Марк 1 - Къэбарышӏур (Инджыл)

АПЭРЭШЪХЬ Тхьэм игущыӀэхэр умэхъэкӀо Иуан зэригъэӀущтыгъэхэр

¹ Тхьэм ы Къо Исус Христос ехьылӀэгъэ къэбарышӀур мары къызэриублэрэр.

² Тхьэм мыщ фэдэу къызэриӀорэр пегъымбархэм ятхылъхэм арыт: «Мары о уапэ сэ силӀыкӀо къэсэгъакӀо; ащ уигъогу къыпфигъэпсыщт.

³ Ащ иджэ макъ ары шъоф нэкӀым къыщыӀурэр, моущтэу ыӀозэ: Зиусхьаным игъогу фэжъугъэпси, игъогу лъагъохэр зэшъхьэ-зашъо фэшъушӀых».

⁴ Тхьэм къызэриӀуагъэм тетэу, умэхъэкӀо Иуан шъоф нэкӀым къыщылъагъуи, цӀыфхэм Тхьэм игущыӀэхэр аригъэӀухэзэ, моущтэу къыӀощтыгъ: – ШъуипсэкӀодхэм шъуафыкӀэгъожьи, зысэжъугъэумэхъ, Тхьэм ахэр къышъуфигъэгъунхэм пае.

⁵ Иудей хэкум зэкӀэ ис цӀыфхэри, Ерусалим дэс цӀыф пстэури Иуан дэжь кӀощтыгъэх. ПсэкӀодэу ашӀагъэхэр Тхьэм ыпашъхьэ ралъхьэхэти, Иордан псыхъом Иуан зыщырагъэумэхъыщтыгъ.

⁶ Иуан мэхъшэцым хэшӀыкӀыгъэу щыгъын щыгъыгъ, ыбги шъо бгырыпх илъыгъ, мацӀи шъоф шъоуи ышхыщтыгъ.

⁷ Тхьэм игущыӀэхэр цӀыфхэм аригъэӀухэзэ къыӀощтыгъ: – Сэщ нахьи нахь лъэкӀышхо иӀэу зыгорэ саужкӀэ къэкӀощт. Зезгъэзыхэу ащ ицокъэлъэпсхэр фэстӀэтэнхэуи сифэшъуашэп.

⁸ Сэ псымкӀэ шъусыумэхъыгъ, ау ащ Тхьэм ы Псэ ЛъапӀэкӀэ шъуиумэхъыщт.

Иуан Исус зэриумэхъыгъэр

⁹ А мафэхэм Галилей хэкум щыщ къалэу Назарет Исус къыдэкӀи, Иордан псыхъом Иуан зыщыригъэумэхъыгъ.

¹⁰ Исус псым къыхэкӀыжь пэтэу, уашъор зэгокӀи, Тхьэм ы Псэ ЛъапӀэ тхьаркъом фэдэу ежь къызэрэфехырэр ылъэгъугъ.

¹¹ Уашъоми макъэ къиӀукӀыгъ: – Сэ шӀу слъэгъурэ с Къо кӀасэу сыгу зэӀурэр оры.

Исус псэкӀод ригъэшӀэным шэйтаныр ыуж зэритыгъэр

¹² Ащ лъыпытэу Тхьэм ы Псэ ЛъапӀэ Исус шъоф нэкӀым ыщагъ.

¹³ Шэйтаныр Исус псэкӀод ригъэшӀэным ыуж итэу, Исус мэфэ тӀокӀитӀурэ шъоф нэкӀым итыгъ. ХьэкӀэ-къуакӀэхэм ахэтыгъ. МэлэӀичхэри фэӀофтабгэщтыгъэх.

Исус иӀоф Галилей хэкум зэрэщиублагъэр

¹⁴ УмэхъэкӀо Иуан хьапсым зычӀадзэ ужым, Исус Галилей хэкум кӀуи, Тхьэм и Тетыгъошхо ехьылӀэгъэ къэбарышӀур щигъэӀоу ыублагъ.

