Эстер 1 - Тхьэм и ГущыӀ

Апэрэ шъхьэр Персие пачъыхьэмрэ ащ игуащэрэ ешхэ ешъохэр зэрашӀыгъэр

¹ Мары Ахъашурэщ зыщыпсэущтыгъэ мафэхэм къэхъугъэр. Ахъашурэщ Индием щегъэжьагъэу Кущ нэсэу хэкуишъэрэ тӀокӀырэ блырэмэ пачъыхьагъур ащиӀыгъыгъ.

² А мафэхэм пачъыхьэм итахътэ Персием ит пытапӀэу Шушан щыӀагъ.

³ Тетыгъор зиӀыгъым иящэнэрэ илъэс зэкӀэ пщыхэм, ихэкумэ тетыгъор ащызыӀыгъхэм, Персием, Мадайм ядзэхэм япащэхэм, ӀэнатӀэкӀэ ахэӀэтыкӀыгъэхэм, къулыкъушӀэхэм ащ ешхэ ешъошхо афишӀыгъ.

⁴ Ипачъыхьагъу мылъкушхоу илъымрэ ежь ипачъыхьэ щытхъушхорэ мэфишъэрэ тӀокӀиплӀырэм къыкӀоцӀ аригъэлъэгъугъ.

⁵ А мафэхэр зытекӀыхэм, зэкӀэ ицӀыфхэу Шушан пытапӀэм дэсхэм, цӀыф къызэрыкӀохэми хэӀэтыкӀыгъэхэми апае, мэфибл ешхэ ешъо ипачъыхьэ щагушхо чъыг хатэу дэлъым ащыфишӀыгъ.

⁶ Щагур бзыуцыфым хэшӀыкӀыгъэ пэӀухъо шхъуантӀэхэмрэ фыжьыхэмрэкӀэ гъэкӀэрэкӀагъэу щытыгъ. А пэӀухъохэр кӀэпсэжъые плъыжь чӀапцӀэхэмкӀэ ыкӀи фыжьхэмкӀэ мыжъоф пкъэухэм апылъ тыжьын хъурджанэхэм апылъэгъагъэх. Дышъэмрэ тыжьынымрэ ахэшӀыкӀыгъэ тегъолъхьапӀэхэр щагум щагъэуцугъэх. А щагум мыжъо шӀуцӀэхэр, плъыжьхэр, фыжьхэр, налмэс налкъутэр зыхэгъэпкӀэгъэхэ джэхашъо иӀагъ.

⁷ Дышъэ Ӏэгубжъэ зэфэшъхьафхэм пачъыхьэм иунашъокӀэ санэр шъхьамысхэу къафырагъахъощтыгъ.

⁸ Хэтрэ хьакӀи зэрэфаеу ешъон фитыгъ; зыми ригъэзыщтыгъэхэп, сыда пӀомэ пачъыхьэм ихэгъырэймэ унашъо афишӀыгъагъ шъхьадж зэрэфаем тетэу дэзекӀонхэу.

⁹ А мэфэ дэдэхэм пачъыхьэ гуащэу Уаштый пачъыхьэу Ахъашурэщ иунэ бзылъфыгъэхэм апае ешхэ ешъошхо щишӀыгъ.

Пачъыхьэ гуащэу Уашти пачъыхьэу Ахъашурэщ зэремыдэӀугъэр

¹⁰ Яблэнэрэ мафэм, пачъыхьэм ыгу санэм къызегъэчэфым, ащ ариӀуагъ Мехьумэн, Бизтэ, Хъарбон, Быхътэ, Абахътэ, Зэтар, Къэркас – евнух нэбгыриблэу пачъыхьэу Ахъашурэщ ежь ышъхьэкӀэ фэлажьэщтыгъэхэм –

¹¹ пачъыхьэ гуащэу Уаштый пачъыхьэ паӀори щыгъэу ыпашъхьэ къыращэнэу. Ар дэхэ дэдэу щытыгъэти, ащ идэхагъэ цӀыфхэми ӀэнатӀэкӀэ хэӀэтыкӀыгъэхэми аригъэлъэгъу шӀоигъуагъ.

