Колоссэ 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Тхьэм шӀоигъуагъэти, Исус Христос иапостол сыхъугъ. Тшы Тимофей сигъусэу,

² шъо, Тхьэм ицӀыф лъапӀэхэу, Колоссэ къалэм дэсхэу, Христос зыгу илъхэу, ежь фэшъыпкъэ тшыхэм, мы тхылъыр къышъуфэсэтхы.

³ Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт. Тхьэм тышъуфелъэӀу къэси, Тхьэу ти Зиусхьан Исус Христос я Тэ щытхъу фэтэшӀы,

ШӀошъхъуныгъэ зиӀэхэу Колоссэ дэсхэм апае Паул Тхьэм щытхъу зэрэфишӀырэр

⁴ сыда пӀомэ, Христос ИсускӀэ шӀошъхъуныгъэу шъуиӀэмрэ шӀулъэгъоу Тхьэм ицӀыф лъэпӀэ пстэуми афышъуиӀэмрэ якъэбар зэхэтхыгъэ.

⁵ Ащ фэдэ шӀошъхъуныгъэмрэ шӀулъэгъумрэ зыкӀышъуиӀэр ӀахьышӀоу Тхьэм уашъом къыщышъуфигъэхьазырыгъэр къызэрэшъуитыщтым шъущыгугъэу, шъузэрэпаплъэрэр ары. КъэбарышӀоу къышъонэсыгъэм игущыӀэ шъыпкъэхэмкӀэ Тхьэм шӀугъэу къышъуфигъэхьазырыгъэм икъэбар зэхэшъухыгъэ.

⁶ Дунаим тыдэкӀи къэбарышӀум шӀугъэ къыхэкӀы, цӀыф нахьыбэми алъыӀэс зэпыт. Аущтэу шъуадэжьи щыхъугъ, къэбарышӀур зэхэшъухи, Тхьэм ынэшӀу щыфэныгъэр шъыпкъэу къызыжъугурыӀогъэ мафэм щегъэжьагъэу.

⁷ ШӀу тлъэгъурэ Епафрасэу къыддэлажьэрэм къэбарышӀур шъуигъэшӀагъ. Ащ ишӀуагъэ къышъуигъэкӀэу шъыпкъагъэкӀэ Христос фэлажьэ.

⁸ Ащ шъуишӀулъэгъоу Тхьэм ы Псэ ЛъапӀэ дэжь къикӀырэм икъэбари къытиӀотагъ.

⁹ Арышъ, шъо шъуикъэбар зызэхэтхыгъэ мафэм щегъэжьагъэу, Тхьэм тышъуфелъэӀуныр хэтынэжьыгъэп. Тхьэр зыфаер икъугъэу къыжъугуригъэӀонэуи, ы Псэ ЛъапӀэ дэжь къикӀырэ акъылышӀуагъэрэ гулъытэныгъэрэ зэкӀэ шъуиӀэнэу телъэӀу.

¹⁰ Ащыгъум лъэныкъо пстэумкӀи Зиусхьаным ыгу къызэжъугъэӀоу, ежь шъуфэшъуашэу шъузекӀощт. ШъушӀэрэ Ӏоф дэгъу пстэуми шӀугъэ къахэкӀыщт, Тхьэри нахьышӀоу шъушӀэ зэпытыщт.

¹¹ Сыд щыщымкӀи теубытагъэрэ щэӀагъэрэ шъуиӀэнэу Тхьэм щытхъушхо зыхэлъ лъэкӀэу иӀэмкӀэ зэкӀэ шъугухэм кӀуачӀэ къахилъхьанэу орэхъу.

¹² ГушӀуагъокӀи Тхьэу Ты лъапӀэм щытхъу фэшъушӀ. Нэфынэр зыдэщыӀэ чӀыпӀэм Тхьэм ежь ицӀыф лъапӀэхэм ӀахьышӀоу афигъэхьазырыгъэмкӀэ шъори Ӏахь къышъулъыӀэсынэу къышъуфигъэшъошагъ.

¹³ ШӀункӀым итетыгъо ыӀэчӀэгъ тыкъычӀихыжьи, ы Къоу шӀу ылъэгъурэм итетыгъо ыӀэчӀэгъ тычӀигъэуцуагъ.

¹⁴ Ы Къу ары лъэу къащым щыкӀэкӀыгъэмкӀэ тэ тшъхьэхэр зыщэфыжьыгъэр, типсэкӀодхэри къытфэзгъэгъугъэр.

Христос Тхьэм къыгъэхъугъэ пстэуми апшъэ щыӀ

¹⁵ Христос Тхьэу цӀыфхэм амылъэгъурэм итеплъэ иӀ. Джары Тхьэм къыгъэхъугъэ пстэуми апшъэ щыӀэу ы КъокӀэ заджэрэр.

