2 Фессалоникэ 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Шъо, Тхьэу Тятэ лъапӀэрэ Зиусхьан Исус Христосрэ зыгу илъхэу Фессалоникэ къалэм щыӀэ чылыс зэӀукӀэм щыщхэм, Силуанрэ Тимофейрэ сигъусэхэу мы тхылъыр къышъуфэсэтхы.

² Тхьэу Тятэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

Тхьэм зафэу цӀыфхэм хьыкум къызэратыришӀыхьащтыр

³ Тшыхэр, шъощ пае Тхьэм щытхъу фэтшӀ зэпытын фае. Ари тэрэз, сыда пӀомэ, шъуишӀошъхъуныгъэ хэхъо зэпыт, шъуащыщэу хэти адрэм шӀулъэгъоу фыриӀэми хэхъо зэпыт.

⁴ Арышъ, цӀыфхэм сыд фэдиз къин шъуагъэщэчми, сыд фэдиз гузэжъогъу шъухэтми, теубытагъэрэ шӀошъхъуныгъэрэ зэрэшъуиӀэм пае, Тхьэм ичылыс зэӀукӀэхэм адэжь шъуищытхъу щытэӀо.

⁵ А Ӏоф пстэуми Тхьэм ихьыкум зафэу зэришӀырэр къагъэшъыпкъэ, сыда пӀомэ, теубытагъэ зэрэшъуиӀэм пае, Тхьэм и Тетыгъошхоу къин зыфэшъушэчырэм ыӀэчӀэгъ шъучӀэхьанэу къышъуфигъэшъошэщт.

⁶ Шъо гузэжъогъу шъухэзыдзэрэ цӀыфхэр гузэжъогъум хидзэжьынхэр Тхьэм зафэу елъытэ.

⁷ Шъо, гузэжъогъум хэтхэр, шъутигъусэу гупсэф къышъуитыжьынри Тхьэм зафэу елъытэ. Ар зыхъущтыр Зиусхьан Исус уашъом къехэу имэлэӀичхэу лъэкӀ зиӀэхэр игъусэхэу къызылъэгъощт мафэр ары.

⁸ Тхьэр зымышӀэрэ цӀыфхэу, ти Зиусхьан Исус ехьылӀэгъэ къэбарышӀум емыдэӀухэрэм ябзэджагъэ аригъэпщыныжьыным пае, мэшӀотхъуабзэм хэтэу Зиусхьан Исус дунаим къэкӀожьыщт.

⁹ А цӀыфхэр Зиусхьаным ынапэрэ, ежь лъэкӀышхоу щытхъушхо зиӀэмрэ апэчыжьэхэу, мыухыжьын кӀодыныр Ӏахьэу Тхьэм атырилъхьащт.

¹⁰ Ар къызыхъущтыр Зиусхьаныр дунаим къызыкӀожьыщт мафэр ары. А мафэм ицӀыф лъапӀэхэм ежь щытхъу фашӀыщт, ежьыркӀэ шӀошъхъуныгъэ зиӀэ хъугъэ цӀыфхэми зэкӀэми ежь агъэшӀэгъощт. Шъори а цӀыфхэм шъуахэтыщт, сыда пӀомэ, тишыхьатныгъэ шъушӀошъ хъугъэшъ ары.

¹¹ Джары шъощ пае зэпымыоу Тхьэм тызкӀелъэӀурэр. Тхьэр къызэрэшъоджагъэм тетэу, ибын шъухъуныр къышъуфигъэшъошэнэу телъэӀу. ИлъэкӀышхокӀи шӀугъэу шъугухэм арылъ пстэури шъуигъэгъэцэкӀэнэуи, шъуишӀошъхъуныгъэ къыхэкӀырэ ӀофышӀу пстэури рышъуигъэгъэкъунэуи Тхьэм телъэӀу.

¹² Аущтэу ти Зиусхьан Исус ыцӀэ цӀыфхэм щытхъу фяжъугъэшӀыщт, Зиусхьаныр шъугухэм зэрарылъым паий, шъори щытхъу шъуиӀэ хъущт. Ти Тхьэрэ ти Зиусхьан Исус Христосрэ анэшӀу къызэрэшъущафэрэм тетэу аущтэу хъущт.