Филиппи 2 - Къэбарышӏур (Инджыл)

ЯТӀОНЭРЭШЪХЬ Христос ары Зиусхьаныр

¹ Христосэу шъугухэм арылъым шъуегъэгушхоба? ИшӀулъэгъу шъуигукъао къышъушъхьэщихырэба? Тхьэм ы Псэ ЛъапӀэ шъугухэм арылъба? Гуфэбагъи гукӀэгъуи зэфышъуиӀэба?

² Ащыгъум сигушӀуагъо ижъугъэкъу: шъуигупшысакӀэ зы орэхъу, а зы шӀулъэгъур шъуерэӀ, зыгу-зыпсэ шъухъу.

³ Зэщыхьанри зышӀошӀыжьынри шъугухэм арылъхэу зи шъумышӀэ, шъумыпагэуи нэмыкӀ цӀыфхэр шъушъхьэ зэрэшъулъытэжьырэм нахьи нахь инхэу шъулъытэх.

⁴ Хэти ежь ышъхьэ иӀоф закъо ерэмыплъ, нэмыкӀ цӀыфхэм яӀофми ярэплъ.

⁵ ШъуигупшысакӀэ Христос Исус игупшысакӀэ фэдэ орэхъу:

⁶ Христос Исус Тхьэм ищытыкӀэ-псэукӀэ хэлъыгъэ пэтми, Тхьэм зэрэфэдэм ишӀуагъэ ежь зэригъэкӀыжьыным ыуж итыгъэп.

⁷ Ау ежь зигъэцӀыкӀуи, Ӏофтабгэм ищытыкӀэ-ипсэукӀэ иӀэ хъугъэ. ЦӀыфым фэдэ хъугъэ, итеплъи цӀыфхэм ятеплъэ фэдагъ.

⁸ Ежь зигъэцӀыкӀуи, лӀэныгъэм нэсыфэ Тхьэм фэӀорышӀагъ, къащым зэрэтелӀыхьагъэри къыхиубытэу.

⁹ Арышъ, Тхьэм ар ыгъэини, цӀыф пстэуми ацӀэхэм анахь цӀэшхор къыритыгъ.

¹⁰ Аущтэу зыкӀэхъугъэр Исус ыцӀэ щытхъу фашӀэу, щыӀэ пстэури лъэгонджэмышъхьэкӀэ тӀысынхэр ары, уашъоми, чӀылъэми, чӀылъэ чӀэгъыми щыӀэхэр ары,

¹¹ бзэгу пстэуми Исус Христос зэрэ Зиусхьаныр зэкӀэмэ апашъхьэ къыщаӀонри ары. Аущтэуи Тхьэу Ты лъапӀэм щытхъушхо фашӀыщт.

Жъуагъохэм шъуафэдэу цӀыфхэм шъукъызэрахэлыдыкӀыщтыр

¹² Арышъ, силъапӀэхэр, шъуадэжь сызыщэӀэм, шъукъызэрэсфэӀорышӀэщтыгъэм фэдэу, джы шъуадэжь сызыщымыӀэми, ащ нахьи бэкӀэ нахь шъукъысфэӀорышӀэн фае: Тхьэм ишӀолӀыкӀ шъугухэм арылъэу, шъугухэр кӀэзэзхэу, шъумыкӀодэу шъукъызэрэнэжьыщтым лъэшэу ыуж шъуит,

¹³ сыда пӀомэ, ежь игъоу ылъытэрэ Ӏофхэм шъуафэенэуи жъугъэцэкӀэнхэуи шъозгъэлъэкӀырэр Тхьэр ары.

¹⁴ Сыд шъушӀэми, шъумытхьаусхэу, шъуемыхъырэхъышэу шъушӀэ,

¹⁵ лажьэ зи шъуимыӀэным, гукъэбзагъэ шъуиӀэным пае. Ащ фэдэ зыхъукӀэ, зыми шъузэригъэмысэн зи щымыӀэу, цӀыф къаигъэхэм, къуанчэхэм шъуахэтэу, Тхьэм шъурибыныщт.