¹⁶ Тхьэм Христос зэкӀэри къыригъэгъэхъугъ, уашъоми чӀылъэми щыӀэ пстэури, цӀыфхэм алъэгъурэ Ӏофхэри, амылъэгъурэ Ӏофхэри, пачъыхьэ тӀысыпӀэхэм тетӀысхьэхэрэри, пащэхэри, Ӏэшъхьэтетхэри, тетыгъо зиӀэхэри Тхьэм ежь ы Къо зэкӀэри къыригъэгъэхъугъ, ы Къо ищытхъушхо паий щыӀэх.

¹⁷ Ахэр зэкӀэ зыщэмыӀэхэм, Къо лъапӀэр щыӀагъ. Ежьыр зэкӀэ зэкӀэзыубытэрэр.

¹⁸ Чылыс зэӀукӀэр – пкъы, ащ ышъхьэр ежьыр ары. Ежьыр ары чылыс зэӀукӀэр зэтезгъэуцуагъэр, апэрэу лӀагъэхэм къахэтэджыкӀыжьыгъэри ежьыр ары. Аущтэу зэкӀэмкӀи апэрэр ежьыр ары.

¹⁹ Сыда пӀомэ, Тхьэм игъоу ылъытагъэти, ищытыкӀэ-псэукӀэ зэкӀэ ы Къо хэлъ хъугъэ.

²⁰ Лъэу ы Къо къащым щыкӀэкӀыгъэмкӀэ Тхьэм ежь тызэригъэшӀужьызэ, ы Къо къыпкъырыкӀэу чӀылъэми уашъоми щыӀэр зэкӀэ ежь зригъэшӀужьыгъ.

²¹ Пасэм Тхьэм бэрэ шъупэчыжьагъ, шъугухэмкӀэ шъурипыигъ, бзэджагъэхэр шъушӀэщтыгъэх.

²² Ау шъугухэр къабзэхэу, лажьэ зи шъуимыӀэу, зыми шъузэригъэмысэн щымыӀэу, Тхьэм ежь ыпашъхьэ шъуригъэуцоным пае, Христос лымрэ лъымрэ къахэкӀыгъэ пкъы иӀэу зэрэлӀагъэмкӀэ джы ежь ышъхьэкӀэ шъузригъэшӀужьыгъ.

²³ Ау шъуиӀахьышӀу хъун Ӏофхэу къэбарышӀоу зэхэшъухыгъэм шъузщигъэгугъыгъэхэм зыми зыхешъумыгъэнэу, шӀошъхъуныгъэм игъогу шъутемыкӀэу шъыпкъагъэкӀэ шъурыкӀон фае. Тхьэм фэлажьэхэрэм а къэбарышӀур ошъо чӀэгъым щыпсэурэ цӀыф пстэуми арагъэӀугъ. Сэ, Паул, а къэбарышӀум сыфэлажьэ.

Паул чылыс зэӀукӀэм зэрэфэлажьэрэр

²⁴ Джы сэ сишӀуагъэ шъозгъэкӀызэ, къин сщэчми, сэгушӀо, сыда пӀомэ, Христос ыпкъэу чылыс зэӀукӀэм сишӀуагъэ езгъэкӀыным пае, гузэжъогъухэу сщэчынхэу къысфигъэнэфагъэхэр джы сэ спкъыкӀэ исэгъэкъух.

²⁵ Тхьэм Ӏофэу спшъэ къырилъхьагъэм тетэу, Тхьэм икъэбарышӀу икъугъэу шъозгъэӀуным пае, чылыс зэӀукӀэхэм сафэлажьэ.

²⁶ А къэбарышӀур блэкӀыгъэ лъэхъанхэмрэ лӀэшӀэгъухэмрэ ащегъэжьагъэу шъэфым фэдэу Тхьэм цӀыфхэм аригъэшӀэгъагъэп. Мы уахътэм Тхьэм а шъэфыр ицӀыф лъапӀэхэм нафэ къафишӀыгъ.

²⁷ Хымэ лъэпкъхэм щытхъушхо гъэшӀэгъонэу а шъэфым афыхэлъыр Тхьэм ицӀыф лъапӀэхэм аригъэшӀэныр игъоу ылъытагъ. А шъэфыр мары: Христос шъугухэм арылъ, ар шъугухэм зэрарылъым паий, щытхъушхо шъуиӀэ зэрэхъущтым шъущыгугъэу, шъупэплъэ.

²⁸ Аущтэу Христос ехьылӀэгъэ къэбарыр тэгъэӀу. Хэтрэ цӀыфи ыгу Христос илъэу, зишъыпкъагъэ щыкӀагъэ зи зимыӀэ цӀыф икъугъэу Тхьэм ыпашъхьэ идгъэуцоным пае, зэкӀэ акъылышӀуагъэкӀэ гурытэгъаӀо, етэгъашӀэ.

²⁹ Ар згъэцэкӀэным пае, Христос зэкӀэ лъэкӀ лъэшэу къысхилъхьагъэмкӀэ сишъыпкъэу сэлажьэ ыкӀи сэулэу.