Апостол Якъубэ тхылъэу ытхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Якъуб, Тхьэмрэ Зиусхьан Исус Христосрэ сафэлажьэ. Шъо, дунаим щитэкъухьагъэу щыпсэурэ лӀэкъо пшӀыкӀутӀум шӀуфэс шъосэхы.

ШӀошъхъуныгъэмрэ акъылышӀуагъэмрэ

² Сшыхэр, шъуишӀошъхъуныгъэ ишъыпкъагъэ зыгъэунэфырэ къин зэфэшъхьафхэм шъуахафэмэ, шъугушӀу,

³ сыда пӀомэ, мы къинхэм шъуишӀошъхъуныгъэ ишъыпкъагъэ загъэунэф ужым, а къинхэм теубытагъэ къазэрыкӀэкӀырэр шъошӀэ.

⁴ Теубытагъэми иӀоф рерэгъэкъу, лъэныкъо пстэумкӀи зишъыпкъагъэ щыкӀагъэ зимыӀэ цӀыф икъугъэхэу шъухъуным пае.

⁵ Ау шъуащыщ горэм иакъылышӀуагъэ щыкӀагъэ иӀэмэ, Тхьэм ерэлъэӀу, ащи акъылышӀу къыритыщт. Сыда пӀомэ, зыми емыгыеу, игуапэу Тхьэм зэкӀэми аретышъ ары.

⁶ Ау емыхъырэхъышэу, шӀошъхъуныгъэкӀэ ерэлъэӀу, сыда пӀомэ, Тхьэм ехъырэхъышэрэр хыорэу жьыбгъэм адыкӀи мыдыкӀи ыфызэ, зэридзэрэм фэд.

⁷ Тхьэм зыгорэ къыритынкӀэ ащ фэдэ цӀыфыр орэмыгугъэ.

⁸ Ар темыубытагъэу, акъыл тӀуанэ зиӀэ цӀыф, ышӀэрэ пстэумкӀи теубытагъэ иӀэп.

ТхьамыкӀагъэмрэ баиныгъэмрэ

⁹ Къош тхьамыкӀэр Тхьэм зэриӀэтыгъэмкӀэ орэгушӀо.

¹⁰ Ау баир Тхьэм зэригъэцӀыкӀугъэмкӀи орэгушӀо, сыда пӀомэ, уцым икъэгъагъ фэдэу кӀодыжьыщт.

¹¹ Тыгъэр къыкъокӀы, къыдэкӀуае, фэбэ дэдэ мэхъу, фэбаем уцыр егъэгъу, икъэгъагъ пэтэкъу, идэхагъэ мэкӀодыжьы. Джащ фэдэу лӀы баир иӀофхэм апылъызэ кӀодыжьыщт.

Шъыпкъагъэр зыгъэунэфырэ къинхэмрэ псэкӀодшӀэным дэзыхьыххэрэ Ӏофхэмрэ

¹² Зишъыпкъагъэ гъэунэфыгъэу, теубытагъэ зиӀэ цӀыфыр гъогу мафэ теуцуагъ, сыда пӀомэ, ишъыпкъагъэ гъэунэфыгъэ зыхъурэ ужым, мыкӀодыжьын щыӀэныгъэ танджэу ежь шӀу зылъэгъухэрэр къызэригъэгугъагъэхэр Тхьэм а цӀыфым къыритыщт.

¹³ Ишъыпкъагъэ зыгъэунэфын къин цӀыф горэ хафэмэ, «Тхьэр ары сызгъэунэфэу сыдэзыхьыхырэр» ерэмыӀу. Бзэджагъэм Тхьэр зыӀэпищэшъущтэп. Бзэджагъэ ышӀэнэу зы нэбгыри Тхьэм дихьыхыщтэп.

¹⁴ Хэти ежь ихъопсэ Ӏаехэр ары зыӀэпызыщэхэу, зыгъэнацӀэхэу дэзыхьыххэрэр.

¹⁵ Хъопсэ Ӏаер лъэрмыхь хъумэ, псэкӀодшӀэныр къелъфы; псэкӀодшӀэнри икъугъэ зыхъукӀэ, лӀэныгъэр къелъфы.

¹⁶ Сшы лъапӀэхэр, зыми зешъумыгъэгъапцӀ.

¹⁷ Сыдрэ тын дэгъуи тын шъыпкъи уашъом къекӀы, уашъом щыӀэ нэфынэхэм я Тэ лъапӀэ дэжь къекӀы. ЗызэзыхъокӀырэ жьаухэм афэдэу ащ зызэблихъужьырэп.

¹⁸ Ежь шӀоигъуагъэти, шъыпкъэм игущыӀэхэмкӀэ тыкъыгъэхъугъ, къыгъэхъугъэ пстэуми ащыщэу апэрэу тыхъуным пае.

Тхьэм игущыӀэхэм уядэӀунымрэ бгъэцэкӀэнхэмрэ

¹⁹ Сшы лъапӀэхэр, мыр зэжъугъашӀэ. Хэти дэӀонымкӀэ псынкӀэу орэхьазыр, ау шӀэхэу орэмыгущыӀ, псынкӀэуи орэмыгубж.

²⁰ Сыда пӀомэ, цӀыфым игубж Тхьэм дэжькӀэ шъыпкъагъэр ыгъэцакӀэрэп.

²¹ Арышъ, къышъухэнэгъэ гу шӀоигъэ пстэури бзэджэгъэ пстэури хэшъунэжь. Тхьэм шъугухэм къарилъхьэгъэ гущыӀэхэу шъупсэхэр мыкӀодхэу къэзгъэнэжьын зылъэкӀыщтхэр гушъэбагъэкӀэ шъуубытых.

²² Тхьэм игущыӀэхэм шъуядэӀу къодыекӀэ хъущтэп, ахэр жъугъэцэкӀэнхэ фае. Армырмэ зышъогъэпцӀэжьы.

²³ Сыда пӀомэ, а гущыӀэхэм ядэӀоу зымыгъэцакӀэрэр, гъунджэм иплъэу ынапэ изэхэлъыкӀэ еплъыжьрэ цӀыфым фэд.

²⁴ Ар зэплъыжьышъ, ӀокӀыжьы, итеплъи зыфэдагъэр ащ лъыпытэу щэгъупшэжьы.

²⁵ Ау цӀыфэу ышӀэрэ пстэумкӀэ гъогу мафэ теуцуагъэр мыры: Тхьэм иунашъохэу щыкӀагъэ зимыӀэхэу, икъугъэхэу, цӀыфхэм шъхьафитыныгъэ яӀэ зыгъэхъухэрэм дэгъоу ахэплъэ зэпытэу, Ӏофхэу зэдэӀугъэри щымыгъупшэжьэу зыгъэцакӀэрэр ары.

²⁶ «Тхьэм шӀолӀыкӀ фысиӀэу сэпсэу» зыфиӀожьэу, ау етӀани ыбзэгу зымыубытырэм зегъэпцӀэжьы, идини пкӀэ иӀэп.

²⁷ Ау Тхьэу Ты лъапӀэм дэжькӀэ шӀолӀыкӀ къабзэу щыкӀагъэ зимыӀэр мары: гузэжъогъум хэтхэу ибэхэмрэ шъузабэхэмрэ уалъыплъэнри, лажьэ уимыӀэнэу мы дунаим ибзэджагъэ зыщыудзыенри ары.