EFESUS 1 - Alkitab Engrok Hik

¹ Surat adeh ju eng Paulus de ngjadi rasul Kristus Yesus ya heknod Jenang. Surat adeh ngtuju nu sengoi-sengoi Jenang ku kote Efesus, de setie nu Kristus Yesus.

² Semoge Jenang Menek hik ru Tuhan Yesus Kristus Baiog berkat ru neaman nu engkek.

Berkat Rohani Kateh Kristus

³ Beiloh hipateh Jenang. Ilei ajeh Jenang ru Menek nu Tuhan hik Yesus Kristus. Kerana hibenanek ru Kristus, Jenang ya Kiberkat hik ya dikdij berkat rohani ku serga.

⁴ Sebelom dunia adeh bibeh, Jenang ya Kipileh hik supaye hijadi hak Ilei melalui sinui hibenanek ru Kristus. Kek Kibeh begei ajeh supaye hijadi suci ru pek besalah ku ngar Ilei. Kerana Ihaknok,

⁵ Jenang ya Kibeh keputusan Kaha-angkat hik hijadi Ikekenon melalui ma de bibeh ya Yesus Kristus ha hik. Hal ajehloh Iheknod ru de kipesenang Isengik.

⁶ Jadi, beiloh hipateh Jenang kerana Ibernor sengik de ihad entoi de Kiog pecume nu hik melalui IKenon de Kihok!

⁷ Kerana Kristus Kidat ha hik, hik ya biterlas ju dosa ru dosa hik ya biampon. Ihad entoi bernor sengik Jenang

^8-9 de Kiog nu hik lei melimpah-limpah! Ru Isenang sengik, Kek Kibeh hipanei tentang Inerancang de Kirahsie canukjeh. Kek Kaha-peselesei Inerancang ajeh melalui Kristus

¹⁰ bile ya cukop imase. Adehloh Inerancang ajeh: Kek Kaha-pejadi Kristus ajeh kui nu dikdij ma de mong ku serga ru ku bumi.

¹¹ Jenang Kibeh dikdij hal Kijoi nerancang ru keputusan Ilei sendiri. Melalui sinui de jibenanek ru Kristus, Jenang ya Kipileh jik mai Yahudi ju imemula lagi

¹² supaye jik de canuk de beharap nu Kristus jipateh ha kemuliean Jenang.

¹³ Engkek mai pek Yahudi juga engkejadi hak Jenang bile engkecerngai neajar de benar. Neajar ajeh Gah Bor de kipeselamat engkek. Bile engkepecaya nu Kristus, Jenang Kiog Kelog Santen de ya Kijanji nu engkek untok Kiperneng engkek ajeh hak Ilei.

¹⁴ Kelog Santen ajeh jenamin tentang hal adeh: Hik doh hikep ma de bijanji ya Jenang lei ku mase Isengoi-sengoi bitebos ku arik kiamat. Beiloh hipateh ha kemuliean Jenang!

Doa Paulus

¹⁵ Kerana ajeh, telas ngcerngai gah tentang iman engkek nu Tuhan Yesus ru gah tentang haknok engkek nu dikdij sengoi-sengoi Jenang,

¹⁶ eng pek behenti-henti ngbesyukor nu Jenang kerana engkek. Eng juga selalo ngbedoa ha engkek.

¹⁷ Jenang ajeh Menek de mulie ru Jenang nu Tuhan hik Yesus Kristus. Ngsemanj nu Jenang supaye Kiog IKelog de Kibeh engkecerdeg ru de Kiperneng Jenang nu engkek lei lebeh engkekenal ha Ilei.

¹⁸ Ngsemanj juga Jenang Kibuka peniker engkek supaye engkepanei ha neharap de Kiog bile Kicereg engkejadi hak Ilei, ru supaye engkepanei juga ihad bor ru entoi berkat de Kiog doh,

¹⁹ ru supaye engkepanei juga ihad entoi Ikuasa de kitulog hik de pecaya nu Kristus. Kuasa ajeh sama ru kuasa

²⁰ de Kiguna bile Kiberkos Kristus ju Idanan ru Kipergei Kek ku kedudukan de tehormat ku Ienglag kentop ku serga.

²¹ Ku Iginei ajeh, Kristus lebeh bekuasa daripade dikdij malikat, kelog-kelog, ru pangkat de mong ku manusia, baik ku jaman hunen atao pigoi doh juga.

²² Jenang Kidek dikdij ma de mong nu kerop kuasa Kristus, ru Kipejadi Kristus kui nu dikdij ma de mong ru juga kui nu Ijemaah-jemaah.

²³ Ijemaah-jemaah ajeh berog Kristus, ru Kristus Kiterbeg Iberog ajeh ya Ikuasa. Kristusloh de Kiterbeg dikdij ma de mong ku dunia adeh ya Ikuasa.