¹⁶ ЩыӀэныгъэр тиӀэ зыгъэхъурэ гущыӀэхэр шъуӀэ илъхэу, дунэе шӀункӀым жъуагъохэм шъуафэдэу а цӀыфхэм шъукъахэлыдыкӀыщт. Аущтэу зыхъукӀэ, хьаулыеу сызэрэмылэжьагъэм ыкӀи сызэрэмыулэугъэм Христос дунаим къызыкӀожьыщт мафэм сыгушӀощт.

¹⁷ Шъо Тхьэм къурмэныпхъэу фэшъушӀырэр шъуишӀошъхъуныгъ ары. А къурмэныпхъэм сищыӀэныгъэ ылъ текӀагъэ хъуми, сыгушӀощт, шъори зэкӀэ сышъуигъусэу сыгушӀощт.

¹⁸ Арышъ, шъори шъуигопэн фае, шъусигъусэуи шъугушӀон фае.

Тимофейрэ Епафродитрэ

¹⁹ Тимофей бэ темышӀэу къышъуфэзгъэкӀонэу Зиусхьан Исус сыщэгугъы, шъуикъэбархэр зэхэсхыхэмэ, сыгу псэфыжьыным пае.

²⁰ Ишъыпкъэу къышъуфэгумэкӀэу Тимофей нэмыкӀ зи сиӀэп.

²¹ ЦӀыф пстэури яӀофхэм ауж итых нахь, Исус Христос игъоу ылъытэрэ Ӏофхэм ауж итхэп.

²² Тимофей ишъыпкъагъэ шъо шъошӀэ. Ыкъо ятэ зэрэдэлажьэрэм фэдэу, къэбарышӀу гъэӀуным иӀофкӀэ къыздэӀэпыӀагъ.

²³ СиӀофхэр зэрэхъущтхэр зэрэсшӀэу, къышъуфэзгъэкӀонкӀэ сэгугъэ.

²⁴ Сэри бэ темышӀэу шъуадэжь сыкъэкӀонэу Зиусхьаным сыщэгугъы.

²⁵ Ащ нэмыкӀэу, Епафродит къышъуфэзгъэкӀожьын фаеу сэлъытэ. Ар тэ тшы, ежьыррэ сэррэ тызэдэлэжьагъ, тызэдэулэугъ. Джары шъо шъуилӀыкӀоу, ӀэпыӀэгъу сищыкӀагъэ зэхъум, къыслъыплъэнэу къысфэжъугъэкӀогъагъэр.

²⁶ Шъо зэкӀэми шъуилъэгъужьынэу ар лъэшэу къышъуфэлӀэ, зэрэсымэджагъэр зэрэзэхэшъухыгъэм паий мэгумэкӀы.

²⁷ Шъыпкъэ, лӀэным нэсыгъэу сымэджагъ. Ау Тхьэм гукӀэгъу къыфишӀыгъ, ежь изакъоп, сэри гукӀэгъу къысфишӀыгъ, сыгу къемыо зэпытыным пае.

²⁸ КъышъуфэзгъэкӀожьынэу сызфэгузажъорэр ар шъулъэгъужьмэ, шъо гушӀуагъо шъуиӀэнэуи, сэ сигумэкӀ нахь макӀэ хъунэуи ары.

²⁹ Зиусхьаныр шъо шъугухэм зэрарылъым фэдэу, ащ ыгуи зэрилъым пае, гушӀогъо пстэумкӀэ шъупэгъокӀ. Ежь фэдэ цӀыфхэм лъытэныгъэ афэшъушӀ,

³⁰ сыда пӀомэ, Христос иӀоф пае лӀэныгъэм пэблагъэ хъугъэ. Шъо сэ къысфэшъушӀэн шъумылъэкӀыгъэ ӀэпыӀэгъу къысфэхъуным пае ыпсэ шъхьасыгъэп.