2 TIMOTIUS 1 - Alkitab Engrok Hik

Salam

¹ Surat adeh ju eng Paulus de ngjadi rasul Kristus Yesus kerana heknod Jenang. Eng bingeng untok ngperlei gah tentang sinui de bijanji ya Jenang. Sinui ajeh hiterima kerana hibenanek ru Kristus Yesus.

² Ngcot surat adeh nu hek Timotius kenon eng de nghok. Semoge Jenang Menek hik ru Kristus Yesus Tuhan hik Baiog berkat, neyayak, ru neaman nu hek.

Paulus Kigalak Timotius

³ Timotius, eng ngbesyukor nu Jenang tiap kali ngingat tentang hek ku kateh doa eng pek kira yahka kelem. Eng ngsembah Jenang ya sengik de berseh begei de bibeh ya jenang rak eng.

⁴ Bile ngteingat ha jengnam hek mase harceraklah, eng ihad ngha-gubakek hek supaye betol-betol ngkerakmik nij.

⁵ Ngbesyukor kerana ngingat hek betol-betol hapecaya nu Kristus Yesus begei iman de mong canuk ku kateh engjop hek Lois ru amek hek Eunike. Ngyaken hek juga mong iman de begei ajeh.

⁶ Kerana ajeh, eng ngpeingat hek supaye selalo haguna kurnie ju Jenang de hakep ku mase ngdek teg eng ku kui hek.

⁷ Kelog de biog ya Jenang ajeh pek Kibeh hijadi kalok tapi Kiog hik kuasa, haknok, ru dapat hiterhan ha heknod diri.

⁸ Jadi, wes agok selsel haog kesaksian tentang Tuhan hik, ru juga agok selsel tentang eng de bijel kerana ngperlei Gah Bor tentang Kristus. Tapi ya kengwat de biog ya Jenang, hodloh hek turot hatempeh seniksa besama ru eng untok hiperlei Gah Bor.

⁹ Jenang Kipeselamat ru Kicereg hijadi Isengoi-sengoi de suci, pek kerana ma de ya hibeh tapi kerana Itujuan ru Ibernor sengik. Sebelom dunia adeh bibeh, Kek ya Kirancang Kaha-perneng Ibernor sengik nu hik melalui Kristus Yesus.

¹⁰ Hunen, Jenang ya Kiperneng Ibernor sengik nu hik melalui helnol Kristus Yesus Peselamat hik. Kristus ya Kipealah kuasa danan ru Kiperneng sinui de lei ditehjeh melalui Gah Bor ajeh.

¹¹ Jenang ya Kilantek eng ngjadi rasul ru guru de beperlei Gah Bor.

¹² Ajehloh isebab eng ngtanggong dikdij seniksa ku jel adeh. Tapi eng pek ngselsel kerana eng ngkenal Bok de ngpecaya. Kekloh Jenang de engog tanggongjawab nu eng untok ngperlei Gah Bor. Ngyaken Kek Kibekuasa Kijaga ma de ya Kiog nu eng lei ku Arik Tuhan Kihol nij.

¹³ Joiloh betol-betol neajar de benar de ya ngajar nu hek. Behloh dikdij ajeh ya iman ru haknok de mong ku hik kerana hibenanek ru Kristus Yesus.

¹⁴ Jagaloh abor neajar de beharga ajeh ya tenulog Kelog Santen de Kisui ku kateh hik. Neajar ajeh biog ya Jenang nu hek.

¹⁵ Hek ya hapanei tentang hal adeh: Dikdij mai ku lengrik Asia ya naidek eng temasok Figelus ru Hermogenes.

^16-18 Tapi Onesiforus selalo kipelega sengik eng. Kek pek kiselsel hamapen eng bijel. Bile kilei ku kote Rom, kek kikek ha eng lei kibakek. Hek pen hapanei Onesiforus selalo kitulog eng mase eng ku kote Efesus entem. Semoge Tuhan Kiperneng Ineyayak nu peringak Onesiforus, ru semoge TUHAN Kiperneng Ineyayak nu kek ku arik Kipeadel dikdij manusia.