¹² Пачъыхьэм иевнуххэм афишӀыгъэ унашъом пачъыхьэ гуащэу Уаштый едэӀунэу фэягъэп. Арыти пачъыхьэр лъэшэу губжыгъэ, машӀом фэдэу къызэкӀэнагъ.

¹³ ЕтӀанэ пачъыхьэм иупчӀэжьэгъухэм зафигъэзагъ – хабзэхэмрэ фитыныгъэхэмрэ зышӀэхэрэм яупчӀыжьэу ихэбзагъэти.

¹⁴ А лъэхъаным ащ нахь къыпэблагъэу щытыгъэхэр: Къарщэн, Щэтар, Адматэ, Тарщыщ, Мэрэс, Марсэн, Мэмухъан – Персиемрэ Мадаимрэ япщыхэу пачъыхьэм ыпашъхьэ занкӀэу ихьанхэ алъэкӀынэу ыкӀи пачъыхьагъум апэрэхэу исыгъэхэр арых.

¹⁵ «Хабзэм тетэу сыдэущтэу удэзекӀон фая пачъыхьэ гуащэу Уаштый, пачъыхьэм иевнуххэм ащ фаригъэшӀыгъэ унашъор зэримыгъэцэкӀагъэм пае?» – ар яупчӀыгъ.

¹⁶ Пачъыхьэмрэ пщыхэмрэ апашъхьэ Мэмухъан къыщиӀуагъ: «Пачъыхьэ гуащэу Уаштый пачъыхьэ закъор арэп зыпашъхьэ щымысэр, ӀэнатӀэкӀэ хэӀэтыкӀыгъэхэми пачъыхьэу Ахъашурэщ ихэку пстэуми ащыпсэурэ цӀыфхэми апашъхьэ щымыс нахь;

¹⁷ сыда пӀомэ пачъыхьэ гуащэм ышӀагъэм икъэбар лӀы зиӀэ бзылъфыгъэ пстэуми алъыӀэсыщт. Хъулъфыгъэмэ аӀощт: „Пачъыхьэу Ахъашурэщ игуащэ къыфащэнэу унашъо ышӀыгъ, ау ар къафэкӀуагъэп“. Ар яушъхьагъоу бзылъфыгъэмэ ялӀыхэр пхъэтэпэмыхь ашӀын алъэкӀыщт.

¹⁸ Непэ шъыпкъэми Персиеми Мадаими япщы гуащэхэм, пачъыхьэ гуащэм изекӀуакӀэ зызэхахкӀэ, джа дэдэр пачъыхьэм ипщы пстэуми араӀоу хъущт; зэщыхьани, гухэкӀи къыхэкӀыщт.

¹⁹ Пачъыхьэм игъоу елъытэмэ, пачъыхьэ унашъо ащ къыдерэгъэкӀ, ар Мадаими Персиеми яхабзэмэ ахэтхагъэ орэхъу зэбламыхъужьынэу – Уаштый пачъыхьэм ащ нахьыбэрэ ыпашъхьэ къихьан фимытэу, пачъыхьэ гуащэм фашӀырэ фитныгъэхэр ащ нахь бзылъфыгъэ дэгъу горэм пачъыхьэм ферэгъаз.

²⁰ Пачъыхьэм иунашъо ащ ипачъыхьагъу ины тыдэкӀи зыщызэхахыкӀэ, зэкӀэ бзылъфыгъэхэр ялӀыхэм ядэӀущтых, анахь хэӀэтыкӀыгъэм щегъэжьагъэу анахь къызэрыкӀом нэсыжьэу».

²¹ А гущыӀэр пачъыхьэми пщыхэми агу рихьыгъ; арыти пачъыхьэр Мэмухъан игущыӀэ тетэу зекӀуагъэ.

²² Хэку пэпчъ тхакӀэу илъымкӀэ ыкӀи лъэпкъэу ис пэпчъ ыбзэкӀэ тхыгъэу – лӀы пэпчъ иунэ щызиусхьанынэу раӀозэ, пачъыхьэм ихэку пстэуми тхылъхэр арагъэхьыгъэх.