Апостолхэм ашӀэгъэ Ӏофхэр 1 - Къэбарышӏур (Инджыл)

АПЭРЭШЪХЬ Тхьэм ежь ы Псэ ЛъапӀэ апостолхэм къафыригъэхынэу къызэригъэгугъагъэхэр

^1-2 Теофил лъапӀ, апэм къыщегъэжьагъэу Тхьэм Исус уашъом зыдищэежьыгъэ мафэм нэсыфэ, Исус ышӀэгъэ Ӏоф пстэури, цӀыфхэм аригъэшӀэгъэ Ӏоф пстэури апэрэ тхылъэу сэ стхыгъэм ит. Исус, Тхьэм ежь уашъом дищэежьыным ыпэкӀэ, къыхихыгъэ апостолхэм Тхьэм ы Псэ ЛъапӀэ илъэкӀыкӀэ унашъохэр афишӀыгъ.

³ Исус къин зещэчым ыуж, щэч хэмылъэу лӀагъэхэм къызэрахэтэджыкӀыжьыгъэр бэрэ афигъэшъыпкъэжьэу ахэмэ заригъэлъэгъущтыгъ. Мэфэ тӀокӀитӀум къыкӀоцӀ апостолхэм бэрэ заригъэлъэгъущтыгъ, Тхьэм и Тетыгъошхо иӀофхэм яхьылӀагъэуи къадэгущыӀэщтыгъ.

⁴ Исус ахэмэ ягъусэ зэхъум, унашъо афишӀыгъ: – Къалэу Ерусалим шъудэмыкӀ, ау сэ зигугъу къышъуфэсшӀыгъэу, Ты лъапӀэм шъукъызэригъэгугъагъэм шъупаплъ;

⁵ сыда пӀомэ, Иуан псыкӀэ цӀыфхэр ыумэхъыщтыгъэх, ау мэфэ заулэ зытешӀэкӀэ, Тхьэм ежь ы Псэ ЛъапӀэкӀэ шъуиумэхъыщт.

Исус уашъом зэрэдэкӀоежьыгъэр

⁶ Апостолхэр зызэрэугъоихэм, Исус къеупчӀыгъэх: – Зиусхьан, Израиль ипачъыхьагъу мы мафэхэм зэтебгъэуцожьыщта?

⁷ – Ты лъапӀэм итетыгъошхокӀэ уахътэхэуи лъэхъанэхэуи ыгъэнэфагъэхэр шъушӀэнхэ шъуфитэп, – ариӀожьыгъ Исус.

⁸ – Ау Тхьэм ы Псэ ЛъапӀэ къызышъуфехыкӀэ, лъэкӀ шъуиӀэ хъунышъ, Ерусалими, зэкӀэ Иудей хэкуми, Самарие хэкуми, дунаим ыкъуапэ нэс шыхьат шъукъыщысфэхъущт.

⁹ Исус а гущыӀэхэр къызеӀохэм ыуж, ахэмэ алъэгъоу Тхьэм ар уашъом дищэежьыгъ. Зы ошъуапщэ горэ Исус къышъхьащыхьи, ежь амылъэгъужьы хъугъэ.

¹⁰ Исус уашъом зыдэкӀоежьым, апостолхэм анэхэр уашъом тырагъэдыкъагъэхэу, ошӀэ-дэмышӀэу лӀитӀу шъошэ фыжькӀэ фэпагъэхэу ахэмэ адэжькӀэ къэуцугъэх.

¹¹ Шъо, Галилей цӀыфхэр, – къаӀуагъ а лӀитӀумэ, – сыд пае мыщ дэжьым шъущытэу уашъом шъудэплъыера? Мы Исусэу Тхьэм уашъом дищэежьыгъэр уашъом дэкӀоежьыгъэу зэрэшъулъэгъугъэм фэдэ къабзэу къехыжьыщт.

Апостолхэм ежьхэм ащыщ хъунэу Иудэ ычӀыпӀэкӀэ Матфый зэрэхахыгъэр

¹² Ащ нэужым апостолхэр Елеон Ӏуашъхьэм ехыжьхи, Ерусалим агъэзэжьыгъ. Елеон Ӏуашъхьэр Ерусалим игъунэгъоу щыт, шэмбэт гъогум икӀыхьагъэ фэдизэу.

