Jonas 2 - Ang Biblia (1982)

Ang Pangamuyo ni Jonas sa Pagpasalamat bangud sang Kaluwasan

¹ Niyan nagpangamuyo si Jonas sa Ginoo nga iya Dios gikan sa tiyan sang isda,

² nga nagasiling, “Nagpanawag ako sa Ginoo, bangud sang akon kapipit-an, kag nagsabat sia sa akon; nagtuaw ako gikan sa tiyan sang Sheol, kag ginpamatian mo ang akon tingug.

³ Kay gintagbong mo ako sa kadadalman, sa alibutud sang dagat, kag ang baha yara sa palibut nakon; ang tanan mong hanol kag ang imo kabaluran nag-agi sa ibabaw nakon.

⁴ Niyan nagsiling ako, ‘Ginasikway ako gikan sa atubangan sang imo mga mata; paano bala nga pagtolok nakon liwat sa imo balaan nga templo?’

⁵ Ang mga tubig naglikup sa akon tubtub gid sa kalag, ginlibutan ako sang kadadalman; ang mga lumot nagputus sa akon olo

⁶ sa kadadalman sang mga bukid. Nagpanaug ako sa duta nga ang iya mga pintal nagtakup sa akon sing dayon; apang ginpagowa mo ang akon kabuhi gikan sa Boho, O Ginoo nga akon Dios.

⁷ Sang napunaw ang akon kalag sa akon, nadumduman ko ang Ginoo; kag ang akon pangamuyo nagsulud sa imo, sa imo balaan nga templo.

⁸ Ang mga nagasapak sang butig nga mga kadayawan nagabiya sang ila kaugalingon nga kalooy.

⁹ Apang ako magahalad sa imo sa tingug sang pagpasalamat; bayaran ko ang ginsaad ko. Ang kaluwasan nagagikan sa Ginoo!”

¹⁰ Kag nagpamolong ang Ginoo sa isda, kag ginsuka niya si Jonas sa mamala nga duta.