Ŵaebeya 1 - Amashiwi Aba Lesa

¹ Akale ŵaLesa ŵalukulaŵila kuli ŵawisifwe muŵakusimika pantu apenji nekwambala ukwamikoka iinji,

² popele apapelele insiku isi ŵalilaŵile kuli fweŵo muWana ŵaŵo, aŵo ŵaikalicile nimpyani yafintu fyonse, kuli ŵo kaŵili eko ŵacitile impindi syamuyayaya.

³ Aŵo ekutula kwaŵuleme bwaŵo, cipasyo caŵuntu bwaŵo; ŵalipintile ifintu fyonse kwisiwi lyamakosa aŵo; popele, ili ŵaswesesye ifyakuŵifya, ŵaliikele palwine lwaŴukulu kwiulu;

⁴ ili ŵaweme ukwakucilo'kwakuti napaŋkalamba, koti nifyopele'fyo ifi ŵapyene isina ilyakusicilo' kwakuti uŵuleme.

⁵ Pakuti kuli isa-ŋkalamba ŵalaŵile pambi ati: Ŵeŵo uli Mwana wanji, Nakufyala weŵo lelo? nakaŵili ati: Neŵo ŋkalukuli nineŵa Wisi, Naye akalukuli Mwana wanji?

⁶ Kaŵili pakweŵa impindi iyo iyi ŵakenjisya-mo mucalo caŵantu uyo umuŵele, ŵalilaŵile ati: Kaŵili ŋgasimulambile iŋkalamba syaŵaLesa syonse.

⁷ Nefyaŋkalamba nasyo ŵalilaŵile ati: Uyo eusyalula iŋkalamba syakwe fipupu, Neŵapyunjisi ŵakwe naŵo kwakaka kwamulilo.

⁸ Sombi ifyaMwana ŵalilaŵile ati: Iteŵe lyoŵe weLesa, lyakwikalilila insiku syonse isyamuyayaya; Nekasako kakuluŋgama nako kasako kaŴufumu ŵoŵe.

⁹ Walukutemwa ukuluŋgama, nekulukufitilwa ukusendama. Pakuti pali fyefyo ŵaLesa, eŵaLesa ŵoŵe, ŵalikusufisye nemafuta Akusembo'kwakuti ukwakucila napaŵaŵyoŵe.

¹⁰ Nakaŵili ati: Weŵo, weSikulu, pakutaŋga waliikalicile amakosa icalo; Nemaulu nao milimo iyakuminwe yoŵe.

¹¹ Ifyo fikafwa, sombi weŵo ulekalilila: Fyonse'fyo fikacekula koti cakufwala:

¹² Nakaŵili koti cakufwalila-po ukafifuŋga: Koti cakufwala fikatantakwa kaŵili: Sombi weŵo ewewopele, Nemyaka yoŵe nayo taikasila-po, yo.

¹³ Sombi ifyaisa-ŋkalamba ŵalaŵile pambi ati: Ikala palwine lwanji, Ili nsiŋgatwalula utupondo toŵe cipuna icakusamina-po amakasa oŵe?

¹⁴ Syonse kansi tasili mipasi ilukupyuŋga, iyatumwa mukucite'milimo pakuti pali ŵaŵo aŵali apepi ukupyana ukupuluka?