Даниел 1 - Тхьэм и ГущыӀ

Даниелрэ ишъэогъухэмрэ якъэбар (1:1-рэ – я 6:28-рэ шъхьэхэр) Апэрэ шъхьэр Пачъыхьэу Нэбухэднэцар икъэлэсэрай щыӀэгъэ кӀэлакӀэхэр

¹ Ехъуд хэкум пачъыхьэу Ехъоекъым тетыгъор зыщиӀыгъыгъэм иящэнэрэ илъэс Бабилэн пачъыхьэу Нэбухэднэцар Ерусэлэм къекӀуи, къалэр къыдзыхьагъ.

² Тхьэу Зиусхьаным Ехъуд хэкум ипачъыхьэу Ехъоекъым Нэбухэднэцар ыӀэ рилъхьагъ. Зиусхьаным Ехъуд хэкум ипачъыхьэу Ехъоекъым Тхьэм и Унэ чӀэт хьакъу-шыкъухэм ащыщхэри Нэбухэднэцар ӀэкӀилъхьагъэх. Ащ ахэр Бабилэн чӀыналъэм аригъэщагъэх, а хьакъу-шыкъухэр ежь итхьэ иунэ хэт хъарзынэщым чӀаригъэгъэуцуагъэх.

³ Нэбухэднэцар пачъыхьэм иунэӀутхэм яӀэшъхьэтетэу Ашпэназ израил цӀыфхэм ащыщхэу пачъыхьэ-лӀэкъолъэш унагъохэм къахэкӀыгъэ кӀэлакӀэхэр къахихынхэу унашъо фишӀыгъ.

⁴ АӀэпкъ-лъэпкъмэ дагъо ямыӀэу, теплъэшӀухэу, акъылышӀохэу, сыд фэдэ шӀэныгъи псынкӀэу агурыӀоу, зэхэшӀыкӀыныгъэ яӀэу, пачъыхьэ къэлэсэраим щылэжьэн алъэкӀынэу кӀэлакӀэхэр щытынхэ фэягъ. Бабилэныбзэр зышӀэрэ еджэгъэ-гъэсагъэхэу ахэр зэрэхъунхэр Ашпэназы ипшъэрылъыгъ.

⁵ Пачъыхьэм мафэ къэс ежь иӀанэ къытехьэрэ гъомлапхъэм фэди, ежь зашъорэ санэм фэди ахэмэ аратынэу унашъо ышӀыгъ. Илъэсищэ ахэр зырагъаджэхэрэм ыуж, пачъыхьэм фэлэжьэнхэу рагъэжьэн фэягъ.

⁶ Ахэм ахэтыгъэх ехъуд лъэпкъым щыщхэу: Даниел, Хъэнаный, Мыщаел, Азарый.

⁷ Пачъыхьэм иунэӀутхэм яӀэшъхьэтет ахэмэ ацӀэхэр зэблихъугъэх: Даниел – Бэлтэшэцар, Хъэнаный – Шадрах, Мыщаел – Мэщэх, Азарый – Абэднэгу афиусыгъ.

⁸ Пачъыхьэм иӀанэ къытекӀырэ гъомлапхъэми, ар зашъорэ санэм фэдэхэмкӀэ зимыушӀоинэу Даниел рихъухьи, пачъыхьэм иунэӀутхэм яӀэшъхьэтет ахэмкӀэ зыримыгъэушӀоинэу елъэӀугъ.

⁹ Тхьэм ынэшӀукӀэ унэӀутхэм яӀэшъхьэтет Даниел гукӀэгъу къыфишӀыгъ.

¹⁰ Пачъыхьэм иунэӀутхэм яӀэшъхьэтет Даниел къыриӀуагъ: «Сизиусхьанэу пачъыхьэм сыщэщынэ, шъушхыщтыри шъузэшъощтыри ежьыр ары шъуфэзыгъэнэфагъэр. Шъуилэгъу кӀэлакӀэмэ шъуанахь шъуагъоу ащ зилъэгъукӀэ, пачъыхьэм шъощ пае сшъхьэ шӀуаригъэхыщт».

¹¹ Ау Даниел пачъыхьэм иунэӀутхэм яӀэшъхьэтет Даниелрэ ащ ишъэогъухэу Хъэнаный, Мыщаел, Азарый алъыплъэнэу ахигъэуцуагъэм риӀуагъ:

¹² «СыолъэӀу, мэфипшӀым къыкӀоцӀ тыуплъэкӀу: уипщылӀхэм тшхынэу хэтэрыкӀхэмрэ тешъонэу псы къодыерэ нэмыкӀ къытямыгъэт.

¹³ ЕтӀанэ тэрырэ адрэ кӀэлакӀэхэу пачъыхьэ Ӏанэм къытекӀырэ гъомлапхъэр зышхыгъэхэмрэ титеплъэхэр зэгъапшэхи, зэрэплъэгъурэм елъытыгъэу тэ, уипщылӀхэм, къыддэзекӀу».

¹⁴ Пачъыхьэм иунэӀутхэм яӀэшъхьэтет ащкӀэ ядэӀуи, мэфипшӀэ ахэр ыушэтыгъэх.

¹⁵ МэфипшӀ зытешӀэм, ахэмэ ятеплъэхэр нахь дахэхэу, апкъышъолкӀи адрэ кӀэлакӀэхэу пачъыхьэм иӀанэ къытекӀырэ гъомлапхъэр зышхыгъэхэм анахь узынчъэхэу къычӀэкӀыгъэх.

¹⁶ Ащ къыщегъэжьагъэу кӀэлиплӀым алъыплъэрэм ахэм яшхын Ӏахьэрэ зэшъонхэ фэе санэмрэ ачӀыпӀэ, хэтэрыкӀхэр къаритызэ аригъэшхыщтыгъ.

¹⁷ А кӀэлиплӀым сыд фэдэ тхылъи къагурыӀонэу акъылышӀуагъэрэ зэхэшӀыкӀыныгъэрэ Тхьэм къаритыгъ, ащ нэмыкӀэу Даниел пкӀыхьапӀэхэри нэфапӀэхэри къыгурыӀонхэу Тхьэм ышӀыгъ.

¹⁸ Пачъыхьэм ыгъэнэфэгъэ мафэр къызэсым, иунэӀутхэм яӀэшъхьэтет ахэр Нэбухэднэцар ыпашъхьэ къырищагъэх.

¹⁹ Пачъыхьэр ахэмэ адэгущыӀагъ, къызэрэчӀэкӀыгъэмкӀэ Даниели, Хъэнаныйи, Мыщаели, Азарыйи афэдэ адрэ кӀэлакӀэмэ къахэкӀыгъэп, джаущтэу ахэр пачъыхьэм фэлажьэхэу аублагъ.

²⁰ АкъылышӀуагъэрэ зэхэшӀыкӀыныгъэрэ зэпхьылӀэн фэе сыд фэдэ ӀофкӀи пачъыхьэр ахэмэ яупчӀыгъэми тхьагурымагъохэу, ушхъухьакӀохэу пачъыхьэ хэгъэгум ис пстэухэми ахэр фэдипшӀыкӀэ зэранахь Ӏушыхэр ащ нэрылъэгъу къыфэхъущтыгъэ.

²¹ Пачъыхьэу Корэщ тетыгъор къызыӀэкӀэхьэгъэ апэрэ илъэсым нэс ащ Даниел щыӀагъ.