Levitico 3 - Ang Biblia (1982)

Mga Halad-sa-Paghidait

¹ “Kon ang iya dolot halad sang mga halad-sa-paghidait, kon maghalad sia gikan sa kabakahan, bisan lalaki ukon babayi, ihalad niya ini nga walay kasawayan sa atubangan sang Ginoo.

² Kag ibutang niya ang iya kamut sa olo sang iya halad kag ihawon ini sa ganhaan sang layanglayang nga tiliponan; kag ang mga anak ni Aaron nga mga sacerdote magwisik sang dugo sa ibabaw sang halaran palibut.

³ Kag idolot niya ang halad sang mga halad-sa-paghidait, nga halad tungud sa kalayo sa Ginoo, ang sapay nga nagaputus sang mga kasudlan kag ang tanan nga sapay nga yara sa mga kasudlan,

⁴ kag ang duha ka batobato kag ang sapay nga yara sa ila nga yara sa mga balikawang, kag ang putus sa atay pati ang mga batobato kuhaon niya.

⁵ Niyan sonogon ini sang mga anak ni Aaron sa halaran sa ibabaw sang halad-nga-sinonog, nga yara sa ibabaw sang gatong sa kalayo; halad tungud sa kalayo ini, nga maamyon sa Ginoo.

⁶ “Kon ang iya dolot nga sa halad sang mga halad-sa-paghidait sa Ginoo gikan sa panong, lalaki ukon babayi, ihalad niya ini nga walay kasawayan.

⁷ Kon magdolot isa sing isa ka cordero nga halad niya, niyan idolot niya ini sa atubangan sang Ginoo,

⁸ ibutang niya ang iya kamut sa olo sang iya halad kag ihawon siya sa atubangan sang layanglayang nga tiliponan; kag iwisik sang mga anak ni Aaron ang dugo niya sa ibabaw sang halaran palibut.

⁹ Niyan idolot niya gikan sa halad sang mga halad-sa-paghidait ang halad tungud sa kalayo sa Ginoo ang sapay niya, ang bug-os nga matambok nga ikog, iya kuhaon sing suup sa tuluktukon, kag ang sapay nga nagaputus sang mga kasudlan, kag ang tanan nga sapay nga yara sa mga kasudlan,

¹⁰ kag ang duha ka batobato kag ang sapay nga yara sa ila nga yara sa mga balikawang, kag ang patus sa atay pati ang mga batobato kuhaon niya.

¹¹ Kag sonogon ini sila sang sacerdote sa ibabaw sang halaran subong nga kalan-on gikan sa halad tungud sa kalayo sa Ginoo.

¹² “Kon ang iya halad kanding, niyan ihalad niya ini sa atubangan sang Ginoo,

¹³ kag ibutang niya ang iya kamut sa olo sini, kag ihawon ini sa atubangan sang layanglayang nga tiliponan; kag iwisik sang mga anak ni Aaron ang dugo sa ibabaw sang halaran palibut.

¹⁴ Niyan idolot niya gikan sini ang iya halad, nga halad tungud sa kalayo sa Ginoo, ang sapay nga nagaputus sang mga kasudlan, kag ang bug-os nga sapay nga yara sa mga kasudlan,

¹⁵ kag ang duha ka batobato kag ang sapay nga yara sa ila nga yara sa mga balikawang, kag ang putus sa atay pati ang mga batobato kuhaon niya.

¹⁶ Kag sonogon sila sang sacerdote sa halaran subong nga kalan-on gikan sa halad tungud sa kalayo nga maamyon. Ang bug-os nga sapay iya sang Ginoo.

¹⁷ Manginpalatukuran sa gihapon ini sa bug-os ninyo nga mga kaliwatan, sa tanan ninyo nga puluy-an, nga indi kamo magkaon sing sapay ukon dugo.”