile naibeh begei ajeh, naisangka eng lebeh ngsusah sengik nij ku kateh jel adeh.

¹⁸ Tapi pek ma! Asalkan Gah Bor tentang Kristus biperlei pek kira ma-ma pen icare, iniat borka tok, eng lekat ngkerakmik. Eng lekat ngkerakmik

¹⁹ kerana ngpanei eng doh biterlas ya doa engkek ru ya tenulog Kelog Santen ju Yesus Kristus.

²⁰ Eng betol-betol ngbeharap eng pek ngselsel ku kateh dikdij hal. Tapi eng nghod diri eng berani belwal begei biasa. Eng juga nghod Kristus bipetinggi ya dikdij ma de ngbeh, pek kira ngsuika ngdat.

²¹ Kerana ku eng, eng ngog sinui eng adeh supaye Kristus bipetinggi. Amen ngdat, lebeh untong nij kerana eng doh besama ru Tuhan.

²² Amen lekat ngsui ku dunia adeh, eng buleh ngbeh lebeh jeoi nij kerenjak de behasel ha Tuhan. Jadi, belok nanek de ngha-pileh pen pek ngpanei!

²³ Ihad susah ngha-pileh kek belok nanek. Eng betol-betol nghod ngha-dek dunia adeh ru nget nu Kristus kerana hal ajehloh de lebeh bor.

²⁴ Tapi kerana engkek lekat engkeperlukan eng, lebeh bor amen lekat nggei ku dunia adeh.

²⁵ Eng ngyaken tentang hal ajeh. Kerana ajeh, eng ngpanei eng doh lekat ngsui ru nggei besama ru engkek supaye gumaken engkekerakmik engkepecaya nu Kristus.

²⁶ Bile eng ngjog nu engkek nij, engkek doh gulebeh engkebangge tentang Kristus Yesus kerana eng.

²⁷ Adehloh hal de paleng penteng: Sinui engkek hodloh kena ru Gah Bor tentang Kristus. Pek kira bulehka tok ngbebakek ru engkek nij, amen engkesui begei ajeh, eng doh lekat ngcerngai gah de kiurok engkek lekat engkejinjeg tegak ru engkebenanek sengik untok engkebele iman de beasal ju Gah Bor.

²⁸ Agokloh sengoh nu mai de belawan ha engkek. Pekerwatloh sengik engkek. Amen engkebeh begei ajeh, engkek doh engkeperneng nu enai tentang hal adeh: Jenang doh Kipealah ha enai ru Kipeselamat ha engkek.

²⁹ Kerana ya Ibernor, Jenang ya Kipileh engkek apeka supaye engkepecaya taleh tapi juga supaye engketesiksa ha Kristus.

³⁰ Hunen, engkek juga engkerasa seniksa de pernah ngrasa. Engkek juga lekat engkecerngai ngtesiksa lei hunen.