Ulwimbo 1 - Amashiwi Aba Lesa

¹ Ulwimbo lwanyimbo, ulwakwe Solomoni.

² Ŋgaamfyonte-po nefifyonto fyakanwa kakwe, Pakuti uŵutemwe ŵoŵe ŵulicilile ukuwama napamfaina.

³ Ubwema bwamafuta oŵe ŵuliweme Lomba isina lyoŵe mafuta etulucile; Pakuti pali fyefyo aŵanakasi aŵasice aŵaswetele ŵalukukutemwa.

⁴ Uŋkule; twakuŵutuka ukulukukulonda. Imfumu yanyinjisya mufipinda fyaiyo. Twakulukutota nekulukusaŋgalalila muli weŵo; Twakulukwanuka uŵutemwe ŵoŵe ukucila napamfaina. Ŵalakutemwa ukwelelwe.

⁵ Ndifitile, sombi ndi neŵulombe, Mweŵana ŵakuJelusalemi aŵanakasi, Koti masema akuKeda, Koti fipembe fyakwe Solomoni.

⁶ Tekuntontomeka pakuti ndukufita, Pakuti akasuŵa kantontomeka. Aŵana ŵaŵamama ŵalukumfitilwa; Ŵalindeŋgesye wakulama amaŵala amifaina; Sombi iŵala lyanji nemwine nsilamine-po.

⁷ Weutemenwe umutima wanji, umbule Apolukwembela, apolileŋgesya ukutusya itaŋga lyoŵe akasuŵa pakati: Pakuti mbanindo niŋgekala koti ufimbilwe-po Pamataŋga aŵaŵyoŵe?

⁸ Kani tawisi, weuwaminine lukoso pakati paŵanakasi, Koya lomba pamakasa etaŋga, Ulisye utwana twambusi toŵe pamasema aŵembesi.

⁹ Nakuliŋganisya, weuntemenwe, Nakafwalo uwakuŋgolofwana syakwe Falo.

¹⁰ Amatoŵo oŵe aŵulombe neyakupyata, Umukosi woŵe nemitande yafyamakweŵo apatali,

¹¹ Twakukucitila ifyakupyata fyegolide Nefyakupopela-mo ifyesilifa.

¹² Ili iikele petebulu lyaiyo imfumu, Lomba nado wanji wapimbana.

¹³ Untemenwe bwino mupo wamola kuli neŵo, Ulala pakati pamaŵele anji.

¹⁴ Untemenwe cisaŋgo camaluŵa akofeli Pamaŵala amifaina akuEnigedi.

¹⁵ Ŵona, uli neŵulombe, weuntemenwe; ŵona, uli neŵulombe, Uli nemenso aŵaciŵa.

¹⁶ Ŵona, uli neŵulombe, weuntemucila, icine, uli wakusaŋgalasya: Kaŵili uŵulo bwesu bwacifufya.

¹⁷ Ifiti ifyakunanda yesu fyayelesi; Ifipanda fyesu fyamiŵelosi.