1 Фессалоникэ 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Силуанрэ Тимофейрэ сигъусэхэу, шъо, Тхьэу Ты лъапӀэмрэ Зиусхьан Исус Христосрэ зыгу илъхэу, Фессалоникэ къалэм щыӀэ чылыс зэӀукӀэм щыщхэм, мы тхылъыр къышъуфэсэтхы. Тхьэу Ты лъапӀэмрэ Зиусхьан Исус Христосрэ анэшӀу къышъущарэфи, гупсэф къышъуарэт.

ШӀошъхъуныгъэ зиӀэхэу Фессалоникэ дэсхэм апае Паул Тхьэм щытхъу зэрэфишӀырэр

² Шъо пстэуми апае Тхьэм щытхъу фэтэшӀ зэпыт, Тхьэм тызелъэӀукӀи, шъуигугъу тэшӀы.

³ ШъуишӀошъхъуныгъэ шӀушӀагъэхэр зэрэшъуигъэшӀагъэм ти Тхьэу Ты лъапӀэм ыпашъхьэ игугъу щытэшӀ зэпыт. ШъуишӀулъэгъу инэу шъузэригъэлэжьагъэм, ти Зиусхьан Исус Христос шъущыгугъэу шъузэрэпаплъэрэм пае, теубытагъэ шъуиӀэ зэрэхъугъэми ягугъу Тхьэм ыпашъхьэ щытэшӀ зэпыт.

⁴ Шъо, тшыхэу Тхьэм шӀу ылъэгъухэрэр, Тхьэм ибын шъухъунэу шъукъызэрэхихыгъэр тэшӀэ,

⁵ сыда пӀомэ, къэбарышӀур къызэрышъодгъэӀугъэр гущыӀэхэм язакъоп, кӀуачӀэкӀи Тхьэм ы Псэ ЛъапӀэ илъэкӀыкӀи къэбарышӀур къышъодгъэӀугъ нахь. Икъугъэуи къэбарышӀур шъушӀошъ дгъэхъугъэ. Тызышъухэтым, тишӀуагъэ шъодгъэкӀэу тызэрэзекӀощтыгъэр шъошӀэ.

⁶ Тэ тилъэужхэми Зиусхьаным илъэужхэми шъо шъуарыкӀощтыгъ. Сыда пӀомэ, гузэжъогъушхо шъухэтыгъэ пэтми, Тхьэм ы Псэ ЛъапӀэ гушӀуагъоу шъугухэм къарилъхьагъэмкӀэ Тхьэм игущыӀэхэр шъудагъэх.

⁷ Аущтэу Македоние хэкумрэ Ахаие хэкумрэ арысхэу шӀошъхъуныгъэ зиӀэ цӀыф пстэуми шапхъэ шъуафэхъугъ.

⁸ Сыда пӀомэ, Зиусхьаным ехьылӀэгъэ къэбарышӀур шъуадэжь къикӀэу зынэсыгъэхэр Македоние хэкумрэ Ахаие хэкумрэ язакъоп, ау ТхьэмкӀэ шӀошъхъуныгъэ шъуиӀэ зэрэхъугъэм икъэбар тыдэкӀи цӀыфхэм щашӀэ хъугъэ. Арышъ, а Ӏофым ехьылӀагъэу цӀыфхэм ащ нахьыбэ ятӀон ищыкӀагъэп,

⁹ сыда пӀомэ, дахэу тызэрежъугъэблэгъагъэри, щыӀэныгъэ зиӀэ Тхьэ шъыпкъэм шъуфэлэжьэным пае, тхьэ нэпцӀхэм шъуакӀыб зэрафэжъугъэзагъэри ахэмэ къаӀотэжьы.

¹⁰ Тхьэм ы Къоу лӀагъэхэм къахигъэтэджыкӀыжьыгъэр уашъом къызэрехыжьыщтым шъупэплъэ – Исусэу Тхьэм игубжэу къэкӀощтым тыкъыӀэкӀэзыхыжьыщтыр ары.