¹⁵ – Мафэр къэсыгъ, Тхьэм и Тетыгъошхуи къэблэгъагъ. ШъуипсэкӀодшӀагъэхэм шъуафыкӀэгъожьи, къэбарышӀур шъушӀошъ жъугъэхъу, – ыӀощтыгъ.

Исус игъогу рыкӀонхэу пцэжъыешэ нэбгыриплӀым къызэряджагъэр

¹⁶ Исус Галилей псыхъураем иӀушъо рекӀокӀызэ, Симонрэ ащ ышэу Индрысрэ хъытыур псым хадзэу ылъэгъугъ, сыда пӀомэ, пцэжъыяшэхэти ары.

¹⁷ Исус ахэмэ ариӀуагъ: – Сауж шъукъырыкӀу. Пцэжъые къэшъуубытыным ыуж шъузэритыгъэм фэдэу, цӀыфхэр сигъогу къытежъугъэхьанхэм шъузэрэхэтыщтыр шъозгъэшӀэщт.

¹⁸ Ахэмэ а гущыӀэхэр зэрэзэхахэу, хъытыухэр къагъанэхи, Исус ыуж ихьагъэх.

¹⁹ Исус ащ тӀэкӀу ӀукӀотыгъэу, Зебедей ыкъохэу Якъубэрэ Иуанрэ къуашъом исхэу, яхъытыухэр агъэхьазырхэу ылъэгъугъ.

²⁰ Ащ лъыпытэу Исус ахэми яджагъ. Ятэу Зебедейрэ илэжьакӀохэмрэ къуашъом исхэу къабгынэхи, ахэр Исус ыуж ихьагъэх.

Исус лӀы горэм джынэпцӀэ Ӏаер зэрэхифыгъэр

²¹ ЕтӀанэ къалэу Капернаум дэхьагъэх. Шэмбэт мафэр къызэсым, Исус синэгогум чӀахьи, цӀыфхэм Тхьэм игущыӀэхэр аригъашӀэхэу ыублагъ.

²² ЦӀыфхэм Исус Ӏофхэр зэраригъашӀэщтыгъэ шӀыкӀэр агъэшӀэгъуагъ, сыда пӀомэ, Тэурат егъэджэкӀо пащэхэм афэмыдэу, тетыгъошхо иӀэу, Тхьэм игъогу цӀыфхэм аригъашӀэщтыгъэти ары.

²³ ОшӀэ-дэмышӀэу джынэпцӀэ Ӏае зыхэс лӀы горэ синэгогум къыщылъагъуи, къахэкууагъ:

²⁴ – Сыд уиӀофэу къытхэлъыр, Назарет щыщ Исус? ТыбгъэкӀодынэу укъэкӀуагъа? О хэтми узыщыщыр сэшӀэ: Тхьэм дэжь къикӀыгъэ ЛъапӀэр оры.

²⁵ – Щыгъэт, мы лӀым къыхэкӀыжь! – къыӀуагъ Исус, джынапцӀэм егыеу.

²⁶ ДжынэпцӀэ Ӏаем лӀыр къыгъэкӀэзэзи, мэкъэшхокӀэ къэкууи, лӀым хэкӀыжьыгъ.

²⁷ ЦӀыфхэм ар залъэгъум, пстэуми лъэшэу агъэшӀагъуи, зэраӀожьыгъ: – Сыда мыр? ШӀэныгъакӀэхэр цӀыфхэм арегъашӀэх. Тетыгъошхуи иӀэу, джынэпцӀэ Ӏаехэми унашъо афишӀызэ, егъэдаӀох.

²⁸ Аущтэу зэкӀэ Галилей хэкум Исус икъэбар псынкӀэу щыӀугъ.

Исус цӀыфыбэхэр зэригъэхъужьыгъэр

²⁹ ЕтӀанэ ахэр синэгогум къызэрэчӀэкӀыжьхэу, Якъубэрэ Иуанрэ ягъусэхэу, Симонрэ Индрысрэ яунэ кӀуагъэх.

³⁰ Симон ишӀугуащэ плъыр-стыркӀэ сымаджэу пӀэм хэлъыгъ. Ар зэрэсымаджэр занкӀэу Исус къыраӀуагъ.

