Апостол Паул тхылъэу Филимон фитхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Исус Христос сызэрэфэлажьэрэм пае, хьапсым сычӀадзагъэу сычӀэс. ШӀу тлъэгъоу къыддэлажьэрэ Филимон, чылыс зэӀукӀэм щыщхэу уиунэ щызэрэугъоихэрэм,

² тшыпхъоу Апфие, Христос пае тэ къыддэлажьэрэ Архипп, тшы Тимофей сигъусэу мы тхылъыр къышъуфэсэтхы.

³ Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

Паул Тхьэм щытхъу зэрэфишӀырэмрэ зэрелъэӀурэмрэ

⁴ Тхьэм селъэӀу зыхъукӀэ, Тхьэм щытхъу фэсэшӀ зэпыт ощ пае.

⁵ Сыда пӀомэ, Зиусхьан ИсускӀэ шӀошъхъуныгъэу уиӀэмрэ Тхьэм ицӀыф лъэпӀэ пстэуми шӀулъэгъоу афыуиӀэмрэ якъэбар зэхэсхыгъэшъ ары.

⁶ ШӀошъхъуныгъэу тиӀэмкӀэ гъусэ укъытфэхъугъ, Христос тыгухэм зэрарылъым пае, Тхьэм шӀоу къытфишӀэрэ пстэури а гъусэныгъэу оррэ тэррэ зэфытиӀэм нахьыбэ къыдгуригъэӀонэу селъэӀу.

⁷ УишӀулъэгъукӀэ инэу сыбгъэгушӀуагъ ыкӀи сыбгъэгушхуагъ, сыда пӀомэ, о, сшы, Тхьэм ицӀыф лъапӀэхэм агу бгъэпсэфыжьыгъ.

Паул Онесим пае Филимон зэрелъэӀурэр

⁸ Арышъ, Христос тыгухэм зэрарылъым пае, пшӀэн фаер унашъо пфэсшӀынэу гушхо сиӀэ пэтми,

⁹ шӀулъэгъукӀэ сыкъыолъэӀуныр нахь къэсэштэ. Сэ, Паул, сылӀыжъэу Исус Христос сызэрэфэлажьэрэм пае, хьапсым сычӀадзагъэу,

¹⁰ скъо Онесим пае сыолъэӀу, сыда пӀомэ, хьапсым сычӀэсэу ар скъом фэдэ хъугъэ.

¹¹ ЫпэкӀэ оркӀэ Онесим ишӀуагъэ къакӀощтыгъэп, ау джы ори сэри ишӀуагъэ къытегъэкӀы.

¹² Ар, спсэ фэдэу шӀу слъэгъурэр, джы къыпфэсэгъэкӀожьы.

¹³ КъэбарышӀур зэрэзгъэӀурэм пае, хьапсым сычӀэсыфэ, о пчӀыпӀэкӀэ ӀэпыӀэгъу къысфэхъунэу садэжь щызгъэӀэнэу сыфаещтыгъ,

¹⁴ ау о умыдэу ар сшӀэнэу сыфэягъэп, о уишӀушӀагъэ егъэзыгъэ хэмылъэу, о ар уигуапэу пшӀэным пае.

¹⁵ Зы уахътэ горэкӀэ Онесим къыббгъодэкӀыгъэу зыкӀэхъугъэр

¹⁶ унэӀутым фэдэу мыхъужьэу, ау унэӀутым нахьи нахьышӀужьэу, шӀу плъэгъурэ тшы фэдэу егъашӀэм бгъотыжьынэу къычӀэкӀынкӀи мэхъу. СэркӀэ ар бэу лъапӀэ, оркӀи нахь лъэпӀэжь, цӀыф фэдэу ыкӀи Зиусхьаныр зыгу илъ пшы фэдэу.

¹⁷ Сыкъыбдэлажьэу сыолъытэмэ, сэ сызэребгъэблагъэщтыгъэм фэдэу, ари егъэблагъ.

¹⁸ ЗыгорэкӀэ иягъэ къыокӀыгъэмэ е уичӀыфэ телъмэ, сэ ар къысфэгъаз.

¹⁹ Сэ, Паул, ар остыжьыщт, сэ сӀэкӀэ сэтхы, ау Христос угу зэрилъым пае, сичӀыфэ о зэрэптелъыр къыосӀонэу ищыкӀагъэп.

²⁰ Ары, сшы, Зиусхьаным пае уишӀуагъэ къысэгъэкӀ. Зиусхьаныр угу зэрилъым пае, сыгу гъэпсэфыжь.

²¹ УкъызэрэсэдэӀущтымкӀэ сицыхьэ птелъэу къыпфэсэтхы. СыкъызэрэолъэӀурэм нахьи нахьыбэ зэрэпшӀэщтри сэшӀэ.

²² НэмыкӀ горэмкӀэ сыолъэӀу: хьакӀэщ къысфэгъэхьазыр; сыда пӀомэ, Тхьэм шъукъызэрэсфелъэӀугъэм ипэгъокӀ фэдэу сыкъышъуитыжьынэу сыщэгугъы.

Аужырэ шӀуфэс

²³ Епафрасэу, Христос Исус зэрэфэлажьэрэм пае сигъусэу хьапсым чӀадзагъэу чӀэсым, шӀуфэс къыуехыжьы.

²⁴ Сэ къыздэлажьэрэ Марки, Аристархи, Димаси, Луки шӀуфэс къыуахыжьы.

²⁵ Зиусхьан Исус Христос ынэшӀу шъугумэ къащерэф. Амин.