Sakaliya 1 - Amashiwi Aba Lesa

¹ Pamwensi waŵuisanu naitatu, pamwaka waŵuiŵili wakwe Daliu, lyaliisile isiwi lyaŵaYawe kuli Sakaliya, umwana wakwe Beleciya, umwana wakwe ldo, uwakusimika, nekulaŵila ati:

² ŴaYawe ŵaliŵafitilwe ukwakuti ŵawisinwe.

³ Pakuti pali fyefyo ulaŵile kuli ŵo ati: ŴaYawe ŵamaŵumba ŵalukulaŵile'fi ati: Alulucileni kuli neŵo, efilukulaŵila ŵaYawe ŵamaŵumba, eli ŋkaalulucila kuli mweŵo, efilukulaŵila ŵaYawe ŵamaŵumba.

⁴ Tekulukuli koti nifyefyo ifi ŵali ŵawisinwe, aŵo ŵalukuŵilicisisya aŵakusimika ŵakale, nekulaŵilaati: ŴaYaweŵamaŵumba ŵalukulaŵile'fi ati: Alulukeni pano, mufume kunsila syenu isiŵipile nakufyakucita fyenu ifiŵipile; sombi ŵo taŵaumfwilepo neli kuŋkutika neŵo, koku, efilukulaŵila ŵaYawe ŵamaŵumba.

⁵ Mbaŵali kwisa ŵawisinwe? Neŵakusimika, kani ŵali nemweo uwamuyayaya?

⁶ Sombi amasiwi anji nemafunde anji, ayo naŵafundile aŵapyunjisi ŵanji aŵakusimika, kani taaŵasanjile ŵawisinwe? Naŵo nekwaluluka nekulaŵila ati: Koti nifyefyo ifi ŵalaŋgulucile ŵaYawe ŵamaŵumba ukutucita, koti ninsila syesu nakoti fyakucita fyesu, fyopele'fyo efi ŵatucitile.

⁷ Pakasuŵa kakuleŋga amakumi aŵili nensiku sine, akamwensi wakupalukamo, emwensi waSyebati, pamwaka waŵuiŵili uwakwikalika Daliu, lyaliisile isiwi lyaŵaYawe kuli Sakaliya, umwana wakwe Beleciya, umwana wakwe Ido, uwakusimika, nekulaŵila ati:

⁸ Nalibwene uŵusiku, lomba ŵoneni, nikumuntu ulukwenda pali kafwalo ukasicile; peŋka aliimakene pakati pamiyadasi mumukolo; lomba panuma pakwe pali naŵambi ŵakafwalo, aŵakasicile, neŵaswesi, neŵatuŵile.

⁹ Peŋka neŵo nalilaŵile ati: Mbaŵando aŵa, Sikulu? Kumfwa iŋkalamba iyalukwambala naneŵo yalilaŵile kuli neŵo ati: Nakukulanjisya ifi ŵali aŵa.

¹⁰ Popele umuntu uwaimakene pakati pamiyadasi aliasucile nekulaŵila ati: Aŵa niŵaŵo aŵo ŵatumine ŵaYawe mukupitana pacalo.

¹¹ Lomba ŵo ŵaliyasucile iŋkalamba yaŵaYawe iyaimakene pakati pamiyadasi, nekulaŵila ati: Twali twapitana pacalo, peŋka ŵoneni, icalo conse ciliikele celele, cili neŵutende.

¹² Eli yaasucile iŋkalamba yaŵaYawe nekulaŵila ati: MweŵaYawe ŵamaŵumba icisyele impindi yasyani ili tamuŋgawa neŋkumbu pa Jelusalemi napamisi yakuJuda, iyo iyi mwalukufitilwa imyake'yi amakumi asanu naaŵili?

¹³ Peŋka ŵaYawe ŵaliyasucile iŋkalamba iyalaŵile naneŵo, nemasiwi aweme, emasiwi akusaŋgalasya.

¹⁴ Lomba iŋkalamba iyalukwambala naneŵo yalilaŵile kuli neŵo ati: Simika, ulaŵile ati: ŴaYawe ŵamaŵumba ŵalukulaŵile'fi ati: Ndi neŵulwisya pajelusalemi napaSayoni neŵulwisya uŵukulu.

¹⁵ Kaŵili ndiŵafitilwe ukwakuti aŵenafyalo aŵekele ili wasaŋgawuka: pakuti ili nakalipile panini lukoso, ŵo ŵaliensesye ukukululula.

¹⁶ Pakuti pali fyefyo ŵaYawe ŵalukulaŵile'fi ati: Ndibwelele kuJelusalemi neŋkumbu; iŋanda yanji ikeŵacilwa-mo, efilukulaŵila ŵaYawe ŵamaŵumba; kaŵili umwando wakupima-ko ukafuŋgululwa paJelusalemi.

¹⁷ Kosimika liŵili, ulaŵile ati: ŴaYawe ŵamaŵumba ŵalukulaŵile'fi ati: Imisi yanji ikakuŋka nemasyuko liŵili; lomba ŵaYawe wakasaŋgalasya Sayoni liŵili, nekusalulula Jelusalemi liŵili.

¹⁸ Lomba naliinwine amenso anji nekuŵona, peŋka kusaŋga nikumaseŋgo ane.

¹⁹ Popele nalilaŵile kuŋkalamba iyalukwambala naneŵo ati: Mbaando aya? Nayo kaiŋgasuka ati: Ayaemaseŋgo apalaŋgenye Juda naIsilaeli na Jelusalemi.

²⁰ Popele ŵaYawe ŵalindanjisye aŵafusi ŵane.

²¹ Lomba nalilaŵile ati: Mbaŵalukwisa mukucite'ndo aŵa? Naŵo kaŵalaŵila ati: Ayo emaseŋgo apalaŋgenye Juda, fyopele'fyo tapali-po neli umo uwinwine umutwi; sombi aŵa eŵaisile mukutinisya nekupama pansi amaseŋgo aŵenafyalo, aŵo aŵasuntwile iseŋgo lyaŵo kucalo caŵaJuda mukucipalaŋganya.