³¹ Исус ащ дэжь кӀуи, ыӀэ ыубыти, къыгъэтӀысыгъ. ШӀугуащэм плъыр-стырыр хэкӀыжьыгъ, къэтэджыжьи, ахэр къыхьакӀэхэу ыублагъ.

³² Пчыхьэм тыгъэр зыкъохьажь ужым, сымаджэхэмрэ джынапцӀэ зыхэсхэмрэ зэкӀэ Исус къыфащагъэх.

³³ Къалэм дэс пстэури пчъэӀупэм къыщызэӀукӀагъ.

³⁴ Ащ дэжьым Исус уз зэмылӀэужыгъуабэ зиӀэ сымэджэ Ӏэджи ыгъэхъужьыгъ, джынэпцӀабэхэри цӀыфхэм ахифыгъ, ау джынапцӀэхэр къэгущыӀэнхэу фит ышӀыгъэхэп, сыда пӀомэ, ахэмэ ар зэрэ Христосыр ашӀэщтыгъэти ары.

Исус Галилей хэкур къыкӀухьэзэ, Тхьэм игущыӀэхэр цӀыфхэм зэраригъэӀущтыгъэр

³⁵ Пчэдыжьым жьы дэдэу Исус къэтэджи, къалэм дэкӀи, чӀыпӀэ Ӏудзыгъэ горэм кӀуи, Тхьэм щелъэӀугъ.

³⁶ Симонрэ игъусэхэмрэ Исус лъыхъунхэу дэкӀыгъэх.

³⁷ Къызагъотыжьым, раӀуагъ: – ЗэкӀэ цӀыфхэр къыплъэхъух.

³⁸ – Гъунэгъу къуаджэхэми къалэхэми тыжъугъакӀу, ахэми Тхьэм игущыӀэхэр цӀыфхэм щязгъэӀунхэм пае, – къариӀожьыгъ Исус, – сыда пӀомэ, джары сэ сыкъызфэкӀуагъэр.

³⁹ Аущтэу Галилей хэкур зэкӀэ къыкӀухьэзэ, ясинэгогухэм цӀыфхэм Тхьэм игущыӀэхэр щаригъэӀущтыгъ, джынапцӀэхэри цӀыфхэм ахифыщтыгъ.

Исус шъоджэ уз Ӏае зиӀэ лӀы горэ зэригъэхъужьыгъэр

⁴⁰ Шъоджэ уз Ӏае зиӀэ лӀы горэ Исус дэжь къакӀуи, лъэгонджэмышъхьэкӀэ къэтӀыси, къелъэӀугъ: – Уфаемэ, сыбгъэхъужьын плъэкӀыщт.

⁴¹ Исус ыгу егъугъ, ыӀэ ыщэий, тырилъхьи, ыӀуагъ: – Ары, сыфай, псаоу хъужь!

⁴² Ардэдэм шъоджэ узыр а лӀым хэкӀыжьи, къабзэ хъужьыгъэ.

⁴³ Ащ лъыпытэу Исус ар ытӀупщыжьыгъ, фигъэпытэу риӀозэ:

⁴⁴ – Фэсакъ, мыр зыми емыӀотэжь, ау дин пащэм дэжь кӀуи, зегъэлъэгъу. Узэрэхъужьыгъэм пае, пегъымбар Мусэ иунашъо тетэу къурмэн шӀы. Ар узэрэхъужьыгъэмкӀэ цӀыфхэм апашъхьэ шыхьат щыхъущт.

⁴⁵ Ау а лӀыр ӀукӀыжьи, къехъулӀэгъэ пстэури ыӀуатэзэ, къэбарыр цӀыфхэм ариӀоу ыублагъ. Арыти, цӀыфхэм къалъэгъоу Исус къалэ горэми дэхьан ымылъэкӀыжь хъугъэ, ау чӀыпӀэ Ӏудзыгъэхэм ащыӀэщтыгъ. Ау щытми, тыдэкӀи къикӀыхэу цӀыфхэр ыдэжь къакӀощтыгъэх.