¹³ Къалэм дэхьажьхи, ахэр зэрыс унэ лъагэм дэкӀоежьыгъэх; ахэр мыхэр арыгъэх: Петрэ, Иуан, Якъуб, Индрыс; етӀанэ Филипп, Фомэ, Бар-Талмай, Маттэ; Алфей ыкъо Якъуб, Симонэу ихэгъэгу ыпсэ емыблэжьэу фэлажьэщтыгъэр, Якъубэ ыкъо Иуд.

¹⁴ Бзылъфыгъэ заулэ, Исус янэу Мерэм, Исус ышхэр ягъусэхэу, ахэмэ зэкӀэ зэдаштэу Тхьэм елъэӀу зэпытыщтыгъэх.

¹⁵ А мафэхэм ИсускӀэ шӀошъхъуныгъэ зиӀэ купэу нэбгыришъэрэ тӀокӀырэ фэдиз хъущтыгъэм Петрэ къыхэуцуи, къыӀуагъ:

¹⁶ – Сшыхэр, Тхьэм игущыӀэ тхыгъэхэр Тхьэм ы Псэ ЛъапӀэ пачъыхьэ Даутэ ыгу къырилъхьэхи, Иудэ зыцӀэм ехьылӀагъэу къыригъэӀуагъэхэр къэшъыпкъэжьынхэ фэягъэх. А Иудэр ары Исус къэзыубытыгъэхэм гъогур язгъэлъэгъугъэр.

¹⁷ Ари тэ тщыщыгъ, мы Ӏофыми тигъусэу фэлажьэщтыгъ.

¹⁸ Бзэджагъэу ышӀагъэм пае пкӀэу ратыгъэмкӀэ Иудэ хьасэ къыщэфыгъ. А хьасэм бгъэгукӀэ хафи, ыныбэ зэгоути, икӀэтӀыйхэр зэкӀэ къикӀыгъэх.

¹⁹ Ерусалим дэс цӀыф пстэуми Иудэ къехъулӀагъэм икъэбар зэхахыгъ, абзэкӀи а хьасэм АкелдамэкӀэ еджэщтыгъэх. Ащ къикӀырэр «Лъыосэ Хьас».

²⁰ ЕтӀанэ Петрэ къыхигъэхъожьыгъ: – Орэд ЛъапӀэхэм мыщ фэдэу арыт: «ИпсэупӀэ нэкӀ орэхъу. Зи ерэмыс». Мыщ фэдэуи арыт: «Ащ ипшъэрылъ нэмыкӀ горэм ерэштэжьи, ычӀыпӀэ ерэуцожь».

^21-22 – Арыти, Исус лӀагъэхэм къызэрахэтэджыкӀыжьыгъэр Иудэ ычӀыпӀэкӀэ нэмыкӀ горэм къыддиушыхьатын фае. А шыхьатыр Исус къытхахьэу, къытхэкӀэу зыщытыгъэ лъэхъаным зэкӀэ, Иуан Исус зиумэхъыгъэ мафэм щегъэжьагъэу Тхьэм Исус уашъом дищэежьыфэ, тигъусагъэхэм ащыщын фае.

²³ Аущтэу нэбгыритӀу агъэуцугъ: Юсыфэу Бар-ШаббэкӀэ заджэхэрэмрэ (ащ Иусти раӀуагъ) Матфыйрэ.

^24-25 ЕтӀанэ Тхьэм елъэӀухэзэ аӀуагъ: – Зиусхьан, о цӀыф пстэуми агухэм арылъыр ошӀэ. Мы нэбгыритӀумэ ащыщэу, апостолым иӀоф ышӀэнэу хэпхыгъэр къытэгъэлъэгъу; сыда пӀомэ, Иудэ а Ӏофыр къыгъани, ежь фэшъошэ чӀыпӀэм кӀуагъэ.

²⁶ ЕтӀанэ пхъэдз радзи, пхъэдзыр Матфый тефагъ. Аущтэу апостол пшӀыкӀузымэ ягъусэу Матфыий апостол хъугъэ.