Jaamiʼa 1 - Al-Kitaab al-Mukhaddas be l-arabi al-daariji hana Tchad

Al-haya ma indaha maʼana

¹ Daahu kalaam al-Muʼallim, ibn Dawuud, malik Madiinat al-Khudus.

² Al-Muʼallim gaal : Al-haya zaayle ! Zaayle saakit ! Kulla cheyy zaayil !

³ Chunu al-faayde al-yalgaaha al-insaan min kulla khidimtah al-gaaʼid yatʼab foogha fi l-ard ?

⁴ Zurriiye tufuut wa zurriiye taji baʼadha laakin al-ard daayman mawjuuda.

⁵ Al-harraay tatlaʼ wa l-harraay tagaʼ wa battaan tajri le bakaanha al-awwal talaʼat minnah.

⁶ Al-riih tamchi ale wati wa tigabbil ale munchaakh. Al-riih tuduur wa tuduur wa battaan tigabbil le dawaraanha al-awwal.

⁷ Kulla l-buhuur yusubbu fi l-bahar al-muhiit laakin al-bahar al-muhiit ma yinmali. Wa battaan ayyi bahar yigabbil ale l-bakaan al-saal minnah.

⁸ Da gaaʼid yukuun daayman wa faayit fikir al-insaan. Al-een ma tarwa min al-choof wa l-adaan ma taʼaya min al-samaʼ.

⁹ Al-kaan, battaan yukuun wa l-sawwooh, battaan yisawwuuh. Ma fi cheyy jadiid fi l-ard !

¹⁰ Hal nagdaro nuguulu : «Chiifu ! Daahu cheyy jadiid.» La ! Da kula gaaʼid min zamaan, gubbaalna aniina.

¹¹ Al-naas hana hassaʼ ma yizzakkaro al-naas al-aacho gubbaalhum. Wa l-naas al-lissaaʼ ma wildoohum, al-naas al-yaju baʼadhum kula ma yizzakkaroohum.

Fattichiin al-hikma jari wara l-riih

¹² Ana Muʼallim wa hakamt fi Bani Israaʼiil fi Madiinat al-Khudus.

¹³ Ana chilt niiye wa fattacht wa kachaft be hikma fi ayyi cheyy al-gaaʼid yukuun tihit al-sama. Wa di chakhala tagiile al-antaaha al-Rabb le Bani Adam le yisawwiiha.

¹⁴ Wa ana chift kulla l-khidme al-gaaʼidiin yisawwuuha fi l-ard. Wa da kula zaayil saakit misil al-jari wara l-riih.

¹⁵ Al-aʼwaj ma binʼadil wa l-ma fi, ma binlagi.

¹⁶ Wa ana gult fi nafsi : «Ana kibirt wa indi hikma ziyaada min kulla l-hakamo gubbaali fi Madiinat al-Khudus. Wa hafadt fi galbi hikma wa maʼrafa be ziyaada.»

¹⁷ Ana chilt niiye le naʼarif al-hikma wa le naʼarif al-jahal wa l-tamaasa. Wa baʼad da, ana irift kadar da kula jari wara l-riih.

¹⁸ Achaan katarat al-hikma, tikattir al-hizin wa ziyaadat al-ilim, tiziid al-taʼab.