Пачъыхьэхэр: ЯтӀонэрэ тхылъыр 1 - Тхьэм и ГущыӀ

Апэрэ шъхьэр ТхьэлӀыкӀоу Иласрэ пачъыхьэу Ахъэзыехъурэ

¹ Пачъыхьэу Ахъаб зэлӀэм ыуж Моабым Израилым зыкъыпиӀэтыгъ.

² Мафэ горэм, Ахъазый Щамэрэн дэт ышъхьагъырэ иунэ къыпэӀут хъагъэм шъхьапырызи, сымаджэ хъугъэ. Арыти, лӀыкӀохэр ыӀофытэхи, ариӀуагъ: «ШъукӀуи, фылистхэм ятхьэнэпцӀэу Ӏэкърэн къалэм дэт БаӀал-Зэбуб дэжь, сыхъужьыщтмэ шъукъеупчӀ».

³ Ау Зиусхьаным имэлэӀич къалэу Тыщбы щыщ Илас къыриӀуагъ: «КӀуи, Щамэрэн дэс пачъыхьэм илӀыкӀохэм апэгъокӀи, яӀу: „Сыда Израилым Тхьэ иӀэба, фылистхэм ятхьэнэпцӀэу Ӏэкърэн къалэм дэт БаӀал-Зэбуб дэжь шъукъеупчӀынэу шъузкӀакӀорэр?“

⁴ Арышъ шъуипачъыхьэ пае Зиусхьаным ыӀорэр мары: „ПӀэу узхэгъолъхьагъэм укъыхэмыкӀыжьэу, шъыпкъэ дэдэмкӀэ, улӀэщт“». Арыти, Илас кӀуагъэ.

⁵ Ахъазый ыӀофытагъэхэм къагъэзэжьыгъ. Ар ахэм яупчӀыгъ: «Сыда адэ къызкӀэжъугъэзэжьыгъэр?»

⁶ Адрэхэм къыраӀожьыгъ: «ЦӀыф горэ тапэкӀэ къикӀи къытиӀуагъ: „ШъукӀуи, пачъыхьэу шъузыӀофтагъэм дэжь жъугъэзэжьи, ешъуӀу: ‘Зиусхьаным ыӀорэр мары: – Сыда Израилым Тхьэ иӀэба, фылистхэм ятхьэнэпцӀэу Ӏэкърэн къалэм дэт БаӀал-Зэбуб дэжь шъукъеупчӀынэу шъузкӀакӀорэр? Джащ пае пӀэу узхэгъолъхьагъэм укъыхэмыкӀыжьэу, шъыпкъэ дэдэмкӀэ, улӀэщт’“».

⁷ Пачъыхьэр къэупчӀагъ: «ШъуапэкӀэ къикӀи а гущыӀэхэр къышъозыӀогъэ цӀыфым итеплъэ сыд фэдагъа?»

⁸ Ахэм ащ раӀожьыгъ: «А цӀыфым хъурышъо пырацэм хэшӀыкӀыгъэ джанэ щыгъ, шъо бгырыпхыр ыбг илъ». Пачъыхьэм къыӀуагъ: «Ар Тыщбы щыщ Илас ары».

⁹ Арыти, дзэкӀолӀ шъэныкъом ипащэ идзэкӀолӀ шъэныкъо игъусэу ащ дэжь ыгъэкӀуагъэх. Илас къушъхьэм ышыгу тесыгъэти, ар ащ дэжь дэкӀуайи риӀуагъ: «Тхьэм ицӀыф! Укъехынэу пачъыхьэм къыуеӀо».

¹⁰ Ау Илас дзэкӀолӀ шъэныкъомэ ипащэ къыриӀожьыгъ: «Сэ Тхьэм сырицӀыфышъ, машӀор уашъом къерэхи, ори уидзэкӀолӀ шъэныкъуи шъуерэст». Арыти, машӀор уашъом къехи, пащэри ащ идзэкӀолӀ шъэныкъуи ыстыгъэх.

¹¹ Пачъыхьэм джыри дзэкӀолӀ шъэныкъом инэмыкӀ пащэ идзэкӀолӀ шъэныкъо игъусэу ащ дэжь ыгъэкӀуагъэх. Ащ Илас риӀуагъ: «Тхьэм ицӀыф! Пачъыхьэм ыӀорэр мары: псынкӀэу укъехынэу унашъо къыпфешӀы».

¹² Ау Илас ащ къыриӀожьыгъ: «Сэ Тхьэм сырицӀыфышъ, машӀор уашъом къерэхи, ори уидзэкӀолӀ шъэныкъуи шъуерэст». Тхьэм имашӀо уашъом къехи, пащэри ащ идзэкӀолӀ шъэныкъуи ыстыгъэх.

¹³ Джыри ящэнэрэ дзэкӀолӀ шъэныкъом ипащэ идзэкӀолӀ шъэныкъо игъусэу ыгъэкӀуагъэх. Ящэнэрэ дзэкӀолӀ шъэныкъом ипащэ кӀуи, ащ ыдэжь дэкӀуайи, Илас ыпашъхьэ лъэгонджэмышъхьэу зыщыридзыхи, елъэӀупэзэ, риӀуагъ: «Тхьэм ицӀыф! Сэри мыдрэ уиӀумэт нэбгырэ шъэныкъоу щытми тпсэхэм ялъэпӀагъэ уапашъхьэ щэрэмыкӀод.

¹⁴ Мары машӀор уашъом къехи мыщ ыпэрэ дзэкӀолӀ шъэныкъомэ япэщитӀу ядзэкӀолӀ шъэныкъохэр зэрягъусэхэу ыстыгъэхэшъ, спсэ илъэпӀагъэ уапашъхьэ щэрэмыкӀод!»

¹⁵ Зиусхьаным имэлэӀич Илас къыриӀуагъ: «Ащ дакӀу, ущымыщын». Арыти, къежьи, ащ игъусэу пачъыхьэм дэжь кӀуи,

¹⁶ риӀуагъ: «Зиусхьаным ыӀорэр мары: „Сыда Израилым Тхьэ иӀэба, фылистхэм ятхьэнэпцӀэу Ӏэкърэн къалэм дэт БаӀал-Зэбуб дэжь шъукъеупчӀынэу шъузкӀакӀорэр? Джащ пае пӀэу узхэгъолъхьагъэм укъыхэмыкӀыжьэу, шъыпкъэ дэдэмкӀэ, улӀэщт“».

¹⁷ Арыти, Зиусхьаным Илас къызэрэригъэӀуагъэм тетэу, Ахъэзыехъу лӀагъэ. Ащ къо иӀагъэпти, Ехъудэм ипачъыхьэу, Ехъощафат ыкъо Иорам зыпачъыхьэр ятӀонэрэ илъэсым хэхьагъэу, ежь ычӀыпӀэ ыш Ехъорам пачъыхьагъум техьагъ.

¹⁸ Ахъазыехъу нэмыкӀэу ышӀагъэхэр Израилым ипачъыхьэхэм яхьылӀэгъэ Ӏэпэрытххэм арытхагъэхэба.