نَاحُوم 1 - الكتاب المقدس بالعربي الدارجي هنا تشاد

¹ دَاهُو كِتَابْ رُؤْيَةْ نَاحُومْ الْمِنْ حِلَّةْ أَلِقُوشْ. وَ دِي مُحَاكَمَةْ مَدِينَةْ نِينَوَى.

اللّه يوصِّف قُدُرْته و غضبه

² اللّٰهْ هُو غَيُّورْ. أَيْوَى، مَا يِدَوْر يَعَبُدُوا إِلٰـهْ آخَرْ بَلَايَهْ وَ يِشِيلْ التَّارْ. أَيْوَى، اللّٰهْ هُو الْيِشِيلْ التَّارْ وَ سِيدْ الْغَضَبْ الشَّدِيدْ. هُو يِشِيلْ التَّارْ فِي خُصْمَانَهْ وَ يَغْضَبْ لِعُدْوَانَهْ.

³ اللّٰهْ هُو الصَّبُورْ وَ الْعَظِيمْ وَ الْقَادِرْ. وَ لَاكِنْ لِلْمُذْنِبْ، مَا يَجْعَلَهْ بَرِي. وَ يِسَوِّي دَرْبَهْ فِي رِيحْ أَمْ زَوْبَعَانَةْ وَ السَّحَابْ دَا عَجَاجَهْ الْهُو يِقَوِّمَهْ.

⁴ هُو يُقُمّ ضِدّ الْبَحَرْ وَ يِجَفِّفَهْ وَ أَلْمِي الْوُدْيَانْ كُلَ يِكَمِّلَهْ. وَ مَرَاعِي بَاشَانْ وَ جَبَلْ الْكَرْمَلْ يَيْبَسَوْا وَ الزُّهُورْ فِي جِبَالْ لُبْنَانْ يِدَفُّقُوا.

⁵ الْجِبَالْ يَرْجُفُوا قِدَّامَهْ وَ الْحُجَارْ يُمُوعُوا. وَ قِدَّامَهْ، الْأَرْض تِزَّلْزَلْ وَ كُلَّ سُكَّانْهَا يِفَتْفُتُوا.

⁶ وَ يَاتُو يَقْدَرْ يَحْمَلْ زَعَلَهْ؟ وَ مِنْ شِدَّةْ غَضَبَهْ، يَاتُو يَقْدَرْ يَقِيفْ قِدَّامَهْ؟ غَضَبَهْ يِنْصَبَّ مِثِلْ النَّارْ حَتَّى الْجِبَالْ يِشَّقَّقَوْا قِدَّامَهْ.

⁷ اللّٰهْ هُو الرَّحِيمْ وَ هُو الْمَلْجَأْ فِي يَوْم الضِّيقَةْ وَ يَحْفَضْ النَّاسْ الْيَلْجَأَوْا لَيَّهْ.

⁸ مِثِلْ سَيْل، يِجِيبْ دَمَارْ كَامِلْ فِي بَكَانْ عُدْوَانَهْ وَ يِطَارِدْهُمْ لَحَدِّي فِي ضَلَامْ الْقُبُورْ.

اللّه يجيب الدمار في نِينَوَى

⁹ يَا سُكَّانْ نِينَوَى، مَالَا شِلْتُوا نِيَّةْ فَسْلَةْ ضِدّ اللّٰهْ؟ هُو يِجِيبْ فَوْقكُو دَمَارْ كَامِلْ الْبَتَّانْ مَا يِتَنِّي بِضِيقَةْ آخَرَةْ.

¹⁰ إِنْتُو مِثِلْ الشَّوْك الشَّابِكْ وَ مِثِلْ السَّكَّارَى السِّكْرَوْا. النَّارْ تَاكُلْهُمْ بِالْكَامِلْ مِثِلْ الْقَشّ الْيَابِسْ.

¹¹ وَ مِنْكُو إِنْتُو بَسْ مَرَقْ نَادُمْ الْخَطَّطْ الْفَسَالَةْ ضِدّ اللّٰهْ وَ مُسْتَشَارْ الْمَا نَافِعْ.

¹² وَ دَاهُو اللّٰهْ قَالْ: «يَا شَعَبْ بَلَدْ يَهُوذَا، كَنْ عُدْوَانْكُو لَمَّوْا وَ كِتْرَوْا كُلَ، يَنْقُصُوا وَ يِكَمُّلُوا. وَ كَنْ أَوَّلْ أَنَا ضَايَقْتُكُو كُلَ بَتَّانْ مَا نِضَايِقْكُو.

¹³ وَ هَسَّعْ نَمْرُقْكُو مِنْ إِيدْ عُدْوَانْكُو الْقَوِيَّةْ وَ نِقَطِّعْ قُيُودْكُو.»

¹⁴ وَ دَاهُو كَلَامْ اللّٰهْ ضِدُّكُو، يَا سُكَّانْ نِينَوَى: «أَبَداً مَا تَلْقَوْا ذُرِّيَّةْ تِشِيلْ أُسُمْكُو. وَ فِي بُيُوتْكُو هَنَا الْعِبَادَةْ، أَنَا نِكَسِّرْ أَصْنَامْكُو هَنَا الْحَطَبْ وَ الْحَدِيدْ. وَ نِجَهِّزْ قُبُورْكُو أَشَانْ قِدَّامِي أَنَا، إِنْتُو بَتَّانْ مَا تَنْفَعَوْا.»

¹⁵ يَا شَعَبْ يَهُوذَا، دَاهُو فِي الْجِبَالْ نَادُمْ مَاشِي بِرِجِلَيْنَهْ وَ يِبَشِّرْ وَ يِبَلِّغْ السَّلَامْ. عَيُّدُوا وَ حَقِّقُوا نَذِرْكُو أَشَانْ عَدُوكُو الْمَا نَافِعْ مَا يُشُقّ بَلَدْكُو بَتَّانْ. وَ خَلَاصْ، كَلَامَهْ كَمَّلْ!