FILEMON 1 - Alkitab Engrok Hik

Salam

^1-2 Eng Paulus de bijel kerana ngperlei Gah Bor tentang Kristus Yesus, ru sedara seiman hik Timotius jarcot surat adeh nu hek Filemon kawat sekerjak jar de jarhok. Jartuju juga surat adeh nu sedara seiman hik Apfia, nu Arkhipus de kikerakjak ha Kristus begei ha hik, ru nu jemaah-jemaah de selalo naibecatuk ku deg hek.

³ Semoge Jenang Menek hik ru Tuhan Yesus Kristus Baiog berkat ru neaman nu engkek.

Haknok ru Iman Filemon

⁴ Filemon, eng selalo ngbesyukor nu Jenang tiap kali ngingat tentang hek ku kateh doa eng.

⁵ Ngbesyukor kerana ngcerngai hek betol-betol hapecaya nu Tuhan Yesus ru hek hahok dikdij sengoi-sengoi Jenang.

⁶ Eng ngdoa supaye hubungan hik sebegei sesedara seiman kibeh penanei engkek tentang dikdij berkat gujerek. Hikep dikdij berkat ajeh kerana hibenanek ru Kristus.

⁷ Filemon, haknok hek nu sengoi-sengoi Jenang kibeh eng senang sengik ru kiog kengwat nu eng kerana hek ya hahibor sengik sengoi-sengoi Jenang.

Semmanj Tenulog tentang Onesimus

⁸ Filemon, ya kerana haknok hek ajeh, eng ngsemanj tenulog nu hek. Sebenarnye sebegei sedara seiman, eng buleh ngor hek habeh pekare de mesti habeh.

⁹ Tapi kerana haknok eng nu hek, eng ngsemanj taleh nu hek. Eng adeh ya engrak ru hunen bijel kerana ngperlei Gah Bor tentang Kristus Yesus.

¹⁰ Eng ngsemanj tenulog tentang Onesimus. Eng nganggap kek sebegei kenon eng kerana kipecaya nu Kristus melalui ma de ngajar mase eng ku kateh jel.

¹¹ Entem, kek pek beguna nu hek tapi hunen kek beguna pek taleh nu hek tapi nu lieng juga.

^12-13 Eng ihad nghok ha Onesimus. Sebenarnye eng nghod kek kigei besama ru eng selame eng lekat bijel. Eng bijel kerana ngperlei Gah Bor. Kek buleh kitulog eng kateh dikdij hal sebegei pengganti diri hek tapi ngor kijog nu hek.

¹⁴ Eng ngnyek paksa hek. Eng lebeh nggemar hek habeh hal ajeh ya sengik de rele. Kerana ajeh, eng ngnyek beh ma-ma amen pek hasetuju.

¹⁵ Mungken Onesimus kiceraklah ju hek had sementare waktu taleh supaye kijog ru kigei besama ru hek lei ditehjeh.

¹⁶ Kek hunen pek taleh hambe, tapi lebeh ju kenjeh. Kek sedara seiman hik de hihok. Kek ihad beguna nu eng, ma nij nu hek! Tentu kek ihad beguna pek taleh sebegei hambe tapi juga sebegei numom sedara de kipecaya nu Tuhan!

¹⁷ Kerana ajeh, amen hek haanggap eng sebegei kawat sekerjak hek, terimaloh kek sama begei haterima eng.

¹⁸ Amen kek kibesalah atao kiberdes ku hek, eng de betanggong dikdij ajeh.

¹⁹ Eng Paulus ngcot engrok adeh ya teg lieng sendiri. Eng doh ngperdij des ajeh. (Lihek sendiri ya hapanei des hek adeh: Hek hakep sinui pai melalui Gah Bor de ngperlei nu hek entem.)

²⁰ Jadi, Filemon, tulogloh eng ru pesenangloh sengik eng sebegei sedara seiman ku kateh Kristus.

²¹ Ku mase eng ngcot surat adeh, eng ngyaken tentang hal adeh: Hek pek taleh doh hajoi semmanj eng, tapi doh habeh lebeh daripade ma de ngsemanj.

²² Nanek hal nij, tulog sedia nanek bilek ha eng ku deg hek kerana eng ngbeharap Jenang doh Kicerngai doa engkek supaye ngjog nij nu engkek.

Salam Ipenyudah

²³ Epafras bijel besama ru eng kerana kiperlei Gah Bor tentang Kristus Yesus. Kek kiperlei isalam nu engkek.

²⁴ Markus, Aristarkhus, Demas, ru Lukas juga naiperlei salam nu engkek. Enai ajeh kekawat sekerjak eng.

²⁵ Semoge Tuhan Yesus Kristus Kiberkat dikdij